1 ✝ Eelyo kuti naa mwakabusigwa aamwi aKkirisitu, amuyandule zintu zili kujulu, ooko Kkirisitu nkwabede, nkwakkede kuluboko lwakululyo lwaLeza. 2 Amupangike miyeeyo yanu kuzintu zili kujulu, peepe kuzintu eezyo zili anyika, 3 nkaambo inywe mwakafwa, alimwi buumi bwanu bulisisidwe aamwi aKkirisitu muli Leza. 4 Aawo Kkirisitu ooyu ulingunguwe buumi bwesu akuliboniya, eelyo muyooliboniya aamwi anguwe mubulemu.

5 Nkikaako amujeye eezyo zyamunyika zili mulindinywe, zilimbuli malalano abusofwazi azisusi zyamubili aziyandisyo zyabubi abusindya alimwi chaamba kukomba mituni. 6 Nkaambo kazintu eezi bukali bwaLeza bulikuza.* 7 Muli zeezi mumwakali kweendela, nimwakali kupona mulinzizyo.

8 Pesi lino amusowe zyoonse eezi, zilimbuli lunyemo abukali kusula akusampawula alimwi amatusi kuzwa mumulomo wako. 9 Mutabejelani pe, mbukunga mwakazuununa buntu bukulukulu anchito zyayo 10 ✝alimwi mwakasama buntu bupya, chaamba kubukulisigwa muluzibo lwakwe amuchiimo chayooyo wakachilenga. 11 Aawa takukwe muGirikki nikuba muJuda, bapalulwe abatapalwidwe, utayiide bazwakule amuzike amuntu wangunukide, pesi Kkirisitu nguunguwe zyoonse amuli zyoonse.

12 ✝ Nkikaako mbuli basale baLeza, basalali alimwi bayandwa loko amusame aluse abuuya abazikatide akulifwiinsya alimwi amoyo mulamfu, 13 kamukkazikilene moyo alimwi naakuti umwi wanu ujisi kaambo atala amweenzinyina, amulekelelane; mbuli Mwami mbwakamulekelela, aboobo alubo mweelede kulekelela. 14 Alimwi atala azintu zyoonse eezi amube aluyando, oolu nduundulo lukamantaniya aamwi zintu zyoonse munzila iluleme. 15 Amuleke luumuno lwaKkirisitu lwendeelezye mumyoyo yanu, mulindulo mumwaakayitwa mumubili uumwi. Alimwi amupe kulumba. 16 ✝Amuleke ijwi lyaKkirisitu likkalilile mulindinywe mubwiingi bwalyo, amuyiisye akusungilizyaniya mubusongo boonse, amukwiimba intembawuzyo amalelebu anyimbo zyamuMuuya anyimbo zyakupa kulumba mumoyo yanu kuliLeza. 17 Alimwi kufumbwa nzimuchita, mujwi nikuba mukuchita, amuzichite zintu zyoonse mukwiinda muzina lyaMwami Jesu, kamupa kulumba kuliLeza Taata mukwiinda mulinguwe.

18 ✝ Nibanakazi, amulibombye kubalumi banu, mbuli mbulikweleede muMwami.

19 Nibalumi, amuyande banakazi banu, alimwi mutabaluvukili.

20 Nibana, amuswilile bazyali banu muzintu zyoonse, nkaambo eechi chibotezya Mwami.

21 NimaTaata, mutabanyemwi bana banu, nkaambo balawusa.

22 Nibazike, amuswiilile basimalelo banu baansi muzintu zyoonse, peepe nibabwene, mbuli basikubotelezya bantu, pesi mukuchita zizwa mukati kamoyo, mukuyoowa Mwami. 23 ✝ Kufumbwa nzimuyoochita, amuchite amoyo woonse, mbuli kubelekela Mwami alimwi peepe bantu, 24 kamuzi kuti kuzwa kuMwami muyotambula lukono mbuli mpindu yanu; peepe iswe pesi nguMwami Kkirisitu mukukutawukila. 25 Nkaambo simuchita zibi uyoojana mpindu yabubi mbwachita, alimwi takukwe kusalulwa pe.