1 Fest Kaysariyeeqa qarı, hirxhılyne xhebne yiğıle mançe İyerusalimeeqa qarı. 2 Ç'ak'ıne kaahinaaşeyiy Yahudeeşine qıvaats'ıyne insanaaşe Paulne gardanaqa mang'une ögil bınahbı qa'a. 3 Manbışis sa yugvalla hee'ecenva Festıs miz k'yav'u, Paul İyerusalimeeqa qalya'as ıkkiykan. Cosmee mana yəqqə gik'as ıkkiykan. 4 Festee alidghıniy qele:

– Paul Kaysariyee aqqı vor, sabara gahıler zı maqa ı'qqəs. 5 Havaasre vuşun ç'ak'ınbıb zaka havak'necen, mang'vee hucoomecad qotkuyn hidi'ıxhee, maa'ad mang'une aq'val eyhecen.

6 Fest manbışde k'ane molyne-yits'ne yiğıle geer axva deş, mana Kaysariyeeqa siyk'al. Qinne yiğıl haakimne cigee gyu'ur, Paul qaleva əmr haa'a. 7 Paul qarımee, İyerusalimeençe abıyn Yahuder mang'une hiqiy-alla sabayle. Manbışis mang'une gardanaqa yı'q'ı'n bınahbı gixhxhes ıkkiykıneeyid, əxə deş.

8 Pauleeme cun sura aqqı, eyhen:

– Yahudeeşine Q'aanunne, Allahne Xaane, imperatorne ögee zaqa bınah deşda.

9 Yahuder ittu qaa'asdemee, Festee Paulık'le eyhen:

– Vas məhkama İyerusalim yizde ögil hı'ı ıkkananne?

10 Paulee eyhen:

– Zı Roomayne məhkamee ulyorzul vor. Yizın məhkama inyaa ılğeç'es ıkkan. Vak'lecad ats'an, zı Yahudeeşis pisın vuççud hı'ı deş. 11 Zal bınah vobxhee, zı qik'asın hucoomecad hı'ıxhee, zı qik'uyle hexva deş. De'eş, manbışe zalqa qa'an karbı yizde aq'val aqqas dəxəxheene, zı manbışde xılyaqa qelesın aq'va şavuqacad deşin. Zas imperatorne məhkamalqacad ghal aaqas ıkkan.

12 Fest cune insanaaşika yuşan hı'iyle qiyğa, cuvab qele:

– Vas imperatorne məhkamays ghal aaqas ıkkanva, ğu imperatorne k'anyaqa əlyhəəs.

13 Sabara yiğbışile qiyğa paççah Agrippayiy Bernika* Fest g'acesva Kaysariyeeqa abayle. 14 Manbı maa'ab geeb avxuyle qiyğa, Festee Paulna gaf paççahıs yuşan haa'a:

– İnyaa zale ögeecar Feliksee aqqı ar g'alerçuna insan vor. 15 Zı İyerusalimnane gahıl Yahudeeşine kaahinaaşine ç'ak'ınbışeeyiy ağsaqqalaaşe mang'ulena hav'u. Mang'us cazaa hevleva uvhu.

16 Zı manbışik'le uvhiyn, Roomabışiqa məhkama dena insan mebınbışde xılyaqa qelen ədat deşin. Paulısse cun cuvab eyhes əxecenva, havaasre mang'ulqa bınah gyuvxhes vukkanan insanar ts'eppa mang'usqa inyaqa ablecen. 17 Manbı inyaqa zasqa sabıyng'a, zı manbışik'le qinne yiğılycad haakimne cigee gyu'ur, mana insan qot'leva uvhu. 18 Man insanar oza qeepxha yuşan haa'amee, yizde fıkreençe ı'lğəəne bınahbışda nenacab mang'ulqa qav'u deş. 19 Mang'uka manbışe saccu cone dinıne hək'eedın gafbı hı'ı. Sayid manbışe I'sa donane sang'une hək'eedın gafbıyiy ha'a. Mana qik'u ixheeyir, Pauleeme Mana üç'ürra vorvaniy eyhe. 20 Zak'le mane işiqa nəxürme ilyakkasva dyats'ançil-alla, zı Paulıke məhkama cune işiqa İyerusalim ilyakke eyxheyeeva qiyghın. 21 Paulısme imperatorne məhkamays ghal aaqas, mankilqameeyir inyaa'ar axvas ıkkiykın. Zınar mana imperatorne k'anyaqa hixharasmee, inyaa'ar axveceva əmr hav'u.

22 Agrippee Festık'le uvhiyn:

– Mane insanıl zasıd k'ırı alixhxhes ıkkan.

Festeeme eyhen:

– G'iyqa k'ırı iliyxhe.

23 Qinne yiğıl Agrippayiy Bernika geeb micagba abı, g'oşunne k'omandiraaşikayiy şaharne qıvaats'ıyne insanaaşika məhkama ixhesde gozeeqa ikkeebaç'e. Festıne əmrıs sik'ı Paul aqa akkyayhe. 24 Festee eyhen:

– Paççah Agrippayiy inyaabın şakan insanar! İyerusalimeeyib, inyaa'adıd gırgıne Yahudeeşecab şikayat haa'ana ina insan şok'le g'ecenane? Manbışe ts'irbı ha'a: «İna insan gik'as ıkkanva!» 25 Zak'leme mang'ul mana gik'asda bınah g'ooce deş. Mang'vee zake imperatorne məhkamays ghal aaqas qiyghınva, zı mana Roomeeqa g'axılesda q'arar huvu. 26 Mang'une hək'ee hucoome yizde xərıng'ulqa ok'anas zak'le yugda ats'a deş. Mançil-allar zı mana vuşdeyiy yiğne, paççah Agrippa, ögilqa arı. Mane məhkamayle qiyğa zaqad ok'anasın cuvab ixhecen. 27 Zasqa məxdıd qöö, aqqına insan imperatorusqa g'ıxelemee, mang'vee hı'iyn kar ittevheene, man qotkuda ixhes deş.