1 Pyoturiy Yəhye milletıka yuşan haa’amee, manbışisqa kaahinar, Allahne Xaane g’aravulyçeeşina xərna, sayib sadukeyar*4:1 sadukeyar: Sadukeyar I’sayne gahılin dindarar vuxha. Sadukeyaaşe malaaikariy cinar vodva inyam ha’a ıxha deş. Manbışe hapt’ıynbı üç’üb qeepxhesva inyam ha’a ıxha deş. Aali Şuuree manbışiqa cigabı ıxha. abayle. 2 Telebabışe hapt’ıynbı I’sayleğana üç’üb qeepxhesvaniy milletıs xət qa’a. Abıynbışik’le mana gaf g’avxhu, əəq’ənbı. 3 Manbışe Pyoturiy Yəhye avqu, exhaliyna gah vuxhayke qinne yiğılqamee zindaneeqa akkyaa’a. 4 Manbışe yuşan ha’an g’ayxhiyne gellenbışe iman ha’a. Məxüb iman ha’an adamer xhod aazırılqa hiviyxhar.

5 Qinne yiğıl Yahudeeşin ç’ak’ınbı, ağsaqqalar, Q’aanunun mə’əllimar İyerusalimqa savayle. 6 Xərna kaahin Hannan, Kayafa, Yəhye, İskandariy xənne kaahinne nasılen sabaranbı maa’ab vuxha. 7 Pyoturiy Yəhye manbışde ögilqa qığav’u, qiyghanan:

– Şu man nene gucukane, şavne doyukane ha’a?

8 Manke Pyotur Muq’addasne Rı’hı’ka gyatsts’ı, eyhen:

– Milletın ç’ak’ınbıyiy ağsaqqalar! 9 G’iyna şi sa ık’arne insanıs hav’une yugvalil-alla alidghıniy qeqqa. Mana nəxüriy yug qıxhava qiyghan. 10 Şok’leyiy gırgıne İzrailyne milletık’le ats’axhxhecen! İna insan şu çarmıxılqa ts’ıts’ı’ıne, Allaheeme hapt’ıynbışde yı’q’neençe üç’ür qı’ıne Nazaretğançene I’sa Masihne doyuka vuşde ögil yug qıxha ulyorzul. 11 I’sa şena

«G’aye vob. Şu, ustadaaşe, Mana əq’əna qav’una.

Manamee gırgın aqqaqqane g’ayelqa sark’ıl».*4:11 İnva Zabur kitabee (117:22) otk’un vod.

12 Mang’ule ğayrı şavukecad g’attipxhıniy deşin. Xəək avud insanaaşis huvuyn medın do deşin, mançileğana g’attivxhnecenva.

13 Manbışik’le Pyoturiy Yəhye qı’dəəq’ən g’avcumee, manbı məxbıncab, qı’dətqiyn insanar vuxhay ats’axhxhamee, maabın gırgınbı ghal aaqı aaxva. Qiyğa manbı qıvaats’anbı, I’sayka ı’ğviykaran insanar vuxhay. 14 Yug qıxhana insan Pyoturukayiy Yəhyeyka sacigee manbışde ulene ögil ulyorzul ıxha. Mançil-allad maabınbışisse manbışik’le vuççud eyhes əxə deş. 15 Manbışe telebabışilqa Aali Şuureençe*4:15 Aali Şuura: cühüt’yaaşine Aali Şuuree yights’al (70) insan ıxha. Manbı kaahinar, Q’aanunun mə’əllimar, qıvaats’ıyn insanar vuxha. qığeepç’eva əmr hav’uyle qiyğa, cone əree mısləhətbı hı’ı, eyhen:

16 – İne insanaaşik hucoona ha’as? Gırgıne İyerusalimne milletık’le manbışe xədın əlaamat haguva ats’an, şasse man gardanaqa ilydyaat’as dəxə. 17 Mana gaf milletne yı’q’nee qığmooç’ecenva, qudoora, şi manbı qəvəəq’ən haa’as. G’iyniyke şaqa man Do ağmiş hı’ı, şavuk’lecad vuççud immeyhecen.

