1 Sa yiğıl Pyoturiy Yəhye yiğniyığın sə'ət xheyiblenang'a, düəyne gahıl Allahne Xaasqa abayle. 2 Mane gahıl maqa yedikecar k'aara ıxhana sa adamiy arayle. Mana yiğıscar Uftanınbıva eyhene akkabışisqa arı, g'alyaraççe ıxha. Mang'vee vüqqə-qöönbışike k'ap'ik'ar sa'a ıxha. 3 Allahne Xaasqana qöön Pyoturiy Yəhye g'avcu, mang'vee manbışike k'ap'ik' heqqa. 4 Pyoturiy Yəhye mang'uqa t'ot'ar xhinne ilyaaka. Pyoturee mang'uk'le eyhen:

– Şaka ilekke.

5 Mana insan manbışika manbışe kar helesın xhinne ilyakka. 6 Pyoturee mang'uk'le eyhen:

– Zaqa k'ınəəğəyiy nuk'ra deşin vas helesın. Zaqa hucooyiy vod vasıd man hele. Nazaretğançene I'sa Masihne doyuka oza, iykre.

7 Qiyğar sağne xıleke aqqı, oza qa'ana. Mane insanın mı'q'lebıyiy g'elin xhanebı it'umeedaxhenbı. 8 Mana g'ork'ul g'elil qıxha, iykar giyğal. Mana iykar-iykar, g'oyk'al-g'oyk'al Allahıs şukur haa'a, manbışika sacigee Allahne Xaasqa qarayle. 9 Gırgıne milletık'le g'ecen, mana insan iykarır, Allahısıb şukurub haa'a. 10 Mana Allahne Xaane Uftanne akkabışisne gyu'ur k'ap'ik'ar sa'ana ıxhay, qıvaats'ıynbı ghalybı aaqı aaxva.

11 Mana insan Pyoturukeyiy Yəhyeyke əq'əna qexhe deş. Ghalybı aaqı avxuyn insanar manbışde suralqana, paççah Sıleymanne doyulyne daxayk avqa g'adaaxhvan. 12 Man g'acu, Pyoturee milletık'le eyhen:

– İzrailybı inyaa curayn hucooyiy? Nya'a t'ot'ar xhinne şaqa ilyaaka? İttehesu şi yişde gucukayee, yişde mu'muniyvalikayee mana g'elil qı'ı. 13 İbrıhımne, I'saq'ne, Yaaq'ubne Allahee, yişde dekkaaşine Allahee Mang'una nukar I'sa qıvaats'a'ana. Şu Mana Pilatne xılyaqa quvu, mang'veeyir Mana gik'ecenva. Pilatıs Mana g'aykkas ıkkiykıneeyır, şu mançis «ho'ova» eyhe deş. 14 Şume Muq'addasnayiy Qorkuna şoke əq'əna qı'ı, insan gik'unamee g'aykkeva uvhu. 15 Şu ı'mı'r İpxhınna gik'u, Allaheeme Mana hapt'ıynbışde yı'q'neençe üç'ür qı'ı. Şi mançin şahadar vob. 16 Şok'le g'ecena, ats'ana ina insan I'sayleğana, Mang'une doyulqane imanıka gırgıng'une ulene ögil yug qıxha.

17 Çocar, zak'le ats'an, şunad, vuşde ç'ak'ınbışed man dyats'a hı'ı. 18 Allahee gırgıne Cune peyğambaraaşine ghalika, Cune Masihee əzaab ts'ıts'aa'asva ögeecad uvhiyn, ıxhayn.

19 Bınahbı haklecenva bınahbışike xıl ts'ıts'ee'e, Allahılqa savk'le. 20 Havaasre Rəbbike vaxxariyvalla quvooracen, Mang'veeyir vuşdemee ögilycar Masih ixhesva g'əyxı'na I'sa g'axılecen.

21 Allahee gırgın qa'asda gah qavaalyaa'asmee, Allahee ögilycad Cune muq'addasne peyğambaraaşine ghalika uvhuna gah qavaalesmee, I'sa xəə axvas ıkkan. 22 Mısee inəxüdniy uvhu:

«Vuşde Allahee Rəbbee vuşdecar insanaaşike

zına xhineena peyğambar g'axıles.

Şunad Mang'vee hucooyiy uvhu k'ırı alixhxhe.

23 Mane Peyğambarıl k'ırı ilydiyxhına insan

cune milletne yı'q'neençe g'e'eşşu mang'ukun ha'asın».*

24 Şamuel peyğambarıle otçu, gırgıne peyğambaraaşe mane yiğbışde hək'ee uvhu. 25 Şunab peyğambaraaşike g'abıynbı vob, Allahee vuşde dideeşika g'ats'apk'ınne mugaavileyn varisbı vob. Allahee İbrıhımık'le uvhiynniy:

«Ç'iyene aq'valyne gırgıne milletbışe

vake G'arıyng'uke xayir-düə alyapt'as».*

26 Allahee vuşun gırgınbı pisde işbışike savk'al hav'u, xayir-düə hevlesva, Cuna nukar I'sa üç'ür qı'ı, ts'erra vuşde k'anyaqa g'axuvu.