12 Nzambi amiisoolo benu mu uba baatu nde, na nde ubaatondo benu. Ni mu buuna, benu laafwana uba na mutima wu litondo li mifudi, wu ukumbasa bana, wa kulimini, wu bulembo, wu mukami. 13 Benu laafwana ukuunda ndyatili bambaahi. Tso mumosi mu benu li na tooni na mbaahi, hwafwana mu usa bana kolo-kolo, we bu Pfumu haasiidi benu kolo-kolo3.13 Mty 6.12,14. 14 Ka ŋa yulu a maana moosi, baani na litondo, dita mo li luusa ti benu liba mu itwadi hi hyasupaha. 15 Nyaha hyenze hya Kristo hiba mu mitima mya benu. Ni mu ukuhasa hyenze mo hiina Nzambi hateele benu, mu uba binama bi byabaambana mu nyutu mosi. Nyaha benu libaafutala matondo! 16 Nyaha mambu ma Kristo mabaha mbuha mu mitima mya benu na busina bwa mo bwosi. Baalongesenaani na baayibusanaani na tsiki yoosi. Yimbalaani Nzambi mu mitima mya benu myosi, na pfutili matondo, mu mikuunga na nyimbu, na nyimbu Livupu. 17 Byosi bi benu luusa, mu mikuma buuve mu mavaanga, baasaani byosi mu nduhi a Pfumu Yisu mu pfutili matondo mu nde huli Nzambi Taata.
Ndongisili yi yitali buli
18 Benu bakaasu, baani hu tsina lituma li balumi ba benu, we bu hwafwana mu usa, bu lika itwadi na Pfumu3.18 Efe 5.22,24. 19 Benu balumi, baatondwaani bakadi ba benu, na a liba na mitima mi myapiinda ŋa busu bwa bo ve.
20 Benu baana, baasiingalaani bangu na bataata ba benu mu pasi dyambu, mu tooni ati, maana ni ma Pfumu ubaasilasa.
21 Benu bataata, a laabaakwiisa baana ba benu kesi, mu uvelenyongese bo.