18 Qiyğa manbışe Pyoturiy Yəhye aqa qopt’ul, manbışilqa əmr haa’a: I’sayn do ağmiş hı’ı, I’sayne doyule xət qı’iy q’adağanda vod.

19 Pyotureeyiy Yəhyee manbışis alidghıniy quvu eyhen:

– Şucad şak’le eyhe, Allahıl deş, şol k’ırı alixhxhiy nimee qotkudayiy? 20 Şasse g’acu-g’ayxhiynbı itteyhes dəxə.

21 Aali Şuurayne insanaaşisse manbışis cazaa hevles dəəxəva, manbı qəvəəq’ən hav’u, g’ookkanbı. Gırgıne milletıncar ıxhayne karbışil-alla Allah axtı qa’a ıxha. 22 Mane əlaamatıka yug qıxhayne insanıqa yoq’ts’alile (40) geed sen ıxha.

23 Pyoturiy Yəhye g’avkkumee, manbı conbışisqa qabı, ç’ak’ıne kaahinaaşeyiy ağsaqqalaaşe uvhiynbı manbışis yuşan ha’a. 24 Hambazaaşik’le man eyhenbı g’ayxhımee, gırgınbışe sayangada Allahılqa ona’a:

– Perverdigar, xəv, ç’iye, deryah, dyunyeyne adın gırgın itxhınna Ğu vor.

25 Muq’addasne Rı’hı’leğana Yiğne nukarık’le yişde dekkıne Davudne mizeka Ğu inəxüd uvhu:

«Nişil-allane milletbı g’elil qeedaxhe?

Nişil-allane manbışe cosse dəxəsde karbışda haa’a?

26 Dyunyeyn paççahar savayle, vuk’lek vukkekkanbı

Rəbbilqayiy Mang’vee g’əyxı’ng’ulqa, paççahılqa, g’elil qeebaxhe».*4:26 İnva Zabur kitabee (2:1-2) otk’un vod.

27 Hək’erar, ine şaharee Hirodiy Ponti Pilat, medın milletbı, İzrailyne milletıka sacigee, Ğu g’əyxı’yne, Yiğne muq’addasne Nukarılqa I’salqa g’elil qeepxha. 28 Ğu ögilycad Yiğne gucuka q’arar huvuyn xhinne, manbışe hı’iyn. 29 Həşde Rəbb, Ğu manbışde qəvəəq’ən hav’iyka ilekke! Şas, Yiğne nukaraaşis, guc hevle, Yiğın cuvab yik’eka insanaaşilqa hixhar ha’as. 30 Yiğne gucuka meeb vuk’aranbı yug qee’e, muq’addasne Yiğne Nukarne I’sayne doyuka əlaamatbı, gorsatmabı hagve.

31 Manbışe düəbı hı’ı ç’əveepxhamee, manbı sabıyn ciga ı’ğiykar. Maabınbışin gırgınbı Muq’addasne Rı’hı’ka gyavts’u, Allahın cuvab insanaaşilqa yik’eka hixhar ha’a giviyğal.

32 Gırgıne imannanbışin yik’bıyiy fıkırbı sa ıxha. Şavaacad cune karak’le «in yizın vodva» eyhe deş, coqa vodun gırgıng’unemee ıxha. 33 Ç’ak’ıne telebabışe Allahee, Yişda Xərna I’sa üç’ür qıxhava xənne gucuka şahaadat haa’a vuxha. Allaheeyib Cuna xayir-düə manbışis gırgıng’us geeb-geeb hoole vuxha. 34 Manbışiqa kar deşda ıxha deş. Xaybınanbışe, cigabınanbışe manbı massa huvu, çike ıxhayn pıl adı 35 Masihne ç’ak’ıne telebabışisqa qele ıxha. Mane pılıke neng’uqayiy kar g’idiyxhar, məxrıng’us hele ıxha. 36 Leviyne nasılena, Kiprıl yedike ıxhana, Yusuf donana sa adamiy ıxha. Masihne ç’ak’ıne telebabışe mang’us Barnabava do hele. Mane doyuna mə’na «yik’bı helena» vod. 37 Mang’vee cun ciga massa huvu, pıl qadı ç’ak’ıne telebabışisqa qele.