1 Manbı Amfipoliseençeyiy Apolloniyeençe ılğeepç'ı Salonikeeqa qavayle. Maa'ab sa Yahudeeşina sinagogniy vob. 2 Paul xhebılle ülycümna maa'ar axva. Cune ədatıs sik'ı, Şabbatne yiğbışil maane sinagogeeqa hayk'an. Mang'vee Muq'addasne Otk'uniybışeençe Yahudeeşik'le 3 Masihee uts'ur ts'ıts'ı'ı, hapt'ıynbışde yı'q'neençe üç'ür qixhes ıkkanvaniy hagva vod. Paulee eyhe ıxha:

– Zı eyhena I'sa Masih vorna.

4 Yahudeeşikene sabaranbışe, menne milletbışikene gellesde mu'munaaşe, gellesde qıvaats'ıyne yadaaşe iman hı'ı, Paulıqayiy Silanıqab qihna avayk'an. 5 Menne Yahudeeşine man yik'eençe eyxhe deş. Maydamaqa sadıyne milletıke, karaı'dəən insanar sav'u, şaharee alikkı-gikkiy adaççe. Paulıy Silan milletne ögilqa qığaa'asva, manbı Yasonne xaalqa k'yoottal. 6 Manbı ivdeekımee, Yasoniy sabara iman ha'an çocar habağa-habağa şaharne ç'ak'ınbışisqa quvkekka. Milletın ts'irıka eyhe ıxha:

– Dyunyee alikkı-gikkiy atçuyn in insanar qabı inyaqab hipxhıriynbı. 7 Yasonee manbı cong'əə havaysar. İnbışde gırgınbışe imperatorun q'aanunbı g'eliqqa huvu, I'sa donana sa merna paççah vorva eyhe.

8 Man eyhenbışe milletiy şaharın ç'ak'ınbı g'elil qaa'a. 9 Şaharne ç'ak'ınbışe Yasonıkeyiy mansanbışike zalog alyaat'u, manbı g'ookkanbı.

10 İman ha'anbışe xəm quvxhamee, Paulıy Silan zaraba Beriyeeqa yəqqı'l haa'a. Manbı maa'ab Yahudeeşine sinagogeeqa havayk'an. 11 Beriyel vooxhene Yahudeeşe Salonikee vooxhenbışile Paulee eyhençil yugda k'ırı iliyxhe ıxha. Manbışe yiğıs Muq'addasın Otk'uniy nəxüdiy mang'us hayexheva qiyghan ıxha. Məxüd manbışis mang'vee eyhenbı qotkunbıyeva, ats'axhxhes ıkkan ıxha. 12 Məxüd, maane gellesde insanaaşe, geebne qıvaats'ıyne Yunan zəiyfabışeyiy adameeşe iman ha'a.

13 Salonikee vooxhene Yahudeeşik'le Paulee Beriyel Allahın cuvab hixhar ha'ava g'ayxhımee, maqa abı millet alikkı'ı, g'elil qa'a. 14 Mançile qiyğa imannanbışe Paul zarara deryahısqa yəqqı'l ha'a. Silaniy Timoteymee Beriyelycab aaxva. 15 Paul yəqqı'l araççenbışe mana Afinalqa hixhar ha'ana. Qiyğa Paulee manbışilqa eyhen, yı'q'əlqa sapk'ıl, Silanık'leyiy Timoteyk'le eyhe: «Zaraba zasqa qudoora».

16 Silaniy Timotey Afinal gozet haa'ane, Paulık'le şahar byutbışika gyavts'u g'ooce. Man g'acu, mang'un yik' sacuray qa'a. 17 Paulee sinagogbışee Yahudeeşika, menne milletbışikene mu'munaaşika mang'vee gafbı ha'a. Sayır mana maydamaqa qabı-avayk'ananbışika yiğıs geer yuşan ha'a. 18 Epikurnayiy* Stoistaaşina fəlsəfə haa'anbışde sabaranbışe mang'uka xıliynbı ha'a. Manbışde sassanbışe eyhe ıxha:

– Mang'vee yuşan ha'an kar hucooyiy, hucooyiy mang'vee gekka?

