Salmos 75

Allāh Maġhrūroṅ kī Adālat Kartā Hai

1 Āsaf kā zabūr. Mausīqī ke rāhnumā ke lie. Tarz: Tabāh na Kar.

Ai Allāh, terā shukr ho, terā shukr! Terā nām un ke qarīb hai jo tere mojize bayān karte haiṅ.

2 Allāh farmātā hai, "Jab merā waqt āegā to maiṅ insāf se adālat karūṅga.

3 Go zamīn apne bāshindoṅ samet ḍagmagāne lage, lekin maiṅ hī ne us ke satūnoṅ ko mazbūt kar diyā hai. (Silāh)

4 Sheḳhībāzoṅ se maiṅ ne kahā, ‘Ḍīṅgeṅ mat māro,’ aur bedīnoṅ se, ‘Apne āp par faḳhr mat karo. *Lafzī tarjumā: Sīṅg mat uṭhāo.

5 Na apnī tāqat par sheḳhī māro, *Lafzī matlab: na apnā sīṅg uṭhāo. na akaṛ kar kufr bako.’"

6 Kyoṅki sarfarāzī na mashriq se, na maġhrib se aur na bayābān se ātī hai

7 balki Allāh se jo munsif hai. Wuhī ek ko past kar detā hai aur dūsre ko sarfarāz.

8 Kyoṅki Rab ke hāth meṅ jhāgdār aur masāledār mai kā pyālā hai jise wuh logoṅ ko pilā detā hai. Yaqīnan duniyā ke tamām bedīnoṅ ko ise āḳhirī qatre tak pīnā hai.

9 Lekin maiṅ hameshā Allāh ke azīm kām sunāūṅgā, hameshā Yāqūb ke Ḳhudā kī madahsarāī karūṅga.

10 Allāh farmātā hai, "Maiṅ tamām bedīnoṅ kī kamr toṛ dūṅgā jabki rāstbāz sarfarāz hogā." *Lafzī tarjumā: bedīnoṅ ke tamām sīṅgoṅ ko kāṭ ḍālūṅgā jabki rāstbāzoṅ kā sīṅg sarfarāz ho jāegā.