1 Manbışike cureepxha, şi gamıyka qopkuba Kos eyhene adeeqa hapk'ın, qinne yiğıys Rodos eyhene adeeqa qabı. Mançeb Patara eyhene şahareeqa ılğeepç'ı. 2 Finikiya eyhene vilayateeqa əlyhəən gamı t'abal hı'ı, mançeeqa gyuv'ur, şi Finikiyelqa apk'ın. 3 Kipr eyhen ada g'acu, şi mançine canubıle ılğeepç'ı. Suriyeyne suralqa apk'ın, gameedın kar maa'ad haç'a'asva, Sur eyhene şaharee geepç'ı. 4 Maa'ab I'sayn telebabı t'abal hav'u, sa ülycümna manbışəəng'ə avxu. Muq'addasne Rı'hen vuk'leeqa k'eççuyn, telebabışe Paulık'le eyhe:

– İyerusalimeeqa hımayk'an.

5 Yişda maa'ab aaxvana gah ç'əvuvxhamee, şi mane şahareençe qığeepç'ı, yişde yəqqı'n apk'ın. İman ha'anbışin gırgınbı cone xhunaşşeeşika, uşaxaaşika sacigee, şi şahareençe qı'ğəəne cigeeqamee yəqqı'l hav'u, deryahne mıglek q'aratsabışil gyuv'ur düəbı hı'ı. 6 Sana-sang'uka xüvə apk'iyle qiyğa, şi gameeqa gyuv'ur, manbıb cone xaybışeeqa sapk'ıl.

7 Sureençe gamıyka şi Ptolemais eyhene şahareeqa qabı. Maayib imannanbışil alycaaxu, manbışisnee sa yiğna avxu. 8 Qinne yiğıl şi manbışike cureepxha, Kaysariyeeqa qabı. Yighne g'ullux haa'ang'una sa eyxhena*, Yugna Xabar hivxhar haa'ane Filipne xaaqa hapk'ın, şi maa'ab avxu. 9 Filipıqa peyğambariyvalla haa'ana yoq'uyre adamiys hidyark'ınna yiş yixha.

10 Maqa xılece yiğbışile Yahudeyayeençe Hagab donana sa peyğambar arayle. 11 Mana şasqana qıxha, Paulna ts'ira alyapt'ı, cun g'elybıyiy xıleppı ayt'ıl, eyhen:

– Muq'addasne Rı'hen inva vod eyhe: «Yahudeeşe ine ts'irayna iyesiy İyerusalim inəxür ayt'ıl, menne milletınbışde xılyaqa qeles».

12 Man g'ayxhı, şinad, maabınbışed Paulıs İyerusalimeeqa ımayk'ancenva miz k'yav'u. 13 Mançis Paulee inəxüd alidghıniy qele:

– Nya'a şu gyaaşe? Nya'a yizın yik' gyoxhxhan ha'a? Zı Xərne I'sayne doyunemee saccu g'el-xıl ayt'alascar deş, qik'asır İyerusalim həzirra vor.

14 Paul ittunçil aqqas dəxəmee, şi nıq'bı aqqı, eyhen:

– Hasre Rəbbis ıkkanan ixhecen!

15 Sabara gah ılğevç'uyle qiyğa, şi sabı-qabı İyerusalimeeqa yəqqı'l gyabak'a. 16 Kaysariyee vooxhene I'sayne telebabışin sabaranbıb şaka sacigee havayk'an. Manbışe şi ts'erriyne telebabışda sa eyxhene Kiprğançene Mnasonne xaa aaxvasva, maqa quvkekka.

17 İyerusalimqa hipxhırmee, imannanbı şadba yişde ögilqa qığeepç'ı. 18 Qinne yiğıl Paul şaka sacigee Yaaq'ub g'aces hark'ın. I'sayne ummatın gırgın ağsaqqalar maqa sabı vooxhe. 19 Paulee manbışis salam huvuyle qiyğa, Allahee culeğana menne milletbışde yı'q'nee hı'iyne işbışike yuşan ha'a. 20 Manbışik'le man g'ayxhı, Allah axtı qa'a. Qiyğa manbışe Paulık'le eyhen:

