1 G'aravulyçiy xhinne ulyozarasda,

g'aleeqa ılqeç'u, ulyozarasda.

İlyakkas, Rəbbee zak'le hucooyiy eyhes,

ilyakkas, yizde şikayatbışis nen alidghıniyiy qeles?

2 Rəbbee zas inəxdın alidghıniy quvu:

«Vas dyaguyn ok'ne, yugda g'ayebışil ok'ne.

Hasre gırgıng'usse man vaxxariyda qətqəs əxecen.

3 İn vas dyaguyn sabara gahıle ixhes.

Mançin gırgın kar nəxüdiy ç'əvxhesva eyhe,

mançin hor deş ha'a.

Man sabara gahna dexheeyid, gozet he'e,

man qıdyadı axvas deş,

man çine gahıl qalesın.

4 İne ooğançe-avqa ilyaakanbışiqa ilyaake:

manbışin rı'h qotkuyn deş vod,

qorkung'veeme cune imanıl-alla ı'mı'r haa'as.

5 Mane ooğançe-avqa ilyaakanbışis çaxıren horbı ha'a,

man insanar vuççud hidi'ı ulyoozaras deş.

Manbışde mıssıne ules ıkkanan ahal xhinne xət qexhe,

hapt'ıy xhinne ayts'e deş.

Manbışe gırgın milletbı col k'ırı alixhxhes ilekka,

gırgın milletbı əsirna alyaat'a.

6 Əsirna alyapt'ıynbışe manbı demalqa gyuvxhes,

manbışde hək'ee yik'ek qetan anekdotbı eyhes:

„Con deşin, cone xılelqa alğayhenbışik,

şib alyaat'u, karanbı vooxhenbışik vay ixhesınbı!"

Man mısılqameene ixhes?

7 Şos şib helenbı sa yiğıl g'elil qeepxhes dişde?

Muğur qeepxha, şu qəvəəq'ən haa'as dişde?

Mane gahıl şu manbışde k'onalqa savaak'alas.

8 Şu geed milletbı q'əra qı'ı,

şu insanaaşina eb k'yav'u,

ölkabışilqayiy şaharbışilqa, maa'ab vooxhenbışilqa geed yiğbı alli'ı.

Mançil-allab milletbışike üç'übba avxuynbışeb şu q'əra qaa'as.

9 Xaybı haramne karaka gyatsts'ı'iynbışik,

ver ımmalecenva, akvaa axtıne cigabışee ali'iynbışik vay ixhesınbı!

10 Şu geed milletbı gyatxıyka vuşun xav k'ap'ik'ıle avqa qı'ı.

Şu mançina bınah ı'mreka qevles.

11 Çabırbışeene g'ayebışe mançil-alla ts'ir haa'as,

alaxaraaşe mançis alidghıniy qeles!

12 Şahar ebal alyav'uynbışik,

mana pisvalika it'um qav'uynbışik vay ixhesınbı!

13 İnsanaaşe q'ərane cigee cocab-co oozar haa'as.

Milletbışe hı'iyn gırgın ts'ayee gyoxhxhanas.

Man gırgın Xəəne G'oşunbışde Xərıng'vee, Rəbbee ixhesva uvhu!

14 Deryahbışee xhyan geednan xhinne,

insanaaşik'led gırgınəəng'ə Rəbbine xəbvaline hək'ee geed ats'axhxhes.

15 Mebınbışin ts'elen tanbı g'acesva,

manbışis qəlın çaxır ulyoğu'ı,

p'iyan haa'anbışik vay ixhesınbı.

16 Hı'rmatne cigee, şu k'ap'ik'ıle avqa qeepxhes,

həşde şunad ulyoğe, ts'elen cigabı hagve.

Rəbbine sağne xılen qəlın gyatsts'ıyn k'ola, şolqad hixharasın.

Vuşun aq'va-xhane gyotxhuniy, qıvaats'ıyvaliled geed qixhes.

17 Şu Livanee zulum huvu, həyvanar gyat'u,

insanaaşinab eb k'yav'u, ölkabışilqayiy şaharbışilqa,

maa'ab vooxhene gırgıng'ulqa ver ablyav'u.

Man vuşded vuk'lelqa qalesın, şu mançile qəvəəq'ənasınbı.

18 Ustadee hoots'une, k'yav'uyne byutuke, hucoo xayirne?

Mançin horcad xət qa'a.

Byut hav'une ustadee çilqa umud haa'a,

yicme miz deşin kar vod.

19 Q'uvayk'le „Muğur qixhe!"

miz deşde g'ayeyk'le „Oza!"

eyhene insanık vay ixhesın!

Byutusse yəq haagvas vəəxəye?

Haane mançil oğa k'ınəəğəyiy nuk'ra ixheeyid,

çine adme ı'mren nafasıd deşin.

20 Rəbbme Cune muq'addasne Xaa vor,

hasre dyunyeyncad Mang'une ögil nıq'bı aqqecen!»