Habacuque 1

1 Allahee Cus ıkkanan Habaquq peyğambarıs gyagva’a.

Habaquqna ts’eppiyna şikayat

2 Mısılqameene Rəbb zı Ğu kumagıs qot’alas,

Vak’leme man g’iyxhe deş?

«Hopç’un-g’opç’uniy vodva» zı Valqa ts’ir haa’a,

Ğume şi g’attivxhan haa’a deş.

3 Nya’a Ğu zak’le verbı hagva?

Nəxürne Ğu pisde karas öörəxə?

Nyaqa ilyakkee, hopç’un-g’opç’uniy, hı’ğəkkar hı’iy vod,

saç’uvkiyiy uğoodiy ç’əvexhecad deş.

4 Mançil-allab Q’aanunuqa guc avxu deş,

qopkuvallab apk’ınna.

Pisınbışe qopkuynbı xuda avqu,

mançil-allad qotkuyn məhkamabı eyxhe deş.

Rəbbin alidghıniy

5 Menne milletbışiqa ilyaake,

g’acuynçike ghalybı aaqı aaxve.

Vuşde gahıl Zı məxdın işbı g’aces,

man şos yuşan he’eeyid, şu hayeepxhes deş.

6 Haane, Zı Baabil eyhene ölkeençe

Xaldeyarva eyhen millet g’elil qaa’a.

Man dyunyeyn aq’vavolle hoyharan,

menne milletbışin cigabı aqqaqqan,

g’ayeyn yik’nan, gissara’as dexhen millet vod.

7 Gırgınbıcab manbışile qəvəyq’ənanbı,

qopkuvallayiy q’aanun co eyhena vob.

8 Manbışin balkanar bahalın umulybıyiy

gepardbı xhinne zarada g’adayxhvan,

Manbışin balkanaaşil aleepxıynbı əq’ənançe qöö,

q’aacir çis aqqas ıkkanne karalqa zaraba qöön xhinne, qöö vob.

9 Manbı g’ayşes, q’əra qaa’asva qöö.

Manbı sahreençe aa’ana it’umna mıts xhinne inyaqa qöö vobunbı.

Əsirna avquynbı manbışe g’um xhinne saa’a.

10 Paççahaaşile manbışe əqənabı ha’a,

ç’ak’ınbı manbışe demalqa giviyxhe.

G’alabınan şaharbı matsxar ha’a,

mançine hiqiy-alla nyaq’v k’yav’u, manbı aqqaqqanbı.

11 Manbı mıts xhinne qabı-ılğeepç’ı avayk’an.

Manbışe cone gucuk’le allahva eyhe.

Mançil-alla mane milletıl bınah aaxvas.

Habaquqna q’öb’esda şikayat

12 Rəbb, yizda Allah, gırgıne gahbışil vorna Ğu dişde vor?

Yizda Muq’addasna, Ğu gırgıne gahbışilycar ixhesda.

Rəbb, şas cazaa hevlesva, Ğu manbı g’əvxü.

Yişin Ganz, Ğu manbı şalqa g’uxoole.

13 Yiğın uleppı geed məttıda vod, Vak’le pisın g’ımece vod.

Pisde karas Vasse öörxəs əxə deş.

Xayaanat ha’anbışiqa Ğu nəxürna ilyakka?

Pisınbışe cole yugunbışda vuk’ul opxhanmee,

nya’a Ğu nıq' qığdyayhe?

14 Ğu insanar deryahbışeene baluğaaşik akar qav’u.

Ç’ak’ınbı deşde hadağvane karbışik akar hav’u.

15 Duşmanaaşe manbışin gırgınbı baluğar xhinee g’armaxıka ts’ıts’aa’a,

toreeqa sav’u, alqaa’a.

Manbı mançile şadeebaxhenbı.

16 Mançil-allab manbışe cone torbışis q’urban ablyaa’a,

ətirbı gyoxhxhan ha’a.

Mane torbışil-alla manbışiqa geed otxhuniy eyxhe,

coyub gyavts’u-gyuvxhu vooxhe.

17 Manbışe tor mısılqameene haç’a’as,

milletbı rəhı’m dena gılıncıke alğaa’as?