– Çoc, vak'le g'ecenne, Yahudeeşine yı'q'nee aazırbışika I'salqa iman ha'anbı vob, manbışde gırgıng'vee Q'aanunun eyhen yik'eençe haa'a. 21 Manbışik'le yiğne hək'ee g'ayxhiyn: ğu Mısa peyğambarne Q'aanunule savk'leva uvhu. Manbışisqa həməxüd qöö: menne milletbışde yı'q'nee vooxhene Yahudeeşis dixbı sunnat hidyav'iy, yişde ədatbışis sik'ı ı'mı'r hidyav'iy, ğu xət qa'a. 22 Həşde hucoona ha'as? Ğu inyaqa arıva manbışik'le g'idiyxhı axvas deş. 23 Mançil-allad şi eyhen he'e. Yişde yı'q'ne Allahıs k'ın g'aysır, cuvab huvuna yoq'uyre insan vor. 24 Q'aanunus sik'ı manbışisse vuk'ulybı gyatxhvas* əxecenva, inbıb vaka alyapt'ı, manbışika sacigeeyir mətxhes hak'ne. Manbışde cigee mətteepxhesın pılıd qele. Manke gırgıng'uk'le ats'axhxhesın, yiğne hək'ee eyhenbıd qotkunbı deşud, ğunad Q'aanunul k'ırı iliyxhevud. 25 Menne milletbışde imannanbışilqa şi kağız otk'un g'axuvu: byutbışisva gyat'uyne q'urbanbışin çuru, eb g'idivkiyne həyvanaaşin çuru umoyxhancen, eb ulymooğacen, zina hıma'acen.

26 Mançile qiyğa Paulee mana yoq'uyre insan alyapt'ı, qinne yiğıl manbışika sacigee məttexhena. Qiyğa Allahne Xaane məhleeqa ikkeç'u, mətteebaxhena gah mısayiy ç'əvooxheva eyhe. Sayid mang'vee manbışde doyule curayba-curayba vucee q'urban ablyaa'asva cuvab huvu.

27 Mətteebaxhen yighılle yiğ ç'əvexhemee, Asiyeençene Yahudeeşik'le Paul Allahne Xaane məhlee g'acu, maabın insanar g'elil qav'u, mana aqqı, 28 ts'irbı ha'a:

– İzrailybı, kumag he'e! Gırgınəəng'ə gırgıng'us, yişde milletneyiy Q'aanunne, Allahne Xaane hək'ee qotkuda xət qidya'ana haane. Mang'vee Allahne Xaane məhleeqa menne milletınbışinbı abı, muq'addasın ciga mı'q'ı' qa'a.

29 Mane Yahudeeşik'le Efesğançena Trofim şenke şaharee Paulne k'ane g'acuynçil-alla, manbışisqa məxüd qayle, Paulee mana Allahne Xaane məhleeqa arı.

30 Şaharcab g'elil qooxhe. Millet gırgıne surabışile g'adatxhun qadı, Paul aqqı, Allahne Xaane məhleençe harağva-harağva g'aqa qığayhe. Allahne Xaane məhlayn akkabıd hamankecad qa'anbı. 31 Manbışis Paul gik'asniy ıkkan. İyerusalim g'elil quvxhava gaf, Roomayne g'oşunbışde k'omandirılqa qabı hiviyxhar. 32 Mang'vee, zaraba sabara vəşınbışin ç'ak'ınbıyiy eskerar sav'u, millet g'elil qıxhayne cigeeqa g'adayxhvan. K'omandiriy cukan eskerar g'avcumee, milletın Paul getuy ulyozara'an.

33 Manke k'omandir k'anyaqa qarı, Paul aqqı, əmr haa'a mana q'öne zincirıka ayt'leva. Qiyğa milletıke qiyghanan:

– İna insan vuşune? Mang'vee hucoona hı'ı?

34 Gırgıng'une ghalençe curayn-curayn kar qığeç'e, manıd ts'irılqa siyk'al ıxha. Ts'irbışike mang'ulqa vuççud hiyxhar deş. Mançil-allar Paul g'aleeqa qıkkeeva əmr haa'a. 35 Paul q'ı't'yaaşilynang'a, millet manbışilqa məxüd k'yoytal, eskeraaşiqa mebna yəq idyavxu, mana xıle qıkkekka. 36 Millet mang'uqad qihna gitxhu, ts'irbı ha'a:

– Mana gik'e!

37 Paul qarı g'aleeqa akkyahasde gahıl, mang'vee k'omandirıke qiyghanan:

– Vake sa kar qiyghanas eyxheyee?

K'omandiree eyhen:

– Vak'le yunanna mizibne vaats'a? 38 Sık'ınna gahna ögil millet g'elil qı'ına, yoq'ud aazır (4 000) g'uldur vaqad qihna sahreeqa qıkkına misirğançena manke ğu deşur.

39 Paulee eyhen:

– Zı Kilikiyeyne Tarsus donane qıvaats'ıyne şahareençena cühüt' vor. Hucoona ixhes, hasre zı ine milletıka sık'ırra yuşan ha'as.

40 K'omandiree hassıriyle qiyğa, Paul q'ı't'yaaşil ooqa ılqeç'u, milletın nıq' qığmayhecenva xıl ooqa qa'a. Gırgıng'vee nıq'bı aqqiyle qiyğa, Paul cühüt'yaaşine mizel yuşan ha'a giyğal: