Números 11

İzrailybışe Rəbbilena haa’a

1 Millet əq’übeeqa gitxhuva, manbışe Rəbbilena haa’a. Man g’ayxhı Rəbbee it’umba qəl hav’u. Rəbbin ts’a manbı aaxvane cigayne nekke mıglekne çadırbışik qexha. 2 Milletıncad Mısalqa ona’a giyğal. Mısee düə hav’umee, ts’a k’ədəqqən.

3 Rəbbin ts’a ma’ad qitxhuva, mane cigayn do Tavera (gyotxhuniy) axva.

İzrailybışis çuru ıkkiykan

4 Manbışika vooxhene menne cigabışeençe qabıynbışin napsbı geed qeedaxhe. İzrailybı manbışika sacigee gyaaşe-gyaaşe eyhen:

– Şaqad oxhanasın çuruxhiy ıxhayn! 5 Şi həşdilqamee Misir q’ərad otxhanan baluğar, xiyarar, g’avumar, sipaa, ç’eç’ey, arnaa yik’el qalyaa’an. 6 Həşde şi k’yapt’iynbı. Şak’le mannayle ğayrı vuççud g’ece deş.

7 Manna vuc k’aşnişne toxumek akar vuxha, rangıd cagvarada xhinne ıxha. 8 İnsanaaşe mana sav’u, vuxheene xılelyne yöxxeençe qığaa’a vuxha, devxheeneb dibakee gyoota vuxha. Manbışe mana k’umk’umeeyib qooxhar vuxha, kokaybıd ha’a ıxha. Mana zeytunne q’ışee ç’əra qav’uyne kokayk akaraba vuxha. 9 Xəmde ı’xı’yne çiyıka manna İzrailybınane cigee qığooç’e vuxha.

Yights’al (70) ağsaqqal

10 Mısayk’le gırgın xizanbı, milletcad cone çadırne ghalee geşşe g’iyxhe. Rəbbis mançike it’umna qəl vuxha. Mıseeyid mançis aq’va qa’a. 11 Mısee Rəbbik’le eyhen:

– Nişil-allane Ğu zas inəxübna əq’üba hoole? Nya’a zı Yiğne ulen aqqı dişde, Ğu inimeene milletın zalqa yuk alixhxhı? 12 Nya’a, zakene in millet g’adı? Nya’a, zıne manbı vuxu? Ğu k’ın g’assır yişde dekkaaşis hevlesva uvhiyne cigabışeeqa, nya’a manbı zasqa uşax gyoqa’ane xhunaşşe uşax aqqıyn xhinne, avqu quvkees ulyookka? 13 Nençene zı inimeen millet ats’ya’asın çuru ha’as? Manbı zasnee «Şas çuru heleva» gyaaşenbı. 14 Zassecad inemeene milletın yuk haqqas əxə deş, yizda mançilqa guc höö deş. 15 Ğu meed zak ögilin xhinne ha’asxhee, zalqa ablesda ver zak’le g’avcesse, hucoone ixhes, Vas zı sik’ırra ixheeyir ıkkanxhe yizın can həşdecad alişşe.

16 Rəbbee Mısayk’le eyhen:

– Vak’le İzrailin ç’ak’ınbı xhinne vaats’an, Zasqa yights’al (70) ağsaqqal ayre. Hasre manbı vakasana abı Rəbbika yuşanaa’ane çadırne ögil ulyoozrecen. 17 Zı giç’u vaka ma’ar yuşan ha’as. Zı valyne Yizde Rı’hı’ke alyaat’u, manbışisıd helesın, manbışed vaka sacigee milletın yuk ts’ıts’ecenva. Valqacad milletın yuk gimexhecenva, manbışe vas kumag ha’asın. 18 Milletık’le eyhe: «„Çuruxhiy ıxhayn oxhanasınva, Misircad yugdayiyva" şu gyaaşe-gyaaşe eyhen, Rəbbik’le g’ayxhiyn! G’iyqiys gicəpxı' vuxhecen, çuru oxhanas. 19 Şu man sa yiğna, q’öne yiğna, xhone yiğna, yits’ne yiğna, g’ane yiğna deş oxhanas. 20 Şu man bıkırne vazna quşeençe qalesmee, avts’u həlyvəq’ənasmee oxhanas. Şu vuşde yı’q’neene Rəbbilqa yı’q' sak’al hı’ı, Mang’une ögil gyaaşe-gyaaşe uvhuva: „Şi nişisne Misirğançe qığeepç’ı!"»

21 Mısee eyhen:

– Həşde yizde k’ane yixhıd vəş aazır (600 000) adamiy vor, Ğunad eyhen: «Zı manbışis sa vazna avts’esin çuru heles!» 22 Nya’a, gırgın çavra-vəq’ə gyat’veeyid manbı aats’eye? Nya’a, deryaheedın gırgın baluğ aqqeeyid manbı aats’eye?

23 Rəbbee Mısayk’le eyhen:

– Nya’a Rəbbin xıl cit’adane vod? Həşde vak’le g’acesın Zı vak’le uvhiynbı eyxheye, dişee.

24 Mısee qığeç’u Rəbbin cuvab insanaaşilqa hixhara’a. Mang’vee milletne ağsaqqalaaşike yights’al (70) insan sı’ı, Rəbbika yuşanaa’ane çadırne hiqiy-alla giviyk’an. 25 Mane gahıl Rəbb buludne dirakee giç’u, Mısayka yuşan ha’a. Mang’ulyne Allahne Rı’hı’ke alyaat’u, yights’alyne (70) ağsaqqalıs hele. Manbışilqa Rı’h gixı’mee, manbı Allahıken peyğambarar xhinne yuşan haa’a giviyğal. Sabara gah ılğevç’uyle qiyğab manbışda peyğambariyvalla ç’əvooxhena.

26 Eldadiy Medad donan q’öyre insan, co vooxhene cigeecab avxu. Manbı ağsaqqalaaşika sacigee opk’un vuxheyib, manbı Allahne çadırısqa qığeebaç’e deş. Allahın Rı’h manbışilqad geç’en, manbışeb co aaxvane cigee peyğambariyvalla haa’ana. 27 Sa cehil Mısaysqa g’adarxhun eyhen:

– Eldadeyiy Medadee co aaxvane cigee peyğambariyvalla vob haa’a.

28 Mek’vranang’acad Mısays kumag ha’a girğılyne Nunne dixee Yeşuee Mısayk’le eyhen:

– Yizda xərna, manbı ulyoozar hee’e!

29 Mısee mang’us inəxdun cuvab qele:

– Zı ıkkanalinne, man yiğne yik’ek qet’u? Zasmee ıkkaniy Rəbbee cune milletne gırgıng’ulqa Cun Rı’h g’axuvu, gırgıng’uke peyğambarar hee’ecen!

30 Qiyğa Mısar İzrailin ağsaqqalarıb çadırbı gı’xı’yne cigeeqa siviyk’al.

Rəbbee bilydirçinar gıxele

31 Rəbbee deryahıle g’axuvuyne mıtsın çadırbı gı’xhı’yne cigeeqa bilydirçinar adayle. Manbı aaxvane cigayne hiqiy-alla q’öne xılekkumne axtıvallee, sa yiğna əlyhəəsdemeene yəqqə bilydirçinar gırgınəəng’ə gyoku eyxhe. 32 Mane yiğıl miç’eediyle otçu xəmdilqamee, xəmdeb çikana, qinne yiğılib insanar bilydirçinar sa’a vuxha. Nekke k’ılda sı’ıng’vee yits’ıble xəbna ç’emç’e sav’u vuxha. Manbışe bilydirçinar co aaxvane cigayne hiqiy-alla gyoka. 33 Çuru manbışde ghalyaqa hitxhır yic gyeç’esse, Rəbb milletılqa it’umra qəllamişexhena. Manbışilqa hapt’asın ık’ar salat’a’a.

34 Naps geednanbı maa’ab k’evxhuva, mane cigalqa Qivrot-Hattaava (naps geednanbışin nyaq’vbı) do giyxhe.

35 Millet Qivrot-Hattaavançe ayk’anan. Manbı Xatseroteeqa qabı maayib aaxvanbı.