1 G'attipxhıniyle qiyğa şak'le mane adayn do Malytava ats'axhxha. 2 Mane cigayn insanar şaka geeb yugba vuxha. Gyoğiy gyoğava mık'adava manbışe ts'a qavhu, şi çisqa qopt'ul. 3 Paulee sa xhıleedın çirpiy alyaat'u, ts'ayeeqa dağadaççe. Manke ts'ayıne yissyaxaalike mançe zəhərnana xoçe qığevç'u, mang'une xılek git'viyq'an. 4 Mane cigayne insanaaşik'le mang'une xılek xoçe git'ipq'ın g'avcumee, sana-sang'uk'le eyhen:

– Hək'erar, mang'vee insanır gik'u. Deryaheençe g'attirxhıneeyir, qəl qığaahane ilaahee mang'us cazaa hoolenacab, ı'mı'r haa'as havaysar deş.

5 Pauleeme xıl g'uvooxhar hı'ı, xoçe ts'ayeeqa g'a'abaççe, mançin Paulık vuççud ha'a deş. 6 İnsanaaşe gozet ha'a ıxhayn, Paulık hucooyiy ixhes: mang'un tan əlt'əxəsee, deşxhee, mana sayangara qukkyork'ul qik'as? Manbışe geed gozet ha'a, mang'uk vuççud dexhe g'acumee, manbışe fıkırbı badal hav'u, eyhen: «Mana sa allahır».

7 Mane cigayne k'anençeğana Publiyn ciga ıxha, mane adayne xərıng'un. Mana cune xaa şaka yugra ıxha, şi xhebılle yiğna mang'une xaa avxu. 8 Publiyna dek mane gahıl ık'ar tyulee ıxha, mana arğançe gyorxhan vuxhun əlyhəə g'alirxhu ıxha. Paul ık'arang'usqana qıxha, düə haa'a, xıleppı mang'ulqa gixhxhı, mana yug qa'ana. 9 Maane milletık'le man g'acumee, maabın gırgın vuk'aranbı mang'usqa abı, yug qeebaxhe vuxha. 10 Manbışe şas geeb hı'rmat hav'u. Şi gamıyka əlyhəəme, manbışe şas yəqqı's ıkkanan karbı adı.

11 Xhebne vuzale şi İskandariyeençene «Dioskurar»* donane gamıyka yəqqı'lqa qığeepç'ı. Man gamıd q'ı'dmına Malyta eyhene adee axu ıxha. 12 Sirakuza eyhene şahareeqa hipxhır, xhebılle yiğna maa'ab avxu. 13 Şi mançeb gamıyka deryahne mıglen Regium eyhene şahareeqa qabı. Qinne yiğıl canubıle aa'a gibğılyne mıtsıne kumagıka Puteol eyhene şahareeqa hipxhır. 14 Maa'ab şasqa qızaaxiyne imannanbışe, coka sa ülycümna aaxveva uvhu. Mançile qiyğa qabı Roomayne suralqa apk'ın. 15 Şi ablesva ats'ane Roomeen imannanbı yişde ögilqava Appi Bazarva eyhene cigeeqayiy Xhebılle Gostinitsava eyhene cigeeqa abı. Paulık'le manbı g'avcumee, Allahılqa şukur haa'a, mang'un yik'ıd cigeeqa qayle. 16 Şi Roomeeqa qabı hipxhırmee, Paulısqa curayra axvas haysarna. Mang'uqa saccu sa esker mang'uka ilyakkasda axva.

17 Xhebne yiğıle Paulee Yahudeeşin maa'ab vooxhen ç'ak'ınbı cusqa qoot'al. Manbı sacigeeqa sabıyle qiyğa, Paulee manbışik'le eyhen:

– Çocar, yişde milletıs, dekkaaşine ədatbışis idyvaak'an vuççud hide'eeyid İyerusalim zı aqqı, Roomabışde xılyaqa quvu. 18 Zı gik'asın vuççud hidi'inçil-alla, manbışe zake qidghınbı hı'iyle qiyğa, g'aykkasniy ıkkan. 19 Yahudeeşis man ıkkiykın deş, manke zı nyaqame ixhesda axu, imperatorne məhkamalqa ghal aaqı. Zı man gırgın yizde milletne gardanaqa bınah gyuvxhesva deş hı'ı. 20 Zı şu g'iyna qopt'uluynbı, şu g'avcu, gafbı ha'asva. İzrailyne milletın umud Haa'ang'unemee, Masihnemee, zas in zincirbı ı'xı'.

21 Manbışe Paulık'le eyhen:

– Yahudeyayeençe şalqa nəxdıncad kağız qadı deş, mançe qabıyne çocaaşed yiğne hək'ee şak'le pisın kar uvhu deş. 22 Şak'le yiğın fıkırbı vake g'ayxhes ıkkan. Şak'le ats'an gırgınəəng'ə insanaaşe mane tariq'atne hək'ee yugdacad yuşan ha'a deş.

23 Sa yiğıl, yuşaneepxhayn xhinne, mançileb geeb insanar Paulne xaaqa abayle. Paulee mane yiğıl miç'eediyle exhalilqamee, Allahne Paççahiyvaline hək'eena şahaadat hav'u. Mısayne Q'aanunuked, Peyğambaraaşine otk'uninçiker yuşan hı'ı, manbı I'says iman ha'as qopt'ul. 24 Manbışde sabaranbışe mang'vee uvhiynçil inyam ha'an, sabaranbışed inyam ha'a deş. 25 Sana-sang'vee eyhençilqa qidyabı, cureebaxhemee, Paulee manbışik'le eyhen:

– Muq'addasne Rı'hı'n Yeşaya peyğambarıleğana vuşde dekkaaşik'le qotkuda 26 uvhiynniy:

«Hoora, ine milletılqa in hixhar he'e:

„G'ayxhiylette g'ayxhesın, şolqame man hixharas deş,

ilyaakiylette ilyaakasınbı, şok'leme man g'aces deş".

27 İne milletın yik'bı g'ayelqa satk'ıl,

k'ırıbışik'le dağamda g'iyxhe, uleppı gyatxıynbı,

uleppışika g'ımececenva, k'ırıbışika g'imiyxhecenva,

yik'bışikad mats'amexhecenva,

Zalqab siviyk'al deş, Zı co yug qee'ecenva»*.

28,29 Həşde şok'le ats'axhxhe, Allahın in g'attivxhan hav'iy menne milletbışis g'axuvu, manbışed mançil k'ırı alixhxhesın.

30 Paul Roomee q'ölle senna axva, vucee kiranıs aqqıyne cigee, mang'vee cusqa abıyn gırgınbı cusqa saa'a vuxha. 31 Mana nişilecar qı'dərq'ı'n Allahne Paccahiyvalineyiy Xərne I'sa Masihne hək'ee xət qa'a ıxha. Man hıma'ava mang'uk'le şavaacad eyhe ıxha deş.