1 Woo yo'ono wu shi!

A̱vu lyuci na ocosu mpasa,

zana ri tapu ne epen

za na ri tapu ni itana i na a̱ pura̱i,

u lamba itana i na a usai shi!

2 Uwwa! Mesun ma asuɗu

na̱ mesun ma̱ a̱ga̱nda̱mu e ikeke,

na̱ mesun me ilaɗi yi ido kirib kirib

na̱ cine ikeke'e a̱ jinga̱ɗa̱sa̱ iɗa!

3 Ka̱lyuwa̱! Aza a na a kumbusa ido

a̱ ta̱ a̱tsuma̱ o uvon,

mutsun m pe'eni n ta a madala

ɓolo ni ibata,

waru apa a̱bunda̱ ama a na o unai.

Apa oɓolo a̱kwa̱kwa̱,

a na a̱ ri n kece shi,

ama a̱ ka̱ra̱ ta̱ a̱ ta̱ɗa̱tsa̱sa̱

zuva va̱ a̱kwa̱kwa̱.

4 Ili i nda i fara ta̱ suru

adama a̱bunda̱ a tsushakala a Niniva,

aashakala o una̱ wu uyo'o u ndolo,

mma va̱ a̱za̱ nkunu,

za na pusa̱yin nɗa

a̱tsuma̱ o ure u tsu shakala tsa̱ a̱ yi,

ne elentsu a̱tsuma̱ o ure u tsuboci tsa̱ a̱ yi.

5 A̱sulazuva o oɓolo a̱ a̱soja a damma ta̱,

<<A̱yi ɗa nda, n ri tsushu'un na̱ Niniva,

n ta̱ 'ya̱sa̱n ma̱kuru ma̱ wu

n roco nɗa ataɓu a̱ wu,

reve vo o'wo ili i wono e ekere o tsugono tsu uvaɗi suru.

6 N ta kusha'wa wu ili yi idaba,

a̱vu n ca wu wono

mo o'woto wu ili i na o goro.

7 Aza a na a̱ ka̱lyuwa̱ nuwu suru

o to rono na̱ a̱ca̱pa̱ a damma,

<Ili ya asalama!

Niniva wo o'wo ta̱ okongo,

zane ɗa a̱ shon

adama a̱ yi?

A te ɗa ma̱a̱ tsura̱a̱ wu

aza a na a ca wu adanshi?> >>

8 Niniva, vu la'a ta̱ lyuci va̱ Tebe,

zana ri o una̱ wu Uɗolu wa̱ Nilu ɗa?

A̱yi fo mini ma ɗa ma̱ ka̱nda̱ruwa̱ niyi,

mala ma ɗa uba̱ta̱ wu upa'atan wa̱ a̱ yi,

mini ma ɗa ukari wa̱ yi.

9 Kush na̱ Masar ɗa ucira wa̱ yi,

waru ucira wa̱ yi u ri nu utyo shi.

Put na̱ Libiya e le ɗa aza a na o ɓoloso una̱ na̱ yi.

10 Nu ucira wa̱ yi suru a̱ pura̱i ta̱

a̱ 'ya̱wa̱ e iɗa i tsugbashi,

a̱ ka̱ra̱ ta̱ na̱ yi a̱ tyo e iɗa i ro.

O ɓuɓosuso ta̱ aci a̱ nreɓu ma̱ yi,

oboguzu e re suru.

E ne'eshen ta̱ mbara ma̱ yi

a̱tsuma̱ o ure u matawa ma agita,

a̱ nla̱ ta̱ azagbain a̱ yi na akani suru.

11 Niniva vu to o'wo usowu tim,

waru vu to sowo a̱tsuma̱lima̱ lon.

Vu ta zami uba̱ta̱ wu upa'atan,

diga e ekere a n'yuwatan ma̱ wu.

12 Ba̱ta̱ vu ɓaɓu va̱ wu ri nu ucira shi,

a ta lyuwa le tsu umatsun wu ubiri na e inai.

A mantsa ma na a̱ jinga̱ɗa̱i ɗanga'a,

a̱vu muwu'un a̱ riya̱

o una̱ wu za va alya.

13 Ka̱lyuwa̱ a̱soja o uvon a̱ wu,

a̱ ta̱ tsa̱ a̱ma̱ci.

Na̱ntsu lyuci va̱ wu ukpa̱tu'u ɗa a̱ ri

e ekere a n'yuwatan ma̱ wu.

Akina a lyuwa ta̱ ɗanga vu ukatsusu vu na̱ntsu va̱ wu.

14 Rono mini adama a na a̱ ta̱ ka̱nda̱ruwa̱ wu,

vu tsura̱ mini ma̱ a̱bunda̱

kafu uvo'on u teme.

Vu da̱shi ugbamu wu uɓaɓu wa̱ wu!

Vu ka̱ra̱ a̱ 'ya̱wa̱ o uɓaa

vu dadasa ci'in,

reve vu tara ili i ma̱zuɗa̱ me ikunku!

15 Ni ifoɓi i nda suru,

akina a ta lyuwa wu,

matsun me pe'eni ma̱ ta̱ kototo wu,

waru u ta tama wu tsa apapari.

Vu da̱shi ta̱ a̱bunda̱ tsa apapari,

reve vu da̱shi a̱bunda̱ tso oɓolo akyun!

16 Vu da̱shi ta̱ a̱bunda̱

aza atsulu na wina a̱ wu

hali a la'a oɓolo a̱ italyo'o ya zuva.

A̱ ta̱ tsa akyun

a na a tsu yuwan ulungusu

reve a̱ kpa̱tu'wa̱ evelu e le a 'yawan.

17 Aza e ipiri ya̱ wu a̱ ta̱ a̱bunda̱

va damma akyun a na a̱ ri a̱ ma̱ka̱ra̱

azagbain a̱ wu a̱ ta̱ tso o oɓolo apapari,

nden zuva va alya

a mantsa mo uta̱nu.

Mantsa ma na urana u suɗuwai,

a̱vu a 'yawan,

waru babu za na tsu reve

uba̱ta̱ u na a̱ tyo yi.

18 <<A̱vu mogono ma Asuriya

aza a na e idanasa ama a̱ wu a̱ ta̱ nlavu,

mbara ma̱ wu fo n ta nlavu.

Akapi a ama a̱ wu a̱ ta̱ ubetu'wu

tsi ikyon zuva vu nsasan,

a̱ ri na̱ za va aguɓa a na oɓoloto le shi.

19 Babu ili i na ya inato wuntsu a̱ wu,

adama a na wuntsu wa̱ wu

za a na a̱ tsu ta̱wa̱ nu ukwisa̱ u ɗa.

Zana uwwai adama a ɗa wu

u ta ɓasa ekere a̱ yi u damma, <Ulobono ta̱!>

Adama a na za lo

na kuɗa̱i o sowo a̱tsuma̱lima̱

diga e ekere a̱ wu shi?>>