1 – Çocariy dekkar, həşde şu, yizde gardanaqa giyxhene karbışde hək'ee, zı hucooyiy eyhesva k'ırı alixhxhe!

2 Paul manbışika cühüt'yaaşine mizel yuşan ha'a g'ayxhımee, manbışde gırgıng'vee nıq'bı aqqaqqanbı.

Paulee eyhen:

3 – Zı Kilikiyeyne Tarsus şaharee yedike ıxhana cühüt' vorna. İyerusalimeeme zı xər qıxha, Gamliel donane mə'əllimısneeyib yişde dekkaaşina Q'aanun yugba xəp quvxha. Vuşde gırgıng'vee g'iyna ha'an xhinne, zınab Allahıs g'ullux yik'eençe haa'a. 4 Zı I'sa Masihna yəq' avquynbışiqa qihna girxhu, manbı gyabat'anbıniy. Manbı adamere, zəiyfabıye ilyakkana deşdiy. Manbışin g'elybı-xıleppı ayt'ıl, zindaneeqaniy akk'yaa'anbı. 5 Zı uvhiynçine hək'ee xənne kaahinisseb, ağsaqqalaaşisseb şahaadat haa'as vəəxə. Zı manbışe Damask'ne cühüt'yaaşine ç'ak'ınbışilqa otk'uniyn kağızıd alyaat'u, maane I'sayne yəq' avquynbışin g'el-xıl ayt'ıl, cazaa hevlesva İyerusalimqa manbı ablesvaniy hayk'anna.

6 Yı'q'ı'hna gah vooxheyiy zı yəqqı'lyniy vorna, Damask'ıs k'ane qıxhamee, sayid sayangada xəənçen xədın işix yizde hiqiy-alla gexha. 7 Zı ç'iyelqa qukkyork'ulymee, sa sesın zak'le uvhiyn: «Şaul, Şaul nya'a ğu Zalqa yiğbı allya'a?»

8 Zı qiyghıniyn: «Xərna, Ğu vuşune?»

Sesın zak'le uvhiyn: «Ğu Zalqa yiğbı allya'ana Nazaretğançena I'sa vor». 9 Zakanbışik'le işix g'acveeyid, zaka yuşan Ha'ang'vee eyhen ats'axhxha deş.

10 Zı uvhiyn: «Xərna, zı hucoona he'e?»

Mang'vee zak'le uvhiyn: «Oza, Damask'eeqa hoora, ha'as ıkkanan gırgın vak'le maa'ad eyhesın». 11 Mane işixıke yizın uleppı bı'rq' qıxha. Yizde k'anebınbışe zı xıleke aqqı, Damask'eeqa ıkkı.

12 Maa'ar Xananya donana sa mu'mun adamiyniy vor. Mang'vee Allahne Q'aanunun eyhen ha'anniy, maane Yahudeeşine yı'q'neeyib mang'uqa yugna hı'rmatıb vobnaniy. 13 Mana zasqa qıxha, uvhiyn: «Şaul çociy, hasre yiğın uleppı qeetxhecen». Mankecad yizın uleppı qeetxhaynbı, zak'ler mana g'acuna.

14 Mang'vee zak'le uvhiyn: «Yişde baba-dideeşine Allahee ğu g'əyxı', vak'le Cus ıkkanan ats'axhxhecenva. Mançil-allar vak'ler Damask'ne yəqqə Qorkuna I'sa Masih g'acuna, Mang'une ghaleençen cuvab g'ayxhiyn. 15 Ğu vak'le g'acu-g'ayxhiyn gırgıne insanaaşilqa hixhar ha'as, Mang'unemee şahaadat haa'as. 16 Nya'a gyu'ur? Oza, gicərxı'y alyaat'u, Mang'ulqa ona'a-ona'a, bınahbı hoğle».

17 Zı İyerusalimeeqa sak'ı, Allahne Xaasne düəniy haa'a vob, manke zas gyaguyn. 18 Zas mane gahıl Xərna I'sa gyagu, Mang'vee zak'le uvhiyn: «Zaara ixhe, İyerusalimeençe qığeç'e, ğu Yizde hək'ee hav'una gaf manbışis vukkiykanas deş».

19 Zı uvhiyn: «Xərna, manbışik'le ats'an, zı sinagogbışee ı'ğiykır Vas iman ha'anbı zindaneeqa av'u, gyootanbıniy. 20 Yiğne hək'ee yuşan ha'ane Stefanna eb k'yaa'ameeyib, zı maaniy vorna. Zı mançis yəq' huvuna, mana gek'anbışin p'laşbı zı aqqı».

21 Xərıng'vee zak'le uvhiyn: «Hoora, Zı ğu əq'ənaqa, menne milletbışde k'anyaqa g'axıles».

22 Mankilqamee Paulıl k'ırı iliyxhenbışe ts'ir ha'a gibğıl, eyhen:

– İnəxrına ç'iyene aq'vaylecar hakkal hı'ı, ak'an ha'as ıkkan! Məxrıng'uqa ine dyunyel ciga deşda!

23 Manbışe p'laşbı g'ayşu, ts'irbışika yicbı g'uvoxhara'a, tooz xəybışeeqa dağa'a. 24 K'omandiree əmr haa'a, Paul g'aleeqa ıkkeeva. Nya'asiy manbışe ts'irbı ha'ava ats'axhxhesdemee, mang'us çümqbı ı'xiyxə, qidghınbı ha'as ıkkiykan. 25 Mang'us çümqbı ı'xəsva iyt'almee, Paulee maa'ar ulyorzulyne vəşing'une xərıng'uk'le eyhen:

– Məhkama ilydyakkiyne Roomayne vatandaşis şoqa çümqbı ı'xəsda icaaza vobnane?

26 Vəşing'une xərıng'uk'le man g'ayxhımee, mana zaara k'omandirısqa qarı, eyhen:

– Ğu ha'an hucoona? İna Roomayna vatandaş vor.

27 K'omandir Paulısqa qarı, qiyghanan:

– Eyhelan, ğu Roomayna vatandaşne?

Paulee eyhen:

– Ho'o.

28 K'omandiree eyhen:

– İne vatandaşiyvalinemee zı k'ılda pıl deş huvu.

Pauleeme eyhen:

– Zı yedike ıxhayng'acar Roomayna vatandaş ıxha.

29 Mang'us çümqbı ı'xəs vukkananbı zaraba mang'usse avayk'ananbı. K'omandirık'le vucee ayt'leva uvhuna insan Roomayna vatandaşva ats'axhxhamee, mana qəyq'ənna.

30 Qinne yiğıl k'omandirıs Yahudeeşe nena bınahiy Paulne gardanaqa gyuvxhes vukkanva, yugda ats'axhxhes ıkkiykan. Mançil-allad k'omandiree Paulın g'elybı-xıleppı eeqeva eyhe. Qiyğab mang'vee əmr haa'a, gırgın ç'ak'ın kaahinariy Aali Şuura savaalecen. Paul qali'ı, manbışde ögilqa qığayhe.