1 Paulıkeyiy Timoteyke I'sa Masihne nukaraaşike,

Filippı eyhene şaharee vooxhene Allahne insanaaşilqa, manbışde ç'ak'ınbışilqayiy manbışis kumag ha'anbışilqa – gırgıne I'sa Masihıka sananbışilqa, salam!

2 Allahıke, Yişde Dekkıkeyiy Xərne I'sa Masihıke şos yugvallayiy barakat vuxhena.

3 Zı şu mısa yik'el qavaalyav'ee, zı yizde Allahılqa şukur haa'a. 4 Zı gırgıne gahbışil düə haa'a Allahıke kar heqqamee, vuşde gırgıng'unemee şadda heqqa. 5 Ts'ettiyne yiğıle g'iyniyne yiğılqamee, Yugna Xabar insanaaşilqa hivxhar haa'asdemee şu zaka vuxha. 6 Zak'le yugda ats'a, Şavaayiy şoleğana mana yugna iş givğalav'u, Mang'veeyib mana iş I'sa Masih qalesde yiğılqamee haa'asda.

7 Vuşde gırgıng'une hək'ee məxbına fıkır hav'uy zak avaak'ı vod. Şu gırgınbı yizde yik'ee vobunbı. Zı aqqı ixheeyir, məhkamee zı Yugna Xabar qopkunava eyhe ixheeyir, şu zaka sacigee Allahıke yugun alyaat'a. 8 Allah yizda Şahad vorna, zas nəxüriy şoka axvas ıkkan. Zas şu I'sa Masihıs xhinne vukkan.

9 Zı düə haa'ana, şos sana-sanbı sık'ılbab geeb vukkiykınecen, Allahın işbı şok'le ats'axhxhecen, man gırgın işbı şolqa yugda hixhrecen. 10 Manke şok'le inekke yugun ats'axhxhesın, şu Masih qalesde yiğıl məttıba vuxhes, vuşde gardanaqa şavussecadıd vuççud givaxanas əxəs deş. 11 Şu, I'sa Masihıleğana Allahıs şukur hav'u, qopkuvalin şagav alles. Məxür şu Allah axtı qa'as.

12 Çocar, in zas şok'le ats'axhxha ıkkan, yizde vuk'lelqa qadıynçin Yugna Xabar hivxhar hav'uy sık'ılbab ögilqa vukku. 13 Həşde gırgıne imperatorne g'aravulyçeeşik'led çikana, gırgıng'uk'lecad ats'axhxhayn, zı Masihıl-alla aqqı. 14 Zı aqqıva çocaaşin gellesınbışin Rəbbilqan iman it'umxhayn, həşde manbı qı'dəpq'ı'n, yik'eka Allahın cuvab hixhar ha'a.

15 Hək'en uvhee, sabaranbışe paxılıyvalin, zas qəlas, sabaranbışer Masih yik'eençe qıvaats'a'a. 16 Sabaranbışe man zı ıkkanva ha'a, manbışik'le ats'an, məhkamee zı Yugne Xabarın sura aqqasva ixhes. 17 Sabaranbışe Masih yik'eençe deş qıvaats'a'a. Manbışe zas qəlas, co haagvasva ha'a. Manbışis zı aqqıyne cigee zas sık'ılbab geeb əq'üba hevles vukkan. 18 Mançike hucoona? Manbışiqa qotkuynbı, horbışikan, nəxdınbı ıxhay fıkırbı hasre ixhecen. Hasre saccu manbışe Masih qıvaats'e'ecen. Zınar mançile şadra vor, qiyğar şadxhesda. 19 Zak'le ats'an, yizde vuk'lelqa qalesın gırgın yugda ç'əvxhes. Vuşde düəbışikayiy I'sa Masihne Rı'hı'ne kumaagıka zı g'attixhanasda.

20 Zas geed ıkkan, umudub haa'ana, zas nişikecad naş qixhes deş, gırgıne gahbışilib g'iyniyn xhinne, zı it'umra, yik'eka ixhes. Zaleğana Masih, yizde canee can ixheeyid, zı qik'veeyir hı'rmatıka ixhecen. 21 Yizdemee, ı'mı'r Masih vobna, qik'uyme karana ıxhay vodun. 22 İne tanee zı ı'mı'r haa'asxhee, zasse yugun işbı g'aces əxəsınbı. Mançil-allad zı hucoome g'əxəs, zak'le ats'a deş. 23 Zı q'önesana suralqa ts'ıts'a'ana. Yizde yik'eençe inçe ark'ın Masihıka ıxhay vodun. Man gırgınçile yugda vod. 24 Vuşdemeeme, yizın üç'ürra axuy yugda vod. 25 Zak'le man yugda ats'a: vuşda şadvallayiy iman geed qixhecenva, zı üç'ürra axu, şosqa qales. 26 Manke, sayır zı şosqa qarımee, şosse zal-alla I'sa Masihıs şukur haa'as vəəxə.

27 Hucoo ıxhay ixhecen, şu vuşda ı'mı'r Masihne Yugne Xabarıs sik'ı hee'e. Zı arı, şu g'avceeyib, zı ittyarı, vuşde hək'ee g'ayxheeyid, hasre zak'le ats'axhxhecen vuşun yik'bı sa vodunbı. Zas ıkkanan, şu sacigee, mıga-mıgays huvu, Yugne Xabarılqa iman hı'ı, eskerar xhinne it'umba ulyoozrecen. 28 Şolqa g'elil qeepxhaynbışileb qı'məəq'ən. Man manbışdemee, manbışikın ixhesva işaarat ixhes, vuşdemeeme, şu g'attivxhanasınbıva işaarat ixhes. Man gırgın Allahıke vodun. 29 Şos saccu Masihıs iman hı'iycad deş huvu, Mang'ul-alla əq'üba ts'ıts'av'iyid huvuyn. 30 Şok'le ats'an, zı həşder dağamiyvalee vor. Şolqad zalqa xhinne dağamiyvallabı qadı.