1 Apollo Korinfnang'a, Paul suvabınane cigabışeençe ılğeç'u, Efesqa qarayle. Maa'ab mang'usqa sabara telebabı qızaaxa. 2 Mang'vee manbışike qiyghıniyn:

– İman hı'iyng'a Muq'addasın Rı'h alyaat'unniy?

Manbışe alidghıniy qele:

– Muq'addasın Rı'h ıxhaykecad şas xabar deşda.

3 Paulee manbışike meed qiyghanan:

– Manke şu nəxüdne gicəpxı'ybı alyaat'u?

Manbışed eyhen:

– Yəhyeyne gicəpxı'ys sik'ı.

4 Paulee eyhen:

– Yəhyee alyaat'uiyne gicətxı'yn insanaaşe bınahıke xıl ts'ıts'av'uva hagva ıxha. Mang'vee, millet cule qiyğa Qarıyng'us, I'says iman ha'as qott'ul.

5 Manbışik'le man g'ayxhımee, Xərne I'sayne doyuka manbı gicəbəxənbı. 6 Paulee xıleppı manbışilqa gixhxhımee, Muq'addasın Rı'h manbışilqa gexa. Manbıb menne mizyaaşil yuşan haa'ayiy peyğambariyvalla haa'a giviyğal. 7 Maa'ar yits'ıq'vənçilqa (12) ələəna adamiy ıxha.

8 Sinagogeeqa ikkeç'umee, Paul yik'eka yuşan ha'a giyğal. Xheyible vazna mang'vee maabınbışika gafbı ha'a, Allahne Paççahiyvaline hək'ee manbı imanılqa qavaalyaa'a. 9 Maane sabaranbışis gaf xıliy qav'u, iman ha'as diykkın, milletne ögil I'sa Masihna yəq pis haa'a giviyğal. Mançil-allar Paul manbışike curxha, telebabıb alyapt'ı, ayk'anna. Mang'vee Tiranne doyulyne maktabee yiğıs gafbı ha'a ıxha. 10 Məxüd q'ölle senna eyxhe, gırgıne Asiyel vooxhene Yahudeeşik'led menne milletınbışik'led Rəbbin cuvab g'iyxhe.

11 Allahee Paulıleğana mankilqamee g'ıdecuyn əlaamatbı hagva. 12 Paulne tanık qet'uynmeen k'at'arbı, ileylıxbı vuk'aranbışisqa xıl set'as hele ıxha. Vuk'aranbı yug qeebaxhe, pisın rı'hbıd manbışde adğançe qığeç'e ıxha.

13 Sabara iviykarne Yahudeeşine cindaraaşed pisde rı'hen avquynbışde k'ane Xərne I'sayn do ağmiş ha'a, eyhe ıxha: «Paulee eyhene I'sayne doyuka şolqa əmr haa'a!» 14 Yahudeeşine Skeva eyhene xərne kaahinne yighne dixee mana iş haa'a vuxha. 15 Sayəqqees pisde rı'hen manbışis alidghıniy qele:

– I'sar zak'le ats'ana, Paulne hək'eeyid zak'le g'ayxhiyn. Şu vuşbıne?

16 Pisde rı'hen aqqına insan manbışilqa ayhe. Gırgınbı g'elik avqa qav'u, ğamexhena. Manbı mane xaançe ts'eleb-q'eleb hivşu-qivşu heebaxa.

17 Mana gaf Efesee vooxhene gırgıne Yahudeeşilqayiy menne milletınbışilqab hiviyxharna. Mançile qiyğa insanaaşe qəpq'ı'n, Xərne I'sayne doyus sık'ılbab xəbna hı'rmat giviyxhe. 18 İman hı'iynbışde gellesınbışe abı, co hı'iynmeen bınahbı, gırgıng'uk'le g'ece-g'ece, gardanaqa alyaat'anbı. 19 Cadubı ha'ane gellesınbışed con kitabbı sı'ı, gyoxhxhan ha'anbı. Kitabbışda q'iymat qəpqı'mee, mançina q'iymat xhots'al aazır (50 000) nuk'rayn pıl ıxhay vaats'a vooxhe. 20 Məxüd Rəbbin cuvab gırgınəəng'ə hiyxhar, guc saa'a.

21 Man karbı ıxhayle qiyğa, Paulıs Makedoniyeençeyiy Axayeençe ılğeç'u, İyerusalimeeqa ı'qqəs ıkkiykan. Mang'vee eyhen:

– Zı İyerusalimeeqa hark'ıniyle qiyğa, zas Roomab g'avces vukkan.

