1 Antakya eyhene şaharne Masihne ummatınbışiqa peyğambarariy mə'əllimar vuxha: Barnaba, Niger donana Şimon, Kireneençena Lukius, paççah Hiroduka xər qıxhana Menaxemiy Şaul. 2 Mane insanaaşe Rəbbis ı'bəədat ha'amee, sivar aqqaqqamee, Muq'addasne Rı'hı'n manbışik'le eyhen:

– Zı manbışis huvuna iş hee'ecenva Barnabayiy Şaul curee'e.

3 Siv aqqı, düəbı hı'iyle qiyğa, manbışe Barnabalqayiy Şaulne ooqa xıleppı gixhxhı, manbı yəqqı'l abaççe.

4 Muq'addasne Rı'hı'ne əmrıka yəqqı'lqa qığeepç'iyn Barnabayiy Şaul Selevkiyelqa avayk'an, mançeb gameeqa gyuv'ur, Kipr eyhene adalqa avayk'an. 5 Kiprılyne Salamis eyhene şahareeqa hipxhırmee, Yahudeeşine sinagogbışee Allahın cuvab hixhar ha'a giviyğal. Mark donane Yəhyee manbışis kumag ha'a ıxha. 6 Mane adayne ine q'omançe şene q'omaqa hipxhırmee, Pafos eyhene şaharee vooxhe. Maa'ar manbışisqa cühüt' Bar-Yeşu donana cadubı ha'ana horalay peyğambar qızaxxa. 7 Bar-Yeşu, adayne xərıng'us, Sergi Paulus k'anena insan ıxha. Mana xərna ək'elikana insan ıxha. Mang'vee Barnabayiy Şaul qopt'ul, Allahne cuvabıl k'ırı alixhxhes ıkkiykan. 8 Elima donane (man «cadubı ha'ana» eyhen vodun) Bar-Yeşuys man ıkdiykın, adayna xərna imanıke sak'al ha'as ıkkiykan. 9 Muq'addasne Rı'hı'ka gyatsts'ıyne Şaulee (mang'uk'le Paulvad eyheniy) uleppı Elimalqa sak'al hı'ı, 10 eyhen:

– İblisna dix, yiğın yik' horakayiy pisvalika gyatsts'ı vod. Ğu gırgıne yugunçunacar duşman vor! Rəbbina qopkuna yəq quç'ookarav'iyke mısacab xıl ts'ıts'aa'as dişde? 11 Həşdeme Rəbbin xıl valqa qöö vod. Ğu bı'rq' qixhes, sabara gahna vak'le verığna ul g'avces deş.

Mankecab mane insanılqa çamra, miç'axiyvalla gyooç'e. İnyaqa-şaqa iykır, insan t'abal ha'a ıxha, vuc xıleke aqqı, qıkkeecenva. 12 Ixhaynbı xərıng'uk'le g'acumee, mang'vee iman ha'a. Rəbbine hək'ee ats'axhxhamee, mana ghal aaqıcar axva.

13 Paulıy cune k'anenbı Pafoseençe gamıyka Pamfiliyeene Perge eyhene şahareeqa qabı hiviyxhar. Mark donana Yəhyemee manbışike curxha, İyerusalimeeqa siyk'al. 14 Manbı cone yəqqı'n apk'ın, Pergeençe Pisidiyeene Antakyelqa hiviyxhar. Şabbatne yiğıl manbı sinagogeeqa ikkeepç'ı, giviy'aranbı. 15 Q'aanuniy Peyğambaraaşin otk'uniybı qətqı'yle qiyğa, sinagogne ç'ak'ınbışe manbı qopt'ul eyhen:

– Çocar, şoqa milletıs yik'bı helesın kar vodxhee, eyhe.

16 Paul oza qıxha, insanaaşe cul k'ırı alixhxhecenva xıleka hagu, eyhen:

– İzrailybıyiy Allahıle qəvəyq'ənanbı, k'ırı alixhxhe: 17 İzrailyne Allahee yişin dekkar g'əvxü. Mang'vee yişin millet Misir geed qı'ı, gucnane xıleka mançeb qığav'uynbı. 18 Mana yoq'ts'al (40) senna sahree manbışis öörxüna. 19 Kana'anne cigabışee eyxhene yighne milletıkın hı'iyle qiyğa, mane milletbışin cigabı yişde dekkaaşis hele.

20 Məxüd yoq'ud vəşşe xhots'al (450) sen ayk'an. Qiyğa Allahee manbışis haakimar huvu. Haakimar Şamuel peyğambarne gahılqamee vooxhe. 21 Milletın paççah heqqımee, Allahee Benyaminne nasılena Gişna dix Şaul manbışis paççahna gixhxhı. Mang'vee yoq'ts'al (40) senna paççahiyvalla haa'a. 22 Qiyğa, mana ak'an hı'ı, Allahee Davud paççah ha'a. Allahee mang'une hək'ee inəxüd eyhe: «Yizde yik'es ıkkanna insan, Yesseyna dix Davud Zak'le aveykı. Mang'veeyid Zas ıkkanan gırgın ha'asın»*. 23 Allahee Vucee cuvab huvuyn kar hı'ı, Davudne nasıleençena g'attivxhan haa'ana I'sa İzrailyne milletıs g'ıxele. 24 I'sa qalesse Yəhyee, gırgıne İzrailyne milletık'le bınahıke xıl ts'ıts'av'u, gicəpxı'ybı aleet'eva uvhu. 25 Yəhyee iş ç'əvəə'əmee, uvhiyn: «Şu zak'le vuşuvane eyhe? Masih zı deş vor. Zale qiyğa Mana qöö. Zı Mang'une g'ellinçin baağar aaqasır kara'ə deş».

