1 Ime Pawulu, uli mubwaange nkaambo kaKkirisitu Jesu, aTimoti mukwesu.

Kuli Filimoni simulimuma uyandwa 2 aAfiya muchizi wesu aAkkipasi silumambama, ambungano ili muŋanda yako:

3 ✝ Luzyalo alumuuno luzwa kuli Leza Taata wesu aMwami Jesu Kkirisitu lube kulindinywe.

4 * Ndilumba Leza wangu chiindi choonse nindikuyeeya munkombyo zyangu, 5 nkaambo ndimvwide lusyomo ndulaalo muMwami Jesu Kkirisitu aluyando lwako kubasalali boonse, 6 alimwi ndikomba kuti kwaabilana kwalusyomo lwanu kube kusumpula luzibo lwabubotu boonse ndutulaalo muli Kkirisitu. 7 Mukwesu ndakajana lukondo lupati akuumbuligwa kuzwa kuluyando lwako, nkaambo myooyo yabasalali yakabukulusigwa kwiinda mulinduwe.

8 Nkikaako, nikuba kuti ndili abusichamba muli Kkirisitu bwakukulayilila kuti uchite zyeelede, 9 anu kuti ime Pawulu, ndimunene ndasala kukumbila kulinduwe, ankaambo kaluyando ime, alimwi lubo ndimwange waKkirisitu Jesu, 10 ✝ Ndakukumbila nkaambo kamwana wangu, Onisimasi, kandili ndime wakabawisi mubwaange. 11 Chiindi chakayinda taakwe naakali alugwasyo pe kulindinywe, pesi lino ulaalugwasyo kulinduwe akulindime.

12 Ndilamubweedezya kulinduwe, ndamutuma mbuli ndituma moyo wangu. 13 Chali kunoondikonda loko kuti kandichili aawe, kuchitila kuti andikutawukile abusena bwanu muchiindi chabwaange bwangu muntolongo nkaambo kamakani mabotu; 14 pesi ndasala kutachita chintu kanditakwe nindazuminana andinywe kuchitila kuti bubotu bwanu butabi bwakumanikizigwa biya pe pesi bube kulwaangunuko lwanu.

15 Ambweni nchiichicho eecho nchaakali wapambulwa kuzwa kulinduwe kwakayindi, kuchitila kuti akabe anduwe kwalyoonse, 16 katachili mbuli muzike pe pesi muzike ulimbubo, mbuli mukwesu uyandwa, kapati kulindime pesi kachiindilide kapati biyeni kulinduwe, aamwi mbuli muntu amukwesu muMwami.

17 Aboobo kuti kamunditambula mbuli simulimunyokwe, amumutambule Onisimasi mbuli mbumukonzya kunditambula. 18 Kuti wakamubisizya, naa kajisi chikwelete kulindinywe, milandu eeyo muyibikke alindime. 19 Ime, Pawulu, ndalemba eechi aluboko lwangu, ndiyooliya, kakutakwe nchindaamba nikuba inywe lwanu akundiliya abuumi bwenu. 20 Iyii, mukwesu, ndiyanda kujana kulinduwe muMwami. Bukulusya moyo wangu muli Kkirisitu.

21 Ndili achoonzyo akuswiilila kwako, nindili kukulembela, kandizi kuti uyoochita zyiinda eezyo nzindakumbila. 22 Chimwi chintu ncheechi, ndibambile ŋanda yabeenzu, nkaambo ndilabulangilizi kwiinda munkombyo zyanu kuti ndizumizigwe kuza kulindinywe.

23 ✝ Epafurasi, mwaangema nkaambo kaKkirisitu Jesu, ulamujuzya, 24 ✝ alimwi Makko aArisitakkasi aDemasi aLukku basimulimuma balakujuzya alabo.

25 Luzyalo lwaMwami Jesu Kkirisitu lube amuuya wanu.