1 Maqa sabıyne Aali Şuuraynbışiqa ilyakkı, Paulee eyhen:

– Çocar, zı g'iyniyne yiğılqamee, Allahne ögil məttına ı'mı'r hav'u.

2 Xənne kaahinee Xananyee Paulne k'ane ulyobzuriynbışilqa əmr haa'a, mang'une ghales ı'xeva. 3 Mançile qiyğa Paulee mang'uk'le eyhen:

– Ğu q'öbvalla haa'a, Allaheecad vas ı'xəs! Zı Q'aanunus sik'ı muhaakima ha'asva, ğu inyaa gyu'ur. Sayid Q'aanunun uvhiyn hidi'ı, zı geteva əmr hoole.

4 K'ane ulyobzuriynbışe mang'uk'le eyhen:

– Ğu Allahne xənne kaahinıkane hoka?

5 Paulee eyhen:

– Çocar, zak'le mana xərna kaahin ıxhaycad ats'a deşdiy. Muq'addasne Otk'unee «milletne xərıng'une hək'ee pisın cuvab immeyheva»* otk'un vod.

6 Manbışin sabarabı sadukeyar, mansanbıb fariseyar* vuxhay ats'a-ats'a, Paulee ts'irıka Aali Şuurayk'le eyhen:

– Çocar, zı fariseyna dix farisey vor! Hapt'ıynbı üç'üb qeepxhesva umud haa'ava, zı g'iyna muhaakima ha'a!

7 Paulee manva uvhuyle qiyğa fariseyariy sadukeyar qooda giviyğal. Maqa sabıynbı q'öne cigeeqa bit'al vooxhe. 8 (Sadukeyaaşe eyhe ıxha, üç'üb qeepxhayniy, malaaikarniy, rı'hbıniy, məxdın karbı deşinbı. Fariseyaaşemee mançine gırgınçilqa inyam ha'a ıxha.)

9 Manke maa'ad ts'irbı geed qeedaxhe. Sabara fariseyaaşiken Q'aanunun mə'əllimar mansanbışika maa'ab qoodu, eyhen:

– İng'ul nəxbınacab bınah g'ooce deş. Sayid mang'uka rı'hme, malaaikme yuşan hı'ı?

10 Manbışin qoodiy manimee geed qexhe, manbışe Paul qoda'ava k'omandir qəyq'ənna. Mang'vee eskeraaşilqa əmr haa'a, ikkeepç'ı, Paul manbışde xılençe g'ayşu, g'aleeqa qıkkeeva.

11 Mane xəmde Xərna I'sa Paulıs gyagu, eyhen:

– Yik'eka ixhe! Zı həməxüd ha'as, ğu İyerusalim Yizde hək'ee hav'una xhineena şahaadat, Roomeeyib haa'asda.

12 Qinne yiğıl Yahuder sabı, Paul gik'asmee vuççud otxhun-ulydyoğasva k'ınbı g'iysar. 13 Mana gik'as vukkananbı yoq'ts'alile (40) geeb vooxhe. 14 Man insanar sabı, kaahinaaşine ç'ak'ınbışisqayiy ağsaqqalaaşisqa abı, eyhen:

– Şi k'ınbı g'aysır vod, Paul gik'asmee, vuççud otxhun-ulydyoğasva. 15 Həşde şu Aali Şuurayka sacigee Paulne işiqa yugba ilyaakasva k'omandirık'le mana şosqa ayreva eyhe. Paul inyaqa hixharasse, şi mana gik'asda.

16 Paulne yiçeyne dixek'le man ats'axhxha, g'aleeqa arı, man Paulılqa hixhar ha'a.

17 Manke Paulee vəşing'una xərna qort'ul, eyhen:

– İna mek'vna k'omandirısqa ıkkee, mang'uqa eyhesın cuvabıd.

18 Vəşing'une xərıng'vee mek'vna k'omandirısqa ıkkı, eyhen:

– Aqqıyne Paulee zı qort'ul uvhiyn, ina mek'vna vasqa ıkkee. Mang'uqa vak'le eyhesın cuvabıd.

19 K'omandiree mek'vna xıleke aqqı, sa suralqa qıkkı, qiyghanan:

– Zak'le hucoona eyhes ıkkan?

20 Mek'vung'vee eyhen:

– Yahudeeşiqa inəxübna fıkır vob, Paulne işiqa yugba ilyaakasva, manbışe vak'le mana g'iyqa Aali Şuureeqa ayreva eyhes. 21 Ğume manbışde cuvabıl k'ırı ilymiyxhe, yoq'ts'alile hexxana insan mana gik'asva dyuguleepxha vob. Manbışe k'ın g'aysır vod, mana gidek'u vuççud otxhun-ulydyoğasva. Manbışis saccu ğu man hı'ı ıkkan.

22 K'omandiree mang'uk'le inəxüd eyhe:

– Ğu man zak'le uvhuva, şavuk'lecad immeyhe.

Qiyğar gade yəqqı'l ha'a.

23 K'omandiree q'öyre vəşing'una xərna qopt'ul, eyhen:

– Exheeqana sə'ət yüç'ünçus Kaysariyeeqa vüqqəsva q'öd vəş (200) esker, yights'al (70) balkannana esker, q'öd vəşir nizeykana esker see'e. 24 Paulısdab balkan able, mang'uk vuççud dexha mane cigayne xərıng'usqa, Feliksıqa, mana hixhar he'e.

25 Qiyğad inəxüd kağızee oyk'an:

26 «Geer ıkkanna mane cigayna xərna Feliks, vas Klavdi Lisiyke salam vuxhena!

27 Mana insan Yahudeeşis aqqı, gik'as ıkkan. Zak'le mana Roomayna vatandaşva ats'axhxhamee, zı zaara g'oşunuka hirxhılyna, mana g'attixhan hı'ına. 28 Mang'une gardanaqa nena bınahiy gyuvxhes vukkanva vaats'a vuxhesdemee, zı mana Yahudeeşine Aali Şuurayne ögilqa qığavhu. 29 Zak'le ats'axhxhayn, manbışe mang'une gardanaqa cone Q'aanunus sik'ıyn karbı vod gixhxhes ıkkan. Mang'veeme vuc zindanee aqqasıniy gik'asın vuççud hı'ı deşud. 30 Mana gik'as ıkkanva zalqa hixhar hı'ımee, zı mana zaara vasqa g'axuvu. Yahudeeşik'led mang'une gardanaqa gixhxhes ıkkanan kar vas yuşan he'ecenva uvhu».

31 Eskeraaşe cok'le uvhiyn hı'ı, xəmde Paul alyart'u, Antipatris eyhene şahareeqa qıkkekka. 32 Qinne yiğıl manbışe mana balkanaaşil aleepxıynbışika yəqqı'l hı'ı, co İyerusalimeene g'aleeqa siviyk'al. 33 Balkanılin eskerar Kaysariyeeqa hipxhırmee, kağızıd Paulır mane cigayne xərıng'usqa qele. 34 Mane cigayne xərıng'vee, kağız qətqı'yle qiyğa, Paulıke nençenava qiyghan. Mana Kilikiyeençena vorva ats'axhxhamee, 35 eyhen:

– Yiğne gardanaqa kar gixhxhes ıkkananbı abımee, zı yiğne işiqa ilyakkasda.

Mançile qiyğab əmr haa'a, Paul Hirodne g'alee aqqecenva.