1 Se̱ Yakubu fog ya'ag-u̱ campa-ne̱ wa tu̱msu̱ wa zu̱: <<Kargu̱n u̱du̱ ri, u̱m waru̱ no̱ no̱m-u̱ do̱'e̱ kwu̱m-du̱ no̱ u̱ da-u̱ de'e̱ u̱ haan.>>

2 <<Kargu̱n no̱ e̱r,

Yaag-u̱ ri Yakubu;

E̱re̱n Isra u̱so-u no̱.>>

3 Rube̱n, bo̱ o̱ye̱ mat-du̱ u-shu̱ ri.

Bo̱ wa u̱m mate̱ da-u̱

u̱m o̱o̱ge̱ u̱ fa-u̱r ri,

u̱ da-u̱ u̱m o̱o̱ge̱ u̱ ho̱g-mu̱ u̱r-be̱b.

Bo̱ wa o̱ yu̱-shu̱

tu̱msu̱ wu̱ ze̱ge̱ u̱r-be̱b.

4 Ko̱ ba shu̱'u̱te̱ zu̱

bo̱ wa-ko̱b-du̱ shu̱p-du̱ u̱r-hi wa

u̱ka bu̱-mu̱ u̱r-be̱b.

U̱ da-o̱ bo̱ za kwu̱m-du̱

re̱-u̱ u-shu̱ da,

remu̱ zu̱ bo̱ daag

u̱ yu̱n-u ri bo̱ naas o̱.

Bo̱ roogte̱ u̱ to̱k-ne̱,

wu̱ shu̱'u̱te̱ wa-gan

u̱ te̱k-u̱ ne̱ta-u̱t ri.

Bo̱ wa'ag me̱ u̱so-u ró

u̱ ho̱g-du̱ m-'e̱.

5 Simiyo̱n e̱ Re̱wi jab-u̱s e̱ o̱ u̱s-gan,

van-su̱ m-wu̱r u̱n

no̱m-tu̱ yu̱nu̱s-du̱ jab-su̱ u̱t-ne̱t se̱.

6 U̱m zaar u̱ cwadu̱ mo̱ro̱g-u̱r u̱n da,

U̱m za tu̱msu̱ same̱ u̱t-hi

u̱ no̱m-du̱ no̱m-u̱t yo̱-to̱ u̱n ne̱ da.

U̱n ho̱o̱rte̱ u̱t-ne̱t remu̱ ryab-u̱s u̱n.

Tu̱msu̱ e̱ kwu̱pru̱sse̱ tu̱ru̱g-su̱ na,

remu̱ ho̱g-du̱ u̱r-zwaru̱ u̱n.

7 Nu-u yo̱-o̱ u̱du̱ ryab-u̱s u̱n,

remu̱ zu̱ ryab-u̱s u̱n no̱ng u-tát.

Me̱ bu̱ru̱gse