Yarmiyāh 45

Bārūk ke lie Tasallī kā Paiġhām

1 Yahūdāh ke bādshāh Yahūyaqīm bin Yūsiyāh kī hukūmat ke chauthe sāl meṅ Yarmiyāh Nabī ko Bārūk bin Nairiyāh ke lie Rab kā paiġhām milā. Us waqt Bārūk Yarmiyāh kī wuh bāteṅ ek kitāb meṅ darj kar rahā thā jo us par nāzil huī thīṅ. Yarmiyāh ne kahā, 2 "Ai Bārūk, Rab Isrāīl kā Ḳhudā tere bāre meṅ farmātā hai 3 ki tū kahtā hai, ‘Hāy, mujh par afsos! Rab ne mere dard meṅ izāfā kar diyā hai, ab mujhe ranj-o-alam bhī sahnā paṛtā hai. Maiṅ karāhte karāhte thak gayā hūṅ. Kahīṅ bhī ārām-o-sukūn nahīṅ miltā.’

4 Ai Bārūk, Rab jawāb meṅ farmātā hai ki jo kuchh maiṅ ne ḳhud tāmīr kiyā use maiṅ girā dūṅgā, jo paudā maiṅ ne ḳhud lagāyā use jaṛ se ukhāṛ dūṅgā. Pūre mulk ke sāth aisā hī sulūk karūṅga. 5 To phir tū apne lie kyoṅ baṛī kāmyābī hāsil karne kā ārzūmand hai? Aisā ḳhayāl chhoṛ de, kyoṅki maiṅ tamām insānoṅ par āfat lā rahā hūṅ. Yih Rab kā farmān hai. Lekin jahāṅ bhī tū jāe wahāṅ maiṅ hone dūṅgā ki terī jān chhūṭ jāe." *Lafzī tarjumā: Maiṅ tujhe terī jān ġhanīmat ke taur par baḳhsh dūṅgā.