1 Ndakulayilila kunembo lyaLeza alya Kkirisitu Jesu uyoobeteka bapona abafu, alimwi akuliboniya kwakwe abwami bwakwe, 2 kambawuka ijwi, ulibambile muchiindi cheelede amuchiindi chiteelede, ukombelezye, akukalalila akusungwazya, utakachilwi mukuba amoyo mulamfu amukulayilila. 3 Nkaambo chiindi chiyobuza bantu nibayooleka kukakatila injiisyo yachoonzyo, pesi kabajisi matwi ayanda kuswiilila bayoobunganiya bayiisyi babo kuti kukeelele ziyandisyo zyabo, 4 alimwi bayooleya kukuswiilila kukasimpe akusweekela munjiisyo italuleme pe. 5 Pesi mbuli nduwe, ulibatamike lyoonse, kakatila kupenzegwa, chita mulimu wabukambawusi bwamakani mabotu, uzuzukizye mulimu wako.

6 Nkaambo ndili muchiimo chakubbomwedwa kale mbuli chipayizyo chakunywa; alimwi chiindi chakweenda kwangu chasika. 7 Ndakalwana kulwana kubotu, ndakamanisya mwiindilano, ndakabamba lusyomo. 8 Nkikaako ndibambidilwe musini wabusalali, ooyo Mwami, mubetesi ululeme, ngwayoondipa muBuzuba oobo, alimwi peepe kulindime luzutu pesi lubo akuli baabo boonse bakayanda kuliboniya kwakwe.

9 Sungwaala kuza kulindime akufwambana, 10 nkaambo Demasi, mukuyanda nyika eeyi yalino, wakandiloboka mpawo waya kuTesalonika; Kireseni wakaya kuGalatiya aTayitasi kuDalimatiya. 11 Lukku aliikke nguuli andime. Bweza Makko mpawo uze aawe; nkaambo uli alugwasyo lupati kumulimu wangu. 12 Tayikkikkasi ndakamutuma kuEfeso. 13 Nutazooze, weete chikobela nchindakasiila Kkapasi kuTuroyasi, alubo amabbuku, alimwi atala azyoonse kapati azikwiye.

14 Alekizanda sikufula wakandichitila bubi bupati; Mwami uyoomuliya nkaambo kamilimu yakwe. 15 Umuchenjelele iwe lwako, nkaambo wakakazyana kapati amakani eesu.

16 Kukulikwabilila kwangu lutaanzi taakwe wakandigwasya pe; boonse bakandichija. Batapegwi mulandu atala anzizyo! 17 Pesi Mwami wakandiimikilila mpawo wakandipa nguzu zyakukambawuka makani mubuzwide, kuti boonse batali baJuda baamvwe. Aboobo ndakavunwa kuzwa kumulomo wamulavu. 18 Mwami uyoondivuna kububi boonse akunditola kubwami bwakwe bwakujulu kandilondokede. Kulinguwe ngakube bulemu lyoonse alyoonse. Ameni.

19 Ujuzye Purisikka aAkkwila aŋanda yaOnesiforasi. 20 Erasitasi wakachaala muKkorinte; Turofimasi ndakamusiya kachiswa kuMiletasi. 21 Weezye changuzu kuti usike kakutanasika mupeyo.

Eyubbulasi ulamujuzya, mbumbubo aPudenzi aLinasi aKkilawudiya aboonse bakwesu.

22 Mwami abe amuuya wako.

Luzyalo lube andinywe.