1 Mançile qiyğa Paul Afineençe qığeç'u, Korinfqa ayk'an. 2 Maa'ar Pont eyhene cigee yedike ıxhana Akila donana sa Yahudiy qızaxxa. Mane gahılqasse İmperator Klavdiyee əmr hav'u vuxha Roomeebın gırgın Yahuder mançe qığeepç'ecenva. Mançil-allar mana cune xhunaşşeyka, Priskilayka, İtaliyeençe maqa qarı ıxha. Paul manbışde k'anyaqa ayk'an. 3 Manbışin sənə'ət Paulıka saniy vod: manbışe çadırbıniy ha'a. Mançil-allar Paul manbışika iş haa'a axva. 4 Şabbatne yiğbışil Paulee sinagogbışee, Yahudeeşikayiy Yunanbışika gafbı ha'a ıxha, manbı Masihne imanılqa savaak'al haa'asva.

5 Silaniy Timotey Makedoniyeençe qabıyle qiyğa, Paulee vuceecar-vuc Allahne cuvabıs g'iysar, Yahudeeşis I'sa Masihva şahaadat haa'a. 6 Yahuder mang'ulqa g'elil qeepxha, cuvab ayhe gibğılmee, Paulee p'laşilin tooz gikkı, eyhen:

– Vuşde hapt'ıyna bınah şol vobna! Zı məttıra vorna, həşdiyle zı menne milletbışisqa ı'qqə.

7 Paul mançe qığeç'u, sa menne milletıkene Tit Yust donane mu'munne xaaqa qarayle. Mang'un xav sinagogus at'itq'ın vod.

8 Krispee, sinagogne xərıng'vee xaane gırgıng'uka sacigee I'sa Xərıng'ulqa iman ha'a. Korinfbışde gellesınbışe Paulıl k'ırı alixhxhı iman hı'ı, I'sa Masihne doyule gicəbəxənbı.

9 Sa xəmde Rəbb Paulıs gyagu, eyhen:

– Qı'məyq'ən, Yizde hək'ee yuşan he'e, nıq' ıqmaqqa. 10 Zı vaka vor, vuşucar vak set'as deş, ine şaharee Zalqa iman ha'asın millet geed vod.

11 Paul maa'ar seniy surana axva, mang'vee Allahın cuvab milletıs xət qa'a.

12 Axayayna vaali eyxhene Gallionne gahıl*, Yahuder sabı, Paulılqa k'yophur, mana məhkameeqa ts'ıts'a'asva abayle. 13 Manbışe inəxüd eyhe:

– İne insanee Allahıs ı'bəədat ha'as yişde Q'aanun hagvan xhinne deşud xət qa'a.

14 Paul cuvabcad eyhes həsilyxha deşdiy, Gallionee Yahudeeşik'le eyhen:

– Yahuder, şu mang'ulqa qa'an kar, hək' deşvalla, yı'q'ı'n cinayat ıxhaynxhiy, zı şol sabırıka k'ırıniy alixhxhes. 15 İnyaa'ab gaf əə vob xət qı'iyne, dobışde, vuşde Q'aanunne hək'ee, mançil-allab mana iş şucab hee'e. Zas məxdıne karbışis haakimiyvalla haa'as vukkan deş.

16 Məxüb mang'vee manbı məhkameençe g'e'eebaşenbı. 17 Manke gırgıng'vee sinagogna xərna Sosten aqqı, sinagogne ögee yugra getana. Gallion mane işiqa sak'ır ilyakka deş.

18 Paul Korinfıl xılece yiğbınar axvana. Mançile qiyğa mana imannanbışika xüvə arxhu, Kenxreya eyhene şahareeqa ayk'an. Maa'ad mang'vee Allahıs huvuyn cuvab aqqıyle qiyğa, ç'ərbı gyadaxhva*. Mançile qiyğa Paul gameeqa gyu'ur, Priskilaykayiy Akilayka sacigee Suriyeyne suralqa avayk'an. 19 Manbı Efesqa hipxhırmee, Priskilaykeyiy Akilayke Paul curxha, sinagogeeqa ikkeç'u, Yahudeeşika gaf haa'a. 20 Manbışe mang'uk'le sık'ırra gahnar inyaa'ar axveva uvheeyid, mana maa'ar axva deş. 21 Manbışika xüvə arxhu, əlyhəəmee, Paulee eyhen:

– Allahee harsılee, zı meer şosqa ayresda.

Mana mançer gamıyka ayk'anna. 22 Kaysariyeeqa hirxhıl, mana mançer ayk'anna İyerusalimeeqa. İyerusalimee, mana hayk'anna I'sayne ummatınbışisqa, mançer Antakyelqa ılğeç'e. 23 Sabara gahna maa'ar axuyle qiyğa, mana mançer ayk'anna. Galatiyayneyiy Frigiyayne cigabışee ı'ğiykır maane I'sayne telebabışis yik'bı hele.

24 Mane gahıl İskandariye donane şaharee yedike ıxhana Apollo donana sa Yahudiy Efeseeqa arayle. Mana micagra yuşan ha'ana, yugda Muq'addasın Otk'uniybı ats'ana insan ıxha. 25 Mang'vee Xərne I'sayne yəqqə ats'al alyaat'u ıxha. Mana rı'hı'ka qirxhu-gyorxhan yuşan ha'a. Mang'us saccu Yəhyeyne gicəpxiybışike xabar vuxheeyib, I'sayne hək'ee qotkuda kar xət qa'a ıxha. 26 Mana sinagogee yik'eka yuşan ha'a giyğal. Mang'ul k'ırı iliyxhene Priskilayeeyiy Akilayee mana cosqa qort'ul, Allahne yəqqı'ne hək'ee mang'us sık'ıldad qotkuda xət qa'a. 27 Apolloys Axayeeqa ı'qqəs ıkkanmee, imannanbışe mang'us yik'bı huvu, şaane telebabışilqa kağız oyk'an mang'uka yugba vuxheva. Apollo maqa hirxhılymee, şavaayiy Allahne yugvalika iman hı'ı, mang'vee manbışis geed kumag hı'ı. 28 Muq'addasne Otk'uniybışika, I'sa Masih ıxhay mang'vee hagva ıxha. Yahudeeşika Mang'une hək'ee xıliynbı ha'amee, Apollee gırgıng'uk'le g'ece-g'ece manbı qopkuba devxhay hagva.