1 Kaysariya eyhene şaharee Korneli donana sa insan axva ıxha. Mana İtaliy donane desteyna k'omandirbışda sa ıxha. 2 Mana vucur cuna xizanıb Allahıle qəvəyq'ənan, qopkuyn insanar vuxha. Mang'vee Allahne yəqqə geed sadaq'a hele ıxha, gırgıne gahbışilib Allahıs düə haa'a vuxha. 3 Yiğbışde sa yiğıl sə'ət xheyible vooxheng'a, mang'usqa Allahın malaaik adı, culqa ona'a gyagva:

– Korneli!

4 Korneli qəyq'ən-qəyq'ən mang'uqa ilyakkı, eyhen:

– Hucoona, yizda xərna?

Malaaikın mang'uk'le eyhen:

– Ğu Allahne yəqqə huvuyn sadaq'ayiy yiğın düəbı Allahılqa hitxhıriynbı. 5 Həşde Yafoyeeqa insanar g'axuvle, Pyoturva eyhena Şimon qot'le. 6 Mana g'ekvabı haa'ane Şimonne deryahne mıglekne xaa mihmanna axva.

7 Mang'uka yuşan ha'an malaaik atk'ıniyle qiyğa Korneliyee, cune nukaraaşina q'öyreyiy g'aravulyçeeşina sa mu'mun esker qoyt'al. 8 Manbışis gırgın yuşan hı'iyle qiyğa, manbı Yafoyeeqa g'uxoole.

9 Qinne yiğıl yı'q'ı'hı'l g'axuvuynbı şaharısqa hiviyxharang'a, Pyotur düə haa'asva daxalqa ılqeç'e. 10 Mana mıssıra ıxha, mang'us otxhuniy ıkkan ıxha. Mebınbışe otxhuniy ha'amee, Pyotur fıkreeqa ark'ın, mang'us sa kar gyagva. 11 Mang'uk'le xəybı q'öna qeedaxhe g'ece. Mançed yoq'ne surale aqqıyn xənne sufrayk akaran kariy gəə. 12 Mane sufral oo yoq'ne g'elilin həyvanar, hadağvanbıyiy şit'yar ıxha. 13 Qiyğa sa ses g'iyxhe:

– Oza, Pyotur, gyat'e, oxhne!

14 Pyoturee eyhen:

– Mısacad, Rəbb! Zı mısacad haramın, mı'q'ı'n çuru otxhuniyn deş.

15 Q'öd'es qadıyne sesın Pyoturuk'le eyhen:

– Allahee halalınva uvhiyne karbışik'le ğu haramınbıva immeyhe.

16 Məxüd xhebne yəqqees ıxhayle qiyğa, sufra xəəqə ts'ıts'exhe.

17 Pyoturee man g'acuyn nen eyheniyva fıkır opxhanmee, Korneliyne insanaaşe Şimonun xav qiyghan. Akkayne ghalee ulyobzur 18 it'umda qiyghanan:

– Pyoturva eyhena Şimon inyaane axva?

19 Mane gahıl g'acuynçina fıkır opxhanne Pyoturuk'le Muq'addasne Rı'hen inəxüd eyhe:

– Ğu xhebıng'veevur t'abal ha'a. 20 Manbı Zı g'axuvu. Oza, xıliyn hidi'ı manbışika hak'ne.

21 Pyotur avqa giç'u, mane insanaaşik'le eyhen:

– Şu t'abal ha'ana insan zı vorna. Nişisne şu abı?

22 Manbışe mang'uk'le eyhen:

– Korneli donana sa k'omandir vor. Mana qorkuna, Allahıle qəyq'ənna, İzrailyne milletınıb hı'rmat giviyxhena insan vorna. Mang'ulqa muq'addasne malaaikın əmr hav'u, ğu cune xaaqa qot'lecenva, yiğne cuvabılid k'ırı alixhxhecenva.

23 Mançile qiyğa Pyoturee manbı xaaqa qopt'ul, mihman haa'a.

Qinne yiğıl Pyotur manbışikasana yəqqı'l gexha. Yafoyeençen sabara imannan çocarıb manbışika havayk'ananbı. 24 G'iyqiys manbı Kaysariyeeqa hiviyxhar. Korneliyee cune ebanbı, k'anebın hambazar sa cigeeqa sav'u, manbı gozet haa'a vuxha. 25 Pyotur aqa ikkeç'umee, Korneli mang'une ögil ç'iyelqamee k'yoyzarna. 26 Pyoturee mana oza qı'ı, eyhen:

– Oza, zınar ğuna xhinnena insan vor.

27 Pyotur Korneliyka yuşan ha'a-ha'a, aqa ikkeç'umee, mang'uk'le maqa xılece insanar sabı g'ooce. 28 Pyoturee manbışik'le inəxüd eyhe:

– Şok'le ats'an, Yahudeeşis menne cigayne insanıka hambaziyvalla ha'as, manbışəəng'ə mihmanna ı'qqəs eyxhe deş. Allaheeme zak'le haguyn, zı nenecad insanık'le haramnava, mı'q'ı'nava eyhes ıkkan deşva. 29 Mançil-allar qort'uling'a, zı xıliyn hidi'ı arı. Zasse qiyghanas əxəyee, şu zı nişisiy qort'ul?

30 Korneliyee alidghıniy qele:

– Çiyyiğna, sə'ət xhebınçil, zı yizde xaa düəniy haa'a vob. Sayır sayangara hits'aygharan tanalinbı ali'ına sa insan yizde ögil ulyorzul 31 uvhiyn: «Korneli, yiğın düəbı g'ayxhiynbı, ğu Allahne yəqqə huvuyn sadaq'a Allahık'le ats'an. 32 Həşde Yafoyeeqa insanar g'axuvle, Pyoturva eyhena Şimon qot'le. Mana g'ekvabı ha'ane Şimonne deryahne mıglekne xaa mihmanna axva». 33 Mançil-allab vasqa mankecab insanar g'axuvu, ğunab yugvalla hav'u arına. Həşde yişin gırgınbı Allahne ögil vob, Rəbbee valqa əmr hav'u uvhiynçil həşde şas k'ırı alixhxhes ıkkan.

34 Pyotur gafıs girğıl, eyhen:

– Həşde zalqa hitxhıriyn, Allahee sa insan mansang'ule ooqa aqqaqqa deş. 35 Nene milletna ıxhayqa ilydyakkı, vuşuyiy Cule qəyq'ən, şavaayiy qotkuyn ha'a məxrına Mang'une yik'eençe eyxhe. 36 Mang'vee İzrailyne milletıs Yugna Xabar g'axuvu: şi gırgıng'una xərna eyxhene I'sa Masihıl-alla Allahın duşmanar deş vob. 37 Şok'le ats'an, Yəhyee gicəpxı'ybı alyaat'asva qopt'uluyle qiyğa, Galileyle gibğıl Yahudeyavolle hucoobıyiy ıxha. 38 Allahee Nazaretğançena I'sa g'əyxı', Mang'us Muq'addasın Rı'hiy guc hoole. Allah I'sayka ıxha, Mana gırgınəəng'ə iykır, yugvalla haa'a-haa'a, iblisıne xıle avxuynbı yug qav'u. 39 Yahudeeşine ölkeeyiy İyerusalimee I'see g'acuyne işbışin şi şahadar vuxha. Mana çarmıxılqa ts'ıts'ı'ı, gik'una. 40,41 Allaheeme Mana xhebıd'esde yiğıs üç'ür qı'ı. Mana üç'ür qıxhayle qiyğa, gırgıne milletısqa deş, Allahee ögilycab g'əvxüyne şahadaaşisqa, şasqa, arı. Şi Mang'uka otxhun-ulyodğuyn. 42 Mang'vee şas əmr hav'u, uvhu: «Milletılqa hixhar he'e, şahaadat hee'e, Allahee gixhxhına hapt'ıynbışdayiy üç'übınbışda Haakim Zı vor». 43 Mang'une hək'ee gırgıne peyğambaraaşe şahaadat hav'u, Mang'us iman hı'iynbışde gırgıng'une bınahbışile Mang'une doyuka ılyheepç'esınbıva.

44 Pyoturee man eyheng'a, Muq'addasın Rı'h gafıl k'ırı iliyxhene gırgıng'ul ooqa gexa. 45 Pyoturuka sacigee abıyne sunnat hav'uyne imannanbışik'le Muq'addasın Rı'h pay xhinne menne milletınbışilqad k'yoyhar g'acumee, ghalybı aaqı avxu. 46 Manbışe menne mizyaaşil Allah axtı qı'iyid g'iyxhen. Kornelik'leyiy mang'usqa sabıynbışik'le man mizyar ögil ats'a deşdiy.

Manke Pyoturee eyhen:

47 – Mane insanaaşed, şi xhinne, Muq'addasın Rı'hı'd alyaat'u. Manbı xhineka gicəpxəs şavusse hidyaasaras vəəxəyiy?

48 Məxüd, mang'vee manbışik'le I'sa Masihne doyuka gicəpxeva eyhe. Qiyğa xaane iyeseeşe Pyoturuk'le sa-q'ölle yiğna cong'əə axveva eyhe.