1 Zas geeb vukkanan, g'avces vukkanan çocar, şu yizda şadvalla, yizde vuk'len tac vobınbı. Rəbbine yəqqə it'umba ulyoozre!

2 Evodiya, Sintixiya, zı şolqa miz k'yaa'a, hucoone ixhes, Rəbbinemee sa fıkrelqa qudoora. 3 Yizda hək'ena kumagçiy, hucoona ixhes, ine zəiyfabışis cuvabılqa qavaales kumag he'e. Manbışe Klementıkayiy menne yizde kumagçeeşika sacigee, mıga-mıgays huvu, Yugna Xabar insanaaşilqa hivxhar haa'as zas kumag hı'ı. Manbışde gırgınbışin dobı I'mrene kitabee otk'un vod.

4 Rəbbinemee gırgıne gahbışil şadeepxhe! Sayid eyhen, şadeepxhe! 5 Hasre vuşun g'üvənan yik'bı gırgıne insanaaşik'le ats'a ixhecen. Xərna Masih sık'ınne gahıle sak'alasda. 6 Nişinacab hımaa'a, gırgıne gahbışil düəbı ha'a, şukur haa'a, Allahıke heqqe. 7 Manke Allahee şu abğançe opxhanan fıkırbı, şu I'sa Masihılqa iman ha'ava, ak'an ha'asınbı. Man insanne vuk'leeqa kideç'esın kar vod.

8 Nekke qiyğab, çocar, şu qopkuvalina, salehiyvalina, məttıvalina, Allahıs ıkkanançina, yugunçine, kaamilyvalina hee'e. 9 Zake xət qıxhayn, alyaat'uyn, g'ayxhiyn, zake g'acuyn hucooyiy vod, şu man he'e. Manke abğançe opxhanan fıkırbı ak'an ha'ana Allah şoka ixhes.

10 Şu yizda meeb haa'a gibğılva, Rəbbee zas yik'eençena şadvalla huvu. Şu yizda ögilycab haa'a vuxheeyib, şosse man hagvas əxı' deş. 11 Zaqa kara deşva deş, inbı eyhe. Zı nəxbına vuxhay ı'mı'r hav'eeyib, mançile şadxhes zas xət qıxhayn. 12 Zak'le kar deşiyvallab, gırgın gyatsts'ı-gixhxhı ıxhayid ats'an. Ats'ı ixheeyir, mıssıra ixheeyir, gyatsts'ı-gixhxhı ixheeyir, kar deşiyvalee ixheeyir, nəxür ixheeyir, zı şadra ıxhayne sirrılqa hirxhılyna. 13 Zas guc hoolene Masihne kumaagıka zasse gırgınçis öörxəs əxə.

14 Şu yugda hı'ı, zalqa abına ver q'öna qav'u. 15 Filippğançenbı, şok'lecad ats'an, zı Yugna Xabar hivxhar haa'a girğılymee, Makedoniyeençe qığeç'uyng'a, şole ğayrı, Masihılqa iman ha'anbışde neng'veecad zas pılıka kumag hı'ı deş. 16 Zaqa Salonikee kar deşdang'ad, şu zas q'önəqqees kumag g'axuvu. 17 Zı manva şoke hucoomecad alyaat'as ıkkanva deş eyhe. Zas saccu ıkkanan, şu vuşde yugne işbışil-alla geeb barakat alept'ecen. 18 Şu Epafroditika g'axuvuyn karbı zı alyaat'uynbı. Man yugda eva qöön ətir xhinneyiy Allahıs vukkanna, yik'eençena q'urban xhinne vob. Zaqa həşde gırgın hexxaalika vodun. 19 Şos g'idiyxharan gırgın kar, yizde Allahee Cune g'ıdyaat'ane karake I'sa Masihıleğana helecen!

20 Hasre yişde Dekkıs, Allahıs, gırgıne gahbışil şukur vuxhena! Aamin!

21 I'sa Masihılqa iman ha'ane gırgınbışis salam vuxhena. Zakane çocaaşeb şos salam g'uxoole. 22 Gırgıne Allahne insanaaşe, inekke geebıb imperatorne xaa iş g'oocenbışe şos salam g'ıxoole.

23 Xərne I'sa Masihna yugvalla vuşde yik'ee vuxhecen.