1 Xananya donane sa adamee, cune xhunaşşeyka Sapfirayka con ciga massa hele. 2 Mang'vee pılın sabaran cus g'alyadaççe, axuynıd ç'ak'ıne telebabışisqa qele. Mang'une xhunaşşeyk'le man ats'a ıxha. 3 Pyoturee mang'uk'le eyhen:

– Xananya, nya'a yik'eeqa iblis g'aykkı Muq'addasne Rı'hı's horbı hı'ı, cigayke ıxhayne pılın sabara ğu vas alyaat'u? 4 Man ciga massa helesse ögil, yiğın dişdiy vod? Çike ıxhayn pılıd vasqaniy quvu. Nya'a ğu məxdın kar hı'ı? Ğu insanaaşis deş, Allahıs horbı hı'ı.

5 Man g'ayxhımee, Xananya ç'iyelqa hı'ğərkır, can hele. G'ayxhiyn gırgınbı geeb qəvəyq'ənanbı. 6 Mek'vunbı abı, Xananyeyn mayit kafaneeqa hitk'ır, ıkkı k'eyxhan.

7 Mançile xheyible sə'ət ılğevç'uyle qiyğa Xananyeyna xhunaşşe aqa ikkeeç'e. Məng'ı's ıxhaynçike xabar vuxha deş. 8 Pyoturee məng'ı'ke qiyghanan:

– Ciga inemeençisne massa huvu?

Zəiyfee alidghıniy qele:

– Ho'o, manimeençis.

9 Pyoturee məng'ı'k'le eyhen:

– Nya'a şu sapçı, Rəbbin Rı'h siliys ı'xiyxə? Vak'le akkaysneedın g'elybışin sesbı g'iyxheyee? Manbı yiğna adamiy k'eyxhı qöönbı vob. Manbışe ğunar qiykeesda.

10 Zəiyfa mankecar Pyoturne g'elybışeeqa hı'ğərkıl, can hele. Aqa ikkepç'iyne mek'vunbışik'le manar qiyk'u g'eece. Manbışer manar qiykı adamiyne k'ane k'eyxha. 11 I'sa Masihne ummatınbışik'le man ıxhaynbı g'ayxhımee, qəpq'ı'niyvalin caneeqa zeze ooxha.

12 Masihne ç'ak'ıne telebabışileğana milletne yı'q'nee geed əlaamatbıyiy gorsatmabı hagva. Gırgın iman ha'anbı Sıleymanne doyulyne daxayk avqa sa insan xhinne savayle. 13 Milletın manbışis geeb hı'rmat gyuvxheeyib, menne insanaaşisse manbışika sapçes vəəxə vuxha deş. 14 Rəbbilqa iman ha'anbı adamerıb, zəiyfabıb yiğ-yiğıle geeb qeebaxhe vuxha. 15 Pyotur ı'lğəəme, mang'una əqxheeyib cone vuk'aranbışilqa gyuvxhecenva, milletın con vuk'aranbı g'alyapk'ıyne karakacab şahrabışeeqa qığaa'a vuxha. 16 İyerusalimne hiqiy-allane şaharbışee vooxhenbıb veçe-veçena abayle vuxha. Manbışe con vuk'aranbı, cinaaşe avquynbı abayle vuxha. Manbışin gırgınbıb yug qeebaxhe vuxha.

17 Xərna kaahin, mang'us k'anebın sadukeyar gırgınbı gısganciyvalin qopxu əə vuxha. 18 Mançil-allab manbışe ç'ak'ıne telebabı avqu, şaharne zindaneeqa aa'a. 19 Rəbbin malaaik xəmde adı, zindanın akka aaqı, manbı g'aqa g'avkku eyhen:

20 – Havak'ne Allahne Xaasne ulyobzur mane ts'ebne ı'mrene hək'ee yuşan hee'e.

21 Manbışe k'ırı alixhxhı, miç'eeb çakba Allahne Xaasqa abı, xəp qaa'a giviyğal. Xərne kaahineeyiy mang'us k'anenbışe Aali Şuurayiy İzrailin gırgın ağsaqqalar sav'u, Masihne telebabışiqab qihna zindaneeqa g'ıxoole. 22 G'aravulyçer telebabı av'uyne zindaneeqa qabımee, manbışik'le telebabı ivdeykı, yı'q'əlqa sapk'ıl, 23 eyhen:

– Şak'le manbı av'uyne zindanın akkabı it'umda, akkaysneeyib g'aravulyçer ulyobzur g'avcu. Şi akkabı aaqı, aqa ikkeepç'ımee, şak'le maa'ar vuşucar aveykı deş.

24 Manbışil k'ırı alixhxhı, Allahne Xaane g'aravulyçeeşina xərnayiy ç'ak'ın kaahinar alivku aaxva. Manbışilqa hiyxhar deş, man nəxüd eyxhen karneva. 25 Mane gahıl manbışisqa insan qıxha, eyhen:

– Şu zindaneeqa av'uyn insanar, Allahne Xaasne ulyobzur milletıd xət qa'a.

26 G'aravulyçeeşina xərnayiy g'aravulyçera hapk'ın, Masihın telebabı ana qavayle. Manbı, milletın g'ayeqqa hooleva qəvəyq'ənva, manbışik xıl set'a deş.

27 Manbışe telebabı Aali Şuurayne ögilqa qavayle. Xərne kaahinee manbışike qiyghanan:

28 – Mane doyuka xət qa'as şi şos q'adağa dişde gyuvxhu? Şumee İyerusalimeene gırgıne insanaaşis mançine hək'ee xət qa'a, şene İnsanna ebıb yişde gardanaqa gyuvxhes vukkan.

29 Pyotureeyiy menne telebabışe inəxdın alidghıniy qele:

– Şi geeb Allahee eyhençika gyuv'ur-oza qeepxhes vukkan, insanaaşe eyhençika deş. 30 Yişde dekkaaşine Allahee, şu çarmıxılqa ts'ıts'ı gik'una I'sa üç'ür qı'ı. 31 Allahee Mang'uke Xərnayiy G'attivxhan haa'ana hı'ı, Cune sağne sural gya'a. Həşde İzrailne milletısse bınahbışike xıl ts'ıts'aa'as vəəxə, Allahır manbışde bınahbışile ılyheç'e. 32 Mane karbışis şi şahadar vob. Allahee Cune cuvabıka gyuv'ur-oza qeebaxhenbışis huvuyn Muq'addasın Rı'hı'd şahad vod.

33 Manbışik'le man eyhenbı g'ayxhımee geeb qəl vooxhe, telebabı gyapt'as vukkiykan. 34 Manke Gamliel donana sa farisey, Q'aanunna mə'əllim, Aali Şuuree oza qexhe. Gırgıne milletıncab mang'us hı'rmat giviyxhe vuxha. Mang'veeyib sabara gahıs Masihın telebabı g'aqa qığee'eva əmr haa'a. 35 Gamlielee Aali Şuureebınbışik'le inva eyhe:

– İzrailybı, yugba fıkır ooxhne şu ine insanaaşik hucooyiy ha'as. 36 Sabara gahna ögil, Tevda'ee eyhena vuceecar-vuc qıvaats'ına insan xhinne ıkkekkana sa yı'q'neeqa qığeç'u. Mang'uqar qihna yoq'ud vəşşilqa (400) ələəna insan ark'ın. Mana gik'umeeme, gırgın cun insanar heebaxanbı. Gırgınıd vuççud dexhayn xhinne ç'əvexhen. 37 Qiyğa siyaheeqa alyabat'amee, Galileyeençena Yahuda yı'q'neeqa qığeç'u, cuqad qihna millet hoyt'al. Manar gik'umee, mang'uqab qihna apk'ıniynbıb heebaxanbı. 38 Mançil-allad zı şok'le eyhen: man insanar coleb-alqa g'alee'e. Manbışe ha'an insanıkexheene, man deşxha əlyhəəsın. 39 De'eş, man Allahıkexheene, şosse manbı ulyoozar haa'as vəəxəs deş. Şucab Allahne duşmanaaşilqa savk'alas.

Manbı Gamlielee eyhençilqa qavaylenbı. 40 Telebabı aqa qopt'ul, çümqüqqa hevles ulyookka. Qiyğab əmr haa'a I'sayne doyule vuççud yuşan hıma'acenva. Mançile qiyğab g'ookkanbı. 41 Telebabı I'sa Masihne doyunemee co k'ap'ik'ıle avqa qav'uva, Aali Şuureençe şadba qığeebaç'e. 42 Manbışe yiğıs Allahne Xaasneeyiy xaybışee xət qı'iyke, I'sa Masih vorva Yugna Xabar hav'uyke xıl ts'ıts'aa'a deş.