1 Agrippee Paulık'le eyhen:

– Həşde vasse val bınah devxhay eyhes əxə.

Paulee xıl hotku, eyhen:

2 – Paççah Agrippa, zı şadra vor, g'iyna yiğne ögil zal bınah deşdava eyhes. Yahudeeşe nişilycab-alla zalqa bınah qaa'a. 3 Vak'le gırgın Yahudeeşin ədatbı, aldatxhuniybı yugda ats'anbı. Mançil-allad, hucoona ixhes, zal yugda k'ırı alixhxhe.

4 Gırgıne Yahudeeşik'le, zı yizde milletne yı'q'neeyiy İyerusalimee k'ılyvalile otçu g'iyniyne yiğılqamee, hav'una ı'mı'r yugba vaats'a. 5 Zı şenkecarniy manbışik'le ats'a. Manbışis ıkkiykıneeyid zı fariseyaaşe xhineena ı'mı'r hav'uva şahaadat haa'as vəəxə. Fariseyar yişde dinıl nekke it'umba ulyobzuriynbıniy vob. 6 G'iyname zı məhkamayne ögil ulyorzulyna Allahee yişde dekkaaşis huvuyne cuvabılqane umudnemee. 7 Yişde milletne yits'ıq'vəne (12) nasılenıd xəmıqa-yiğıqa ilydyaakı, Allahıs yik'eençe g'ullux ha'a-ha'a, mane cuvabılqa umud haa'a. Paççah, Yahudeeşe zı mane yizde umudul-alla muhaakima ha'a. 8 Nya'a şu, Allahee hapt'ıynbı üç'üb qaa'asva uvhuyka, dexhesde karaqa xhinne ilyaaka?

9 Hək'en uvheene, zasqad şenke həməxüdniy qaylen, Nazaretğançene I'sayn do k'ane qıdi'iynemee, xılençe qöön ha'as ıkkan. 10 İyerusalimeeyid zı manniyxhe ha'an. Ç'ak'ıne kaahinaaşine cuvabıka zı nimeen I'salqa iman haa'anbıne aqa akkyav'u, manbı gyapt'eva sesıd helenniy. 11 Manbışe con iman g'aleççecenva, zı manbışis cazaabı sinagogbışee geedniy helenbı. Zı manimeeniy bəç'ər qıxha, manbışiqa qihna menne ölkabışde şaharbışeeyir gexhananiy.

12 Yiğbışde sa yiğıl ç'ak'ıne kaahinaaşe zas yəq huvu, zı mane işis Damask'eeqa hark'ın. 13 Paççah, yı'q'ı'hna gah vooxheyiy, şi yəqniy əlyhəə vob. Mane gahıl xəənçe zalqayiy zakanbışilqa gırgıne surabışile işix gitxhu, man işix verığıled xəttayiy. 14 Yişin gırgınbı ç'iyelqa qukk'yopk'ul. Zak'le ses g'ayxhı, mançin zak'le cühüt'yaaşine mizel eyheyiy: «Şaul, Şaul, nya'a ğu Zalqa yiğbı allya'a? Bizıne sives mık' üvxüyke vas yugda ixhes deş». 15 Zı uvhiyn: «Xərna, Ğu vuşune?» Xərıng'vee alidghıniy quvu: «Zı I'sa vorna, ğu Zalqa yiğbı allya'a. 16 Həşde oza, g'elil qixhe. Zı vas gyaguna, vake Zas nukar ha'as. Ğu, Zı vak'le haguneyiy hagvasde karbışda şahad ixhes. 17 Zı ğu yiğne milletneyiy menne milletbışde xılençe g'attixhan ha'asda. Zı ğu mane milletbışisqa g'ıxelena, 18 manbışin uleppı aaqı, manbı miç'axiyvaleençe nurulqa, iblisıkeb Allahılqa savaak'al hee'ecenva. Manke Zalqa iman hı'iyka manbışde bınahbışile ılyheepç'esınbıniy, manbıb muq'addasne milletınbıniy vuxhes».

19 Paççah Agrippa, zasse mane xəənçe gyaguynçine cuvabıke qığeç'es əxı' deş. 20 Zı ts'eppa Damask' vooxhenbışik'le, qiyğad İyerusalimneyiy Yahudayne cigabışee vooxhenbışik'le, nekke qiyğad menne milletınbışik'le eyhe ıxha: «Bınahbışike xıl ts'ıts'av'u, Allahılqa savk'le. Qotkuyn işbı he'e, şu bınahıke xıl ts'ıts'av'uy hagve». 21 Yahudeeşis mançil-allar zı Allahne Xaasne aqqı, gik'as ıkkiykın. 22 Allaheeme zas g'iyniyne yiğılqamee kumag ha'an. Mançil-allar g'iyna zasse inyaa'ar ulyorzul, k'ıning'ule otçu xərıng'ulqamee şahaadat haa'as əxən. Zı eyhenbı, Mıseeyiy menne peyğambaraaşe ögilycad ixhesva uvhiyne karbışile ğayrı medın kar deş vod. 23 Manbışe uvhiyn: «Masihee əq'üba ts'ıts'aa'as, hapt'ı üç'üb qeebaxhenbışda ts'erriyna ixhes, Cune milletık'led, menne milletbışik'led nur qadıva eyhes».

24 Paulee məxüd cun sura aqqaqqamee, Festee axtıda eyhen:

– Paul, ğu bəç'əraaşin karbı vod eyhe! Geed qətqiyke yiğna ək'elib apk'ın!

25 Paulee eyhen:

– Geer ıkkanna Fest, zı bəç'əraaşin karbı deş eyhe, qotkuyn, hək'en cuvab yuşan ha'a. 26 Paççah Agrippayk'le man gırgın ats'an, mançil-allar zı mang'uka yik'eka yuşan ha'a. Zak'le ats'an, mançin nencad paççahıke hixu deş. Man işbı xhoşşebışee g'ecen işbı deş ıxha. 27 Paççah, ğu peyğambaraaşe uvhiynçilqa inyam ha'anne? Zak'le ats'an, ğu inyam ha'an.

28 Agrippee Paulık'le eyhen:

– İne sık'ınne gahee, vas zakerne Masihne yəqqı'lyna ha'as ıkkan?

29 Paulee eyhen:

– Sık'ınna gah vuxheeyib, geeb gah vuxheeyib, zı Allahıke heqqan, saccu ğu deş, g'iyna zal k'ırı iliyxhen gırgın insanar, ine zincirbışile ğayrı, zak akaraba vuxhecen!

30 Paççah Agrippa, Fest, Bernika oza qeebaxhe, manbışika sacigeeyib coka gyuv'uriynbı oza qeebaxhe. 31 Manbı g'aqa qığeepç'ı, sana-sang'uk'le eyhen:

– İne insanee vuc aqqasın, gik'asın vuççud ha'a deşud.

32 Agrippee Festık'le eyhen:

– İne insanıs imperatorne məhkamays ghal aaqas diykıninxhiy, mana g'aykkas eyxheyiy.