1 Ni mu buuna, me tondi ti benu liyaaba bunene bu mudiingu wu me ndi mu undwana mu tooni a benu, na mu tooni a bisu Lawodise na mu tooni a boosi ba bakini a baamoni hiinzi hya me ve. 2 Me tondi ti mitima mya bo miluula mu ibahala, mana bo baaba itwadi mu litondo. Me tondi ti bo baluula mu busina bwa hiitu hi hibaamata mu nzaabili a mbuli, mana bo bayaaba tswehi yi liyobolo la Nzambi. Tswehi mo, ni Kristo nde mwakulu. 3 Mu nde siha, hwasweme busina bwosi bwa tsiki na bwa nzaabili a Nzambi. 4 Me ndi mu undeele benu lo, mana pasi muutu aveledungasa benu mu bileedi bya soho. 5 Tso me peli na benu mu musunya, me ndi na benu mu matsimi. Na me ndi na kinya mu umono benu mu uhwada, na uba ba baabama mu imiinu hi benu lili na hyo mu Kristo.

6 Ni mu buuna, bu benu laayaka Kristo Yisu we Pfumu a benu, baani ba laakangama mu nde mu idiingu hya benu. 7 Menaani manganzi mu nde na tungaani idiingu hya benu hyoosi mu nde. Baani likanda mu imiinu, we bu hu li ndongisili yi benu laayaka, na baafutalaani matondo ma malahi huli Nzambi.

8 Kelaani muutu a hapfuta benu mu mikuma mya soho, mi mapfuta na mi myavele lisuunga. Mikuma mi myateleme ŋa yulu bukulu bwa baatu, na ŋa yulu a ndongisili a baandu ya baatu ba tsi*, ka a mu Kristo ve. 9 Mu tooni ati, Nzambi li, nde woosi mutso a nyutu a Kristo. 10 Na ni mu nde benu laayaka byosi mu iteesi hi hyakuha. Nde li pfumu a pasi lituma na pasi matwala.

11 Mu itwadi hya na nde, baaketi benu. Ka a mu ketili a myoho mya baatu ve, ka ketili yi yaamata huli Kristo. Na nde li mu uyobolo bisu mu ma mali mu ubita bisu mu masumu. 12 Ni mu buuna, ŋa baatondihi benu, baadiihi benu na Kristo, mana benu lisuuha kaka na nde mu babaakwa. Mu tooni ati, benu laamiisa imiinu mu matwala ma Nzambi ma maasuuli nde ŋa hati la babaakwa. 13 Hutsomi, benu laaba we ba baakwa mu tooni bubi bwa benu. Benu laaba ba baavelekete, bangoyi. Ka bunuubu, Nzambi miifutala benu moonyi na Kristo. Bu nde haasiidi buuna, nde amiinyahula bubi bwa bisu a benu bwosi. 14 Nde amiifwinzala muhanda mikele wu akakese bisu, mikele mi myaakabelese bisu. Nde amiikasula muhanda mo wuuna, na ukomene nde ŋa kuruwa. 15 Ni buuna nde avudimisi mifudi na mavupu bya banga lituma na banga matwala. Nde amweesi bo tsonyi ŋa kuungi la baatu, bu nde haabiti bo we bakondayi mutso a koonge a mbiingili a Mwana a nde.

16 Buuna, a lisiingasa pasi muutu atsundasa benu mu bidiili bya benu ve, tso binywili bya benu; buuve mu kiinzili mikungi mya mbihili a tsuungi, na mi bilumbu bya saba. 17 Mambu mo maniima moosi, mali ndulu we binzinza bya ma muuya hu busu. Ka imbuli hili mu Kristo. 18 A lisiinga ve ti baatu ba bali mu ubaamonehele we ba bakulamana na ubaasambila bapofi, na ubaava talu yindahi mu tsimi a bo, bapatula pfuta a benu. Baatu ba buuna, baaluula mu nyeme yi butsuudu mu tooni a mbiili a bo yi imuutu. A liyuhala bo ve! 19 Bo a baakangama mu Kristo wu li mutswe ve. Ka ni mu Kristo, nyutu yoosi yili mu ubaha moonyi na yaabaambana mu makede na misasi. Ni buuna nyutu yibaakula we bu Nzambi atondi.

20 Tso benu laakwa na Kristo, benu a lisaali hu tsina a ndongisili a mbaandu ya baatu ba tsi ve. Mu hima benu libaadyata we baatu ba tsi mo yiniiyi, na ubaasiinga ti babaakwiha benu mikele mya we miniimi? 21 Mono ma baatu mo baana bali mu uleele: «A haavolo hiniihi ve», «a biimba hyo ve», «a beembe ve». 22 Mikele mo miina mili mu utala bisiha bi byafwana udimbala bu baatu bamiisalila byo. Mu tooni ati, myo mili ndulu matumili na mandongisili ma imuutu. 23 Mikele mo miina mili mu umonehele we mya tsiki, mu tooni ati, myo mili mu utuma ukiinza bukulu, mu ukulamana, na ukwamisa nyutu. Ka mikele mya pila yiina, a mili na tsongo tso hoole ve, mu tooni ati, myo utwala uliha baatu mu usa litondo la bo lilibi ve.