1,2 Teofil, yizın ts'ettiyn otk'uniybı* I'sa xəəqə ts'ıts'a'asde yiğılqamee, gidğılıyne işbışdeyiy Mang'vee xət qa'ane karbışde hək'ee vod. Xəəqə ts'ıts'a'assecar, I'see Vucee g'əvxü, g'axuvuyne telebabışis Muq'addasne Rı'hı'leğana əmrbı hele. 3 Qik'uyn uts'ur ts'ıts'ıiyle qiyğa, Mang'vee Vuceecar Vuc telebabışik'le xhulexheeyir hagvana, manbı Vuc üç'ürra vorva hayepxhecenva. Mana yoq'ts'al (40) yiğna manbışis gyagu, Allahne paççahiyvaline hək'ee yuşan ha'a. 4 I'see sayəqqees manbışika kar otxhan gyu'urmee, eyhen:

– İyerusalimıke g'aqa qığmeebaç'e. Zı şok'le uvhuna, Dekkee cuvab huvuna pay qavaalesmee, ulyoozre. 5 Nəxüdiy Yəhyee xhineka gicəpxı'ybı alyaat'a'a, məxüdıd şu sabara gahıle Muq'addasne Rı'hı'ka gicəpxı'ybı alyaat'as.

6 Telebabı sacigeeqa sabımee, I'sayke qiyghanan:

– Xərna, Ğu İzrailee paççahiyvalla q'omançe alyaa'asda gah qabı dişde?

7 I'see alidghıniy qele:

– Dekkee Cune hökumıka gixhxhiyn yiğbıyiy gahbı ats'axhxhay şolqa deş gexha. 8 Şolqa Muq'addasın Rı'h giç'umee, şos guc qavaales, İyerusalimee, Yahudeyavolle, Samariyel, dyunye ç'əvexhene cigeeqame şu Yizın şahadar vuxhes.

9 I'see manva uvhuyle qiyğa, telebabışde ulene ögil Mana xəəqə ts'ıts'a'a. Sa buludun Mana alyart'u, manbışile dyugul ha'ana.

10 I'sa xəəqa ts'ıts'a'amee, manbı xəəqa ilyaaka vooxhe. Mane gahıl, manbışisqa sayangaba cagvaran tanalinbı ali'ına q'öyre insan gyoğu, 11 qiyghanan:

– Galileyabı, nya'a xəəqa ilyaaka-ilyaaka avxu? Vuşde yı'q'neençe alyart'u xəəqa ts'ıts'ı'ına I'sa, şok'le g'avcune mane yəqqı'nır, yı'q'əlqa sak'alasda.

12 Mançile qiyğa telebabı Zeytunna tepava eyhene cigeençe İyerusalimqa geebaç'e. Mana tepa İyerusalimne k'ane vob, maqana yəq Şabbatne yiğıl iviykaras havaysarna yəqmee* vob. 13 Manbı şahareeqa qabı, co aaxvane xaane oone gozeeqa ılqeebaç'e. Maabınbı inbı vuxha: Pyotur, Yəhye, Yaaq'ub, Andrey, Filip, Tomas, Bartalamay, Matta, Halfayna dix Yaaq'ub, «vatan vukkana»* Şimon, Yaaq'ubna dix Yahuda. 14 Manbışde gırgınbışe sa yik'eka düəbı ha'a ıxha. Manbışika sacigee I'sayna yed Mayram, Mang'un çocar, mebın zəiyfabıb vuxhaynbı.

15 Yiğbışde sa yiğıl maqa vəşşe g'ayre (120) inyam ha'ana insan sarıyng'a, Pyotur yı'q'nee ulyorzul eyhen:

16 – Çocar, Yahudee I'sa aqqı'iynbışik'le yəq haagu. Yahudayne hək'ee Muq'addasne Rı'hı'n, Davuduleğana uvhiyn Muq'addasne Otk'uneedın ixhesniy ıkkan. 17 Yahuda şaka sarçuna, mang'veeyid şakasana I'see uvhiyn işbı ha'anbıniy.

18 Yahudee vucee hav'uyne pisde işike ıxhayne pılıs sa çol alişşu. Qiyğar mana maa'ar q'ombı-alla qıxha, vuxhun qıt'aaxı, iç'alatbı uğottul. 19 Gırgıne İyerusalimee eyxhene milletık'le man g'ayxhı, mane cigayk'le cone mizel Haqel-Dema do giyxhe. Man «Eban çolva» eyhen vodun.

20 Pyoturee qiyğa meed eyhen:

– Zaburne kitabee otk'un vod:

«Mang'un xav q'ərad axvecen,

Vuşucar dena axvecen»*,

sayid

«Mang'una cigab merıng'vee avqecen»*.

21 Mançil-allar şas merna insan g'əxəs ıkkan. Mana yişda xərna I'sa şaka eyxhene gahbışil, şaka iykarne insanaaşina sa ixhes ıkkan. 22 Mana I'see Yəhyeyke gicərxı'y alyaat'uyne gahılee, I'sa xəəqa ts'ıts'a'asde gahılqamee şaka iykırna insan ixhes ıkkan. Mang'uk'ler, şak'le xhinne, I'sa üç'ür qıxha g'acuniy ıkkan.

23 Məxrına q'öyre g'əyxı': Qorkunava eyhena Yusuf Barsabba, sayir Mattiya. 24 Qiyğa telebabışe düə haa'a:

– Rəbb, Vak'le gırgıng'une yik'eedın ats'an. Mane q'öng'üna Ğu g'əyxı'na hagve. 25 Hasre mang'vee Ğu g'axuvuyne telebee xhinne g'ullux hee'ecen. Yahudee mana g'ullux g'alepçı, cus gexhane cune cigeeqa ayk'an.

26 Qiyğa çöp k'yadaççe. Çöpün Mattiya hagva. Mana yits'ıq'vər'esda I'sa Masihee g'axuvuna teleba eyxhe.