26 Çocar, İbrıhımıke g'abıynbı, Allahıle qəvəyq'ənanbı! İn g'attivxhan haa'an cuvab şas g'axuvu. 27 İyerusalimne milletık'le, manbışde ç'ak'ınbışik'le Masih qıvaats'a deş. Manbışilqa Şabbatne yiğbışil qədəqqən peyğambaraaşe otk'uninbıd hiyxhar deş. Manbışe I'sa Masih muhaakima hı'ı. Məxüd peyğambaraaşe uvhiynbı eyxhe. 28 Manbışik'le Mana gik'asda bınah Mang'ul ivdekeeyib, Pilatık'le Mana gik'eva eyhe. 29 Mang'une hək'ee otk'uniyn gırgın kar hı'iyle qiyğa, Mana çarmıxıle gyaqqı, mağareene nyuq'vneeqa k'eyxha. 30 Allaheeme Mana hapt'ıynbışde yı'q'neençe üç'ür qa'a. 31 I'sayka Galileyeençe İyerusalimeeqa abıynbışik'le Mana xılece yiğbınar g'ecena. Manbı həşde milletne ögil Mang'un şahadar vob.

32 Həşde şi şolqa mana Yugna Xabar hivxhar haa'ana. İna Yugna Xabar Allahee yişde dideeşis huvuyne cuvabne hək'ee vobna. 33 Allahee, I'sa üç'ür qı'ı, man cuvab huvuyn kar yişdemee, manbışike g'abıynbışdemee, hı'ı. Zaburne kitabeena q'öb'esda mə'niy inəxüb vob:

«Ğu Yizda dix vor,

Zake g'iyna Vas dek ıxha»*.

34 Allahee Mana hapt'ıynbışde yı'q'neençe üç'ür qı'ı, Mang'un tan mısacad qı'çes hassaras deş. Mançil-allaniy uvhu:

«Davudus cuvab huvuyn qotkuyn karbı, Zı vuşdemee ha'as»*.

35 Mançil-allad menne cigee Davudee inəxüd eyhe:

«Yiğna mu'mun Ğu nyuq'vnee qı'çes hassaras deş»*.

36 Davudee Allahıs g'ullux hav'u, qik'una. Mana dideeşika k'eyxhı, mang'un tanıd qı'çiyn. 37 Allahee üç'ür qı'iyne I'sayn tanmee qı'çı' deş.

38 Çocar, şok'le ats'axhxhe, ine İnsanıleğana vuşde bınahbışile ılyheepç'esınbıva g'ayxha'a. Mısayne Q'aanunusseb şoke Allahne ögil qopkuynbı haa'as vəəxə deşdiy. 39 I'saysme iman hı'iyn gırgınbı Mang'uleğana qopkuynbı vuxhes. 40 Şucab şu havaace, peyğambaraaşe uvhiynbı mexhecenva:

41 «Rəbbee eyhen: „İlyaake, axtıba ilyaakanbı,

ghalybı aaqı aaxve, aagvle.

Zı vuşde gahıl məxdın işbı g'aces,

şos yuşan hı'iynxhiy şu hayeepxhes deşdiy"»*.

42 Paulıy Barnaba sinagogeençe qı'ğəəmee, milletın manbışis miz k'yaa'a, qööne Şabbatılib mançine hək'eecab yuşan hee'eva. 43 Sinagogeedın millet atk'ıniyle qiyğa, xılece Yahuderiy Yahudeeşin din alyaat'uyn mu'munar Paulneyiy Barnabayne qihna avayk'an. Manbışed mane insanaaşika gafbı ha'a, Allahne yugvalis yı'q'bı sak'al hıma'acenva manbışis yik'bı hele.

44 Sayidne Şabbatıs Rəbbine cuvabıl k'ırı alixhxhesva, eyhes eyxheyiy gırgıne şaharın millet sadıyiyva. 45 Yahudeeşik'le maqa adıynmeen millet g'acumee, manbışda paxılıyvalla avqaaqqa. Paulee eyhençis manbışe qəlasın cuvab sak'al ha'a ıxha. 46 Pauleeyiy Barnabee qı'dəpq'ı'n eyhen:

– Allahın cuvab ts'etta şolqaniy hixhar ha'as ıkkan. Şu man k'ane qı'ı deş, şucab şu karaı'dəənbı xhinne haagu. Mançil-alla şu gırgıne gahbışisde ı'mrenbı vuxhes deş. Şi həşde menne milletbışisqa əlyhəəs. 47 Rəbbina şalqa əmr inəxüb vuxha:

«Zı Vake milletbışis nur hı'ı,

g'attipxhıniy dyunyeyne nekke əq'ənane cigabışeeqa hixhar he'ecenva».

48 Menne milletınbışik'le man g'ayxhımee, şadeebaxhenbı. Manbışe Rəbbee Cun cuvab manbışis g'axuva Mana axtı qa'a. Gırgıne gahbışisde ı'mres g'əvxüynbışde gırgınbışe iman ha'a.

49 Məxüd Rəbbin cuvab mane cigayne gırgınəəng'ə hiyxharan.

50 Yahudeeşemee, qıvaats'ıyne xizanbışin mu'mun yadar, şaharın ç'ak'ınbı manbışilqa g'elil qaa'a. Manbıb Paulıqayiy Barnabayqa qihna gyapk'ı, manbı mane cigabışeençe g'e'eebaşenbı. 51 Manke Pauleeyiy Barnabee g'elybışilin tooz işaarat xhinne gyottul*, Konyeeqa avayk'an. 52 Telebabıb şadvaliniy Muq'addasne Rı'hı'n gyaats'enbı.