1 Mançile xholle yiğna qiyğa xərna kaahin Xananya, sabara ağsaqqalar, Tertul donana yugra yuşan ha'as əxəna sa insan Kaysariyeeqa abı, Paulne gardanaqa gixhxhes ıkkanan karbı mane cigayne xərıng'us yuşan ha'a. 2,3 Paul qarımee, Tertulee mang'une gardanaqa bınahbı giyxhe giyğal:

– Geer ıkkanna Feliks, yiğne yugvalike şi gyavts'u-gyuvxhuna ı'mı'r hav'u. Ğu geeb yişde milletna haa'a. Şi mançil-alla vak'le geer qa'anava eyhe. 4 Zas ğu geer ozar ha'as ıkkan deş. Hucoona ixhes, yiğne yugvalika şal sık'ılda k'ırı alixhxhe.

5 Şak'le ats'axhxhayn, ine insanee dyunyeyne gırgıne cigabışee vooxhene Yahudeeşine yı'q'nee alikkı-gikkiy atçu, manbı g'elilib qaa'a. Mana Nazaretbı eyhene hor xət qa'ane grupna* xərna vor. 6,7 Mane insanıs Allahne Xayınab muq'addasiyvalla avaak'an haa'asniy vukkan. 8 Ğu mang'uke qidghın he'eene, vak'lecad g'acesın, şi nena bınahiy mang'une gardanaqa giviyxhe.

9 Tertulıka abıyne Yahudeeşed mang'vee eyhenbı qotkunbı vodva eyhe.

10 Mane cigayne xərıng'vee Paulısqa yuşan ha'as harsılymee, mana yuşan ha'a giyğal:

– Zak'le ats'a vod, ğu xhulelle senbına ina milletna haakim ıxhay. Mançil-allar yiğne ögil zal bınah deşdava eyhes zı şadra vorna. 11 Vassecad ats'axhxhes əxə, zı ı'bəədat ha'asdemee İyerusalimeeqa arıyn, yits'ıq'vəlle (12) yiğ kara eyxhe. 12 İne insanaaşine neng'uk'lecad zı Allahne Xaasne, sinagogbışee, şaharne menne-menne cigabışee şavukame xıliyn ha'a, insanar g'elil qaa'a g'acu deş. 13 Mançil-alla co yizde gardanaqa gixhxhiyn karbı yiğne ögil qotkuynbıva eyhes əxə deş. 14 Zı manbışe «horva» eyhene I'sayne yəqqı'n əlyhəəva gardanaqa alyaat'an. Zı məxüd yişde dekkaaşine Allahıs ı'bəədat ha'a, Allahne Q'aanunee, peyğambaraaşine kitabbışee otk'unne gırgınçis zı iman ha'an. 15 Zınad mane insanaaşe xhinne qopkuynbıb, qopkuyne yəqqı'l deşilinbıb üç'üb qeepxhesva Allahılqa umud haa'a. 16 Mançil-allar zas Allahner, insanaaşiner ögil gırgıne gahbışil məttıra ixhes ıkkan.

17 Geedne senbışile qiyğa zı q'urbanbı gyat'asiy yizde milletıs sadaq'a helesva İyerusalimeeqa qarı. 18 Manbışik'le zı məttıxhayle qiyğa Allahne Xaasne g'acu. Manke yizde hiqiy-alla alikkı-gikkiybıniy ts'irbıniy ıxha deş. 19 Mane gahıl Asiyeençe maqa sabara Yahuder abayle. Manbı inyaqa yizde gardanaqa gixhxhes ıkkanne karbışika ableskanniy. Manbı inyaqa vasqa abı, zalqa qa'as ıkkanan karbıd vasnee eyheskanniy. 20 Manke inyaa ulyobzuriynbışe cocad eyhecen, Aali Şuurayne ögilqa qığavhumee, manbışik'le zal nena bınahne g'avcu? 21 Zı maa'ab inəxübna ts'ir hav'u, uvhiyn: «G'iyna şu zı hapt'ıynbı üç'üb qeepxhesva uvhuvane məhkameeqa ts'ıts'a'a!» Höö-qöö, manbışe zalqa ine cuvabıl-allane bınah gyuvxhu?

22 I'sa Masihne yəqqı'ne hək'ee yugda ats'ane Feliksee, man məhkama ulyozar hı'ı, eyhen:

– Vuşde işika k'omandir Lisi qariyle qiyğa ilyakkas.

23 Maane vəşing'une xərıng'us əmr hoole:

– Paulıqa ilyakke, mang'ul ooar it'umra mexhe, mang'usqa kumag ha'asva abı-əlyhəəne hambazaaşik simet'a.

24 Ooğançe sabara yiğbı ılğeeç'uyle qiyğa, Feliks cune cühüt' xhunaşşeyka Drusilayka sacigee arı, Paul qot'alas alikkı. Mang'vee cune I'sa Masihılqane imanne hək'ee yuşan ha'ançil k'ırı iliyxhe. 25 Paulee qopkuvaline, vucecar-vuc aqqıyne, Q'iyaamatne yiğıne hək'ee gaf haa'amee, Feliks qərq'ı'n eyhen:

– G'iyniys ç'əv, hoora! Gah vuxhamee, zı ğu meer qot'alasda.

26 Mang'uqa umud vuxha, Paulee cus pılniyxan helesva. Mançil-allar Paul xhule ixheeyir mang'vee cusqa qort'ul, mang'uka gaf hav'u.

27 Q'ölle sen ılğeç'uyle qiyğa Feliksee cuna iş Porki Festısqa qoole. Feliksee Yahudeeşin ç'ak'ınbı cune sural vuxhecenva, Paul zindanee g'alyaraççe.