Mansanbışeme eyhe ıxha:

– Mang'vee mebın allahar dişdiyxan qıvaats'aa'a.

Paulee, I'sayneyiy üç'üb qıxhayne hək'eena Yugna Xabar haa'a. Manbışisqad dişe, mançil-alla məxüd qadayle. 19 Manbışe Paul alyart'u, Aali Şuurayna iclas alğaahane, Areopag eyhene cigeeqa abayle. Mang'uke qiyghanan:

– Ğu in xət qa'an ts'edın kar hucoo ıxhay ats'axhxhes eyxheye? 20 Ğu xət qa'an karbı şasqa curayda qöö. Şas ats'axhxhes ıkkan, man hucoo eyhen kariyva.

21 Afinal vooxhenbışdeyiy maqa abıynbışdemee inekke yugna gah, ts'edın karbı eyhenayiy ts'enne karbışil k'ırı iliyxhena gah vuxha.

22 Paul Areopagee, Aali Şuurayne ögilqa qığeç'u, inəxüd eyhe:

– Şu ha'ane gırgıne kareecad şu dindarar vuxhay g'ecen. 23 Zı hiqiy-alla iykır vuşde muq'addasne cigabışiqa ilyakkına. Q'urbanbı allya'ane sançil otk'uniy: «Dyats'ane allahıs». Şu dyats'a ı'bəədat ha'ana Allah zas şos qıvaats'a'as ıkkan. 24 Dyunyeyiy caadın gırgın itxhınna Allah xəənayiy ç'iyeeyna Xərna vorna. Mana insanaaşe ali'iyne məəbədbışee axva deş. 25 İnsanne xıleka hı'iyne karalqa Mana axu deş, gırgıng'us ı'mı'r, nafas, gırgıncad helena Mana vor! 26 Gırgın ç'iyeyn aq'va aqqecenva Mang'vee sa insanıke g'avaalyav'u gırgın insanar. Ç'iyene aq'val manbışis gah, ciga huvu, 27 bı'rq'ı'ng'vee xıleppı hadağva-hadağva yəq' t'abal haa'an xhinne, Vuc t'abal hı'ı aveykecenva. Hək'erar, Allah şale manimeeyir əq'əna deş vor. 28 Məxüd vuşde şaairee uvhu: «Mang'ul-alla şasse ı'ğviykaras, ı'mı'r haa'as, aaxvas vəəxə»*. Sa merıng'veeyid: «Şinab Mang'uke g'abıynbı vobva»* uvhu. 29 Şi Mang'uke g'abıynbı vobva, Allah, insanne fıkırıs, sik'ı k'ınəəğəyke, nuk'rayke, g'ayeyke ha'as eyxhen sa kar vodva, vuk'leeqa k'eççes ixhes deş. 30 Allahee ats'al deşde gahbışil mane karbışis ul k'əpq'ı'. Həşdemee, gırgınəəng'ə gırgıng'vee bınahbışike xıl ts'ıts'ee'eva əmr hav'u. 31 Allahee Vucee g'əyxı'yne İnsanee dyunyeys qotkuyn məhkama alğahasın yiğ gixhxhı. Mana hapt'ıynbışde yı'q'neençe üç'ür qı'iyka, Mana İnsan Vucee g'əyxı'na vorva hagva.

32 Hapt'ıynbışde yı'q'neençe üç'ür qexheva g'ayxhımee, maane sabaranbışe əqəna ha'a, mansanbışeme eyhen:

– Mançine hək'ee şi val sayıdne yəqqee k'ırı alixhxhes.

33 Məxüd ıxha Paul Areopageençe qığeç'u, ayk'anna. 34 Sabara insanar mang'uqab qihna avayk'an, qiyğad iman ha'a. Manbışde yı'q'nee Aali Şureençena Dionis ıxha, Damar donana zəiyfar yixhana.