Zabūr 111

Allāh ke Fazl kī Tamjīd

1 Rab kī hamd ho! Maiṅ pūre dil se diyānatdāroṅ kī majlis aur jamāt meṅ Rab kā shukr karūṅga.

2 Rab ke kām azīm haiṅ. Jo un se lutfandoz hote haiṅ wuh un kā ḳhūb mutāla’ā karte haiṅ.

3 Us kā kām shāndār aur jalālī hai, us kī rāstī abad tak qāym rahtī hai.

4 Wuh apne mojize yād karātā hai. Rab mehrbān aur rahīm hai.

5 Jo us kā ḳhauf mānte haiṅ unheṅ us ne ḳhurāk muhaiyā kī hai. Wuh hameshā tak apne ahd kā ḳhayāl rakhegā.

6 Us ne apnī qaum ko apne zabardast kāmoṅ kā elān karke kahā, "Maiṅ tumheṅ ġhairqaumoṅ kī mīrās atā karūṅga."

7 Jo bhī kām us ke hāth kareṅ wuh sachche aur rāst haiṅ. Us ke tamām ahkām qābil-e-etamād haiṅ.

8 Wuh azal se abad tak qāym haiṅ, aur un par sachchāī aur diyānatdārī se amal karnā hai.

9 Us ne apnī qaum kā fidyā bhej kar use chhuṛāyā hai. Us ne farmāyā, "Merā qaum ke sāth ahd abad tak qāym rahe." Us kā nām quddūs aur purjalāl hai.

10 Hikmat is se shurū hotī hai ki ham Rab kā ḳhauf māneṅ. Jo bhī us ke ahkām par amal kare use achchhī samajh hāsil hogī. Us kī hamd hameshā tak qāym rahegī.