Jonas 4

Yunusee qəl haa’a

1 Yunusus man diykın, qəlın qoxa eyxhe. 2 Mang’vee Rəbbis inəxübna düə haa’a:

– Ya Rəbb, zı hamanva nya’a xaanang’acar dişdiy uvhu? Mançil-allar zı Tarşişeeqaniy hixu. Zak’le ats’anniy Yiğna yugvalla avayk’an deş, Ğu rəhı’mnana, xədın sabırnana, ablyaa’asva uvhuna ver, ablyaa’as devkanna Allah vor. 3 Rəbb, hucoone ixhes, həşdiyle yizın can alişşe, zas ı’mı’r haa’as vukkan deş, qik’as ıkkan.

4 Rəbbee mang’uk’le eyhen:

– Deşxhee, vas mançike geebne qəl vuxha?

5 Yunus qığeç’u şaharne şargne sural giy’ar. Ma’ad mang’vee cusun verığ qıdyoot’asın xhinnen cigad ali’ı, şaharık hucooyiy ixhesva ilyakka giy’arna. 6 Rəbb Allahee, Yunusus yugda ixhecenva, maa’ad əq gyaahasın sa ala aleylya’a. Yunus man ala g’acu geer şadexhena. 7 Qinne yiğıl miç’eeqana mane alalqa Allahee mı’q g’ıxoolee. Mane mı’qən ala adğançe otxhunmee, ala qeqqvan. 8 Verığ ılqevç’umee, Allahee maqa kar qeqqva’ana g’ümana mıts g’ıxoole. Verığın mang’una vuk’ul gyooxhanav’u, mana sa curay qa’a girğılymee, mang’vee cus qik’uy heqqa:

– Zas ı’mı’r haa’as vukkan deş, qik’as ıkkan!

9 Allaheeme Yunusuk’le eyhen:

– Deşxhee, vas alayl-alla geebne qəl vuxha?

Yunusee eyhen:

– Ho’o! Zas qik’asda xhinnena qəl vuxha!

10 Rəbbee mang’uk’le eyhen:

– Ğu idezuyn, ğu ilydyakkıyn sa xəmne əəre alyadı-qeqquyn ala vas qiykkan! 11 Nəxübne Zas qidivkvanas manimee xəbna Nineva eyhena şahar, maadın vəşşe g’alle aazır (120 000) sağıy sol dyats’an milletiy manimeen çavra-vəq’ə?