1 Mane yiğbışil telebabı geeb qeebaxhene gahıl, yunanne mizel yuşan haa'ane iman ha'anbışe cühüt'ne mizel yuşan haa'ane iman ha'anbışile şikayat haa'a giviyğal. Cone sip'ıreeşis otxhanan kar k'ılda heleva, manbışe şikayat haa'a giviyğal. 2 Mançil-allad Yits'ıq'vəne xərne telebee gırgın telebabı sacigeeqa sav'u, eyhen:

– Şasse Allahın cuvab g'aleççu, otxhanne karana haa'as dəəxə. 3 Çocar, vuşde yı'q'nee hı'rmatnana, Rı'hı'kayiy k'orane ək'elika gyatsts'ına yighıyre insan g'əyxe, manbı mane işilqa gyuvxhe. 4 Şimee gırgıne gahbışil düəbı ha'a-ha'a, Allahın cuvab insanaaşilqa hixhar ha'as.

5 Man eyhenbı gırgıne sabıynbışde yik'eençe eyxhe. Stefan (mana imanıka Muq'addasne Rı'hı'ka gyatsts'ına insan ıxha), Filip, Proxor, Nikanor, Timon, Parmen, Antakya'eençena Nikola g'əəxə. Nikolaee ögeecad Yahudeeşin dinniy alyaat'u, qiyğar mana I'sayne telebabışda sa ıxha. 6 Manbı Masihne ç'ak'ıne telebabışde ögilqa qığaa'a. Telebabışeb düə hav'u, manbı mane işilqa giviyxheva, manbışil ooqa xıl giyxhe.

7 Allahın cuvabıd geedne insanaaşilqa hiyxhar, İyerusalimeeyib telebabı geeb qeebaxhe, gellesın kaahinarıb mane imanılqa siviyk'al.

8 Allahne yugvalika, gucuka gyatsts'ıne Stefanee milletne yı'q'nee ç'ak'ın əlaamatbı, gorsatmabı hagva. 9 Stefanıka «g'attivxhan hav'uyne nukaraaşina» (mançik'le manvaniy eyhen) sinagogeençene cühüt'yaaşe xıliyn ha'a giviyğal. İn insanar Kirenayeençe, İskandariyeençe, Kilikiyeençe, Asiyeençe vuxha. 10 Stefanıs Muq'addas Rı'hı'n huvuyne k'orane ək'elyne ögil manbışisse ulyoozaras vəəxə deş. 11 Manke manbışe sa-q'öyre insan inəxüd eyhecenva mizel avqaaqqa: «Şak'le Stefanee Mısayneyiy Allahne hək'ee karaı'dəən karbı eyhe g'ayxhı».

12 Manbışe məxüb milletıd, ağsaqqalarıb, Q'aanun mə'əllimarıb Stefanılqa g'elil qaa'a. Manbı k'yophur, Stefan aqqı, Aali Şuureenbışde ögeeqa qarayle. 13 Abıyn horalay şahadar mang'une aq'val ulyobzur, eyhen:

– İne insanee ghal sidi'ı, ine muq'addasne Allahne Xaanayiy Q'aanunulena haa'a. 14 Şak'le, mang'vee eyhe, g'ayxhiyn: «Nazaretğançene I'see, in muq'addasın Allahın Xav hı'ğəkkar hı'ı, Mısayle axuyn ədatbı badala'asınbıva».

15 Aali Şuuree gyuv'uriynbı Stefanne aq'vayqa yugba ilyaakımee, mang'un aq'va malaaikne aq'vayk akar g'ece.