1 Ndime Juda, mulanda waJesu Kkirisitu alimwi mwanike waJakkobbu.

Kuli baabo bakayitwa, bayandwa muli Leza Taata abakabambwa obotu nkaambo kaJesu Kkirisitu:

2 Luse aluumuno aluyando luvule mulindinywe.

3 Nimuyandwa, kandili achiyandisyo chipati chakumulembela atala alufutuko lwesu ndutwabilana, ndajana kazyeelede kuti ndimulembele kandili kumusungwazya kukwabilila lusyomo oolo kamwi kwalyoonse lwakapegwa kubasalali. 4 Nkaambo bamwi bantu bakanjila mukavwindi akati kanu, aabo kubetekwa kwabo kwakalembwa kale chiindi chakale. Aaba mbantu batayoowi Leza basandula luzyalo lwaLeza wesu mukupona mubwaamu akukaka Simalelo wesu aliikke aMwami, Jesu Kkirisitu.

5 Lino ndiyanda kumuyeezya, nikuba mwakali mwaambilwa buzwide, kuti Jesu ooyo wakafutula bantu kuzwa munyika yaIjiputi, mukweenda kuzwa aawo wakabanyonyoona aabo batakwe bakali kusyoma pe. 6 Alimwi baangelo aabo batakwe bakabamba zyuuno zyabo pesi bakasiya busena bwabo bwakukkala bakabambwa mumudima mubwaangwe butamani kukuyoosika kubuzuba bupati bwalubeta, 7 mbuli bantu baSodomu aGomora azisi zizyungulukide, aabo bakapona munjalalando akuba mukulombozya kutaambiki, bakaba chitondeezyo mukunjila muchisubulo chamulilo utamani.

8 Anukuti mbuli mbuboobo aaba bantu mumaloto aabo babisizya mubili, balakaka bweendelezi, akusampawula baluleme bakujulu. 9 Pesi mungelo mupati Mayikkeli, naakalwana aSikuchenga, bakakazyaniya atala amutunta waMozesi, takukwe naakamubeteka alutuko pe, pesi wakati, "Mwami akupe mulandu." 10 Pesi bantu aaba balatukila atala azintu kufumbwa nzibatamvwisisisyi pe, azintu eezyo nzibazi kabatakwe kuyeeya mbuli banyama bamusokwe zilengwa zitakwe manu mbubachita, zintu eezi nziibanyonyoona. 11 Maawe kulimbabo! Nkaambo beenda munzila yaKkeyini, alimwi balalitakata nkaambo kakujana mukubisya kwaBbalamu, alimwi bakapapa mbuli Kkora mbwaakapapa, alimwi bakanyonyoonwa mbuli nguwe. 12 Aaba bantu bali mbuli tyombe muli chakulya mumapobwe aanu aluyando, mbuli mbubalya andinywe kabatakwe bweeme, kabaliilanga lwabo beni, bali mbuli mayoba atakwe mvula, aayo awungwa aguwo, bali mbuli misamu itakwe michelo muchindi chamayinza, yakafwidilila, inonkwedwe, 13 bali mbuli mayuwe amulwizi alaanguzu, aawaala ikkovu lyamawuse aawo; bali mbuli inyenyezi zyabuyo zyeempeta eezyo zibambilidwe mudima utamani kwalyoonse.

14 Wakali Inokki wakasinsima muzyalani lyamusanu aabili kuzwa kuli Adamu, wati, "Amulange, Mwami uyobola abasalali bakwe balizyuulu, 15 kuzobeteka boonse, akukuyoopa chisubulo kuli boonse batazi Leza nkaambo kanchito zyabo zitali zyabunaLeza nzibakakachita munzila itali yabuna Leza, alimwi azyoonse zitalueme eezyo batazi Leza nzibakaambuula atala anguwe."

16 Aaba mbaasikunyontooka, basikutamikizya, zisusi zyabo zibi, balisumpula amilomo yabo, basikuchenga, bayuunga bantu mutwambo kuti bajane.

17 Nimuyandwa, pesi mweelede kuyeeya, zyakasinsimwa abatumwa baMwami wesu Jesu Kkirisitu, 18 bakati kulindinywe,"Mumazuba amamanino kuyooba basikuweela, batobela nzibayanda zitakwe bunaLeza." 19 Aaba mbiibantu beeta kwanzaaniya, mbantu banyika, batakwe Muuya. 20 Pesi inywe, nimuyandwa, amuliyake mulusyomo lwanu lusalala, amukombe muMuuya Usalala, 21 amulibambe muluyando lwaLeza, akulindila luse lwaMwami wesu Jesu Kkirisitu kuti amweete kubuumi butamani.

22 Amube aluse, kulibaabo badoneeka, 23 amubavune bamwi, akubakwempa kuzwa mumulilo, kuli bamwi amube aluse lulakuyoowa Leza, akusula nikuba chisamo chabo chisofwazigwa azisusi zyazibi.

24 Lino kuli ooyo ukonzya kumubamba kukuzwa kukuwa akumweeta kamutakwe kampenda kunembo lyabulemu bwakwe alukondo, 25 kuli Leza aliikke, Mufutuli wesu mukwiinda muli Jesu Kkirisitu Mwami wesu, akube bulemu, abupati, abweendelezi anguzu, kuchiindi choonse chakayinda alino akwalyoonse. Ameni.