22 Cune kumagçeeşina q'öyre, Timoteyiy Erast Makedoniyelqa g'uxoole, vucme sabara gahnar Asiyel axva.

23 Mane gahıl I'sa Masihne yəqqı'l-alla xədın alikkı-gikkiy gexha. 24 Dimitriy donane sa zərgəree, nuk'rayke Artemidays ı'bəədat ha'ane xaak* akaran karbı ha'a ıxha. Məxüd mang'vee, sənə'ətçeeşis xədın g'azanc hele. 25 Mang'vee, sənə'ətçeeriy mana iş haa'an gırgınbı sacigeeqa sav'u, eyhen:

– Hambazar, mane işin şas geed g'azanc hele. 26 İne Pauleeme eyhen, xıleka hav'uyn allahar hək'en allahar deş vob. Saccu Efesıl deş, eyhes eyxhe gırgıne Asiyelycab nimeen insanariy yəqqı'le qığav'u. Man şok'le g'iyxhenıd, g'ecenıd. 27 Manke şalqa xəbna dağamiyvalla ables: yişin sənə'ətıd əlyhəəsın, yişde xərne ilaahə Artemidays ı'bəədat ha'an xayid uleke g'a'ayxhasın. Məxüd gırgıne Asiyeyniy dyunyeyncad ı'bəədat ha'ana Artemidayna xəbvalla vuççud deşin kar ixhes.

28 Maabınbışik'le man g'ayxhımee, qəlıka ts'ir haa'a-haa'a, eyhen:

– Efesbışda Artemida xərna vor!

29 Şaharee, alikkı-gikkiy gexha. Milletın Paulıka yəq əlyhəən hambazar Makedoniyeençena Gayiy Aristarx avqu, habağa-habağa teatreeqa sabayle. 30 Paulıs milletne yı'q'neeqa ikkeç'es ıkkiykan, telebabışeme mana haysar deş. 31 Paulın hambazar vooxhene, Asiyeençene vaalibışde sabaranbışeb mang'ulqa xabar g'axuvu, miz k'yaa'a, teatreeqa g'el gimiyxheva.

32 Teatreeqa sabıynbı alivku vooxhe, sanbışe sa kar, mansanbışed medın karva ts'ir haa'a vuxha. Maqa sabıyne gellesınbışik'le co maqa nişismecab abı vuxhay ats'a deşdiy. 33 Yahudeeşe İskandar donana sa adamiy yuşan he'ecenva ögeeqa qığayhe. Mang'veeyid milletın ts'irbı hıma'acenva, xıl ooqa qı'ı. 34 Milletık'le mana Yahudiy ıxhay ats'axhxhamee, gırgıng'vee, sa insanee xhinne, q'öble sə'ətname ts'ir haa'a:

– Efesbışda Artemida xərna vor!

35 Manke milletısqa şaharne ç'ak'ınbışda sa qığeç'e. Mang'vee milletısqa nıq' aqqı'ı, eyhen:

– Efesbı, nya'a dyunyeyk'lecad ats'a dişde, Efesee şi xənne Artemidays ı'bəədat ha'an xaviy xəənçe qabına məng'ı'na g'aye havaacenbı vobva? 36 Mançik'le şavuk'lecad de'eşva eyhes dəxə. Mançil-allad şu nıq'bı aqqas ıkkan, hexxanbı hidi'iynemee. 37 Şu inyaqa abıyne insanaaşe yişin ı'bəədat ha'an cigabı q'əra qı'ı deş, yişde Artemidayqad hoku deş. 38 Dimitriysiy menne sənə'ətçeeşis şavuk'leme cuvab eyhes ıkkanxhee, şaqa məhkamabıd, ç'ak'ınbıb vobınbı. Hasre sana-sang'ulqa bınahbı maa'ad qe'ecen. 39 Şoqa medın qidghın ha'asın karbı vodxhee, manbı q'aanunne iclasee eyhe. 40 G'iyna şu şoled-alqa hı'iyne işbışil-alla, şi g'elil qeepxhava Roomayne ç'ak'ınbışisse yişde gardanaqa bınah gyuvxhes vəəxə. Şasse şal bınah deşdava eyhes əxəs deş.

Manıd uvhu, mang'vee gırgın sabıyn insanar g'ookkanbı.