1 Alikkı-gikkiy g'ats'atk'uniyle qiyğa Paulee telebabı qopt'ul, yik'bı hele. Qiyğar manbışika xüvə arxhu, Makedoniyelqa ı'qqəsva yəqqı'l gexha. 2 Mane surabışil iykır, imannanbışika geed gafbı hı'ı, manbışis yik'bı huvu mançer Yunanıstanqa arayle. 3 Maa'ar mana xheyible vazna axva. Mang'us Suriyelqa deryahne yəqqı'n ı'qqəs ıkkanmee, Yahudeeşis mana gik'as ıkkiykan. Man ats'axhxha, mana Makedoniyeylek'ena sak'alas ıkkiykan. 4 Pirna dix Beriyeençena Sopater, Salonikbışda eyxhena Aristarxiy Sekund, Derbeğançena Gay, Timotey, Asiyebışda Tixikiy Trofim mang'uka havayk'an. 5 Manbı şale ögee hapk'ın, şi Troasee gozet haa'a. 6 Şinab ilydyadıyne gıneybışde bayramıle qiyğa, Filippı eyhene şahareençe deryahne yəqqı'n xhone yiğee Troasaqa abı, manbışisqa qabı. Maa'ab yighılle yiğna aaxva.

7 Ülycümne ts'ettiyne yiğıl gıney oxhanasva sacigeeqa sabıyne gahıl, Paulee cəmə'ətıka gaf haa'a. Qinne yiğıl mang'us əlyhəəs ıkkan ıxhayke, manbışda gaf xəm suraqqamee ts'ıts'ooxhe. 8 Şi sabıyne oone gozee geed bazirbıyiy gyotxhan. 9 Eftix donana sa mek'vna g'uleeyiy gyu'ur. Paulna gaf xıliyba ts'ıts'avxhamee, Eftix k'orane nik'eeqa ayk'an. Nik'eeqa ark'ınmee, xhebıd'esde martabeençe mana avqa g'e'exhxha. Mana ç'iyele oza qı'ımee, mana qik'u eyxhe. 10 Paul avqa giç'u, mek'vung'ulqa k'yorzul, mana xhılibışeeqa sı'ı, eyhen:

– Qı'məəq'ən, mana üç'ürra vor.

11 Paul meer ooqa ılqeç'u, gıney oyxhan. Verığ ılqevç'esmee, manbışika xıliyn gafbı hı'ı, yəqqı'l gexha. 12 Mana mek'vna gader xaaqa üç'ürra qıkkı, gırgınbıb geeb şadeebaxhenbı.

13 Şi ögilqa apk'ın, gameeqa gyuv'ur, Assos eyhene şaharne suralqa avayk'an. Şas Paul mançeniy alyart'u, gameeqa gya'as ıkkan. Cus iykar Assoseeqa əlyhəəs ıkkanva, vuceeniy şak'le məxüd he'eva uvhu. 14 Mana Assosee yişde ögilqa arımee, şi mana gameeqa gi'ı, Mitilena eyhene şahareeqa qabı. 15 Mançeb gamıykacab qinne yiğıys Xiosne adeeqa qabı hipxhır. Qinne yiğıysıb şi qabı hipxhıriynbı Samosne adeeqa. Sa yiğıleb şi Milet eyhene şahareeqa qabı, hipxhır. 16 Paulıs Asiyel vaxt avaak'anaa'as devkanva, Efesqa ikkideç'ucar ayk'an. Mang'us zaara Xhots'al'esde Yiğıne bayramıs* İyerusalimqa hixharasniy ıkkan.

17 Paulee Miletğançe Efeseeqa xabar g'axuvu, I'sayne ummatın ağsaqqalar cusqa qopt'ul. 18 K'anyaqa abımee manbışik'le inəxüd eyhe:

– Asiyelqa zı g'el gixhxhiyne yiğıle, zıcar zı nəxüriy şoqa ıkkıva şok'lecad ats'an. 19 Yahudeeşis zalqa ver ablyaa'as vukkiykıneeyib, dağamiyvalybışiqa ilydyakkı, zı Rəbbis vuk'ul avqa k'epçı, uleppı nağın gyatsts'ı, g'ullux hav'u. 20 Yugun gırgın kar zı şoke dyugul hidi'ı, xət qı'ı, şolqa man hixhar hı'ı. Man zı gırgıng'uk'le g'iyxhe-g'iyxhe, xaybışeeqar hark'ın, uvhu. 21 Yahudeeşik'leyiy menne milletınbışik'le bınahbışike xıl ts'ıts'av'u, Allahılqa savk'leva, Xərne I'salqa iman he'eva uvhu. 22 Həşder zı Muq'addasne Rı'hen hort'ul İyerusalimeeqa ı'qqə, yizde vuk'lelqa qalesınıd zak'le ats'a deş. 23 Muq'addasne Rı'hen gırgıne şaharbışee zas xabar hoole, zı ayt'ıl, zas əq'übabı helesva. 24 Zasme yizda ı'mı'r qiviykkan deş, zı mançis q'iymatıb hoole deş. Saccu zas yizda yəq yugba ç'əvəə'əs vukkan: zas Xərne I'see huvuna g'ullux, Allahna yugvalla haagvana Yugna Xabarna şahaadat hivxhar haa'as vukkan.

25 Həşde zak'le ats'an, vuşde gırgıng'uka şavukayiy zı yuşan hı'ı, şavuk'leyiy zı Allahne Paççahiyvaline hək'ee uvhu, zı mısacar g'aces deş. 26 Mançil-allad zı şolqa g'iyna g'ayxha'an: vuşde neng'veemecad Xərne I'sayle aq'va sak'al hı'ı, g'ıttidirxhınee, zal bınah aaxvas deş. 27 Zı vuççud dyugul hidi'ı, Allahıs ıkkanan gırgın şolqa hixhar hı'iyn. 28 Şoqa yugba ilyaake, Muq'addasne Rı'hı'n şu ç'ak'ınbı xhinne gyuvxhiyne syurunuqa yugba ilyaake. Man syuru, Cune Dixena eb k'yav'u, Allahee xılel qı'iyn ummat vodun. 29 Zak'le ats'an, zı ark'ıniyle qiyğa syuruneeqa rəhı'm deşin umulybı atk'vas. 30 Vuşde yı'q'neecab qotkuyn badal hı'ı eyhen, telebabı coqab qihna hopt'ul quvkees vukkanan insanar vuxhes. 31 Mançil-allab muğurba vuxhe. Xhebılle senna, manzil dena, yiğbına, xəmbına nağ g'aa'a, zı şos xət qı'iynbı eyhenbı yik'el qale'e. 32 Həşdiyle zı şu Allahısiy Mang'une yugvaline cuvabıs g'alyaa'a. Mane cuvabıka vuşun rı'h gucuka ixhes. Manke Allahee Cune muq'addasne milletıs hevlesva uvhuna şosseb alyapt'as vəəxə. 33 Yizda ul şavnecab k'ınəəğəyl, nuk'rayl, tanalinçil avxu deş. 34 Şok'lecad ats'an, zı yizde xıleka zasınıd zakanbışisınıd g'ık hı'ı. 35 Zı ha'ane gırgıne karee, zı şos misal haagu: iş haa'a şi guc deşinbışis kumag ha'as ıkkan. Şi Xərne I'sayn in cuvab yik'el hixan hidya'as ıkkan: «Kar helena insan, alyaat'ang'ule baxtivarra vor».

36 Paulee man uvhuyle qiyğa, gırgıng'uka sacigee q'aratsabışil gyu'ur, düə haa'a. 37 Qiyğa gırgınbı gyaaşe-gyaaşe Paul xhılibışeeqa sı'ı, mang'us ubbabı ha'a. 38 Manbışe nekke geed «zı şok'le mısacar g'aces deşva» cuvabıle aq'va qa'a. Qiyğar mana gamıysqamee yəqqı'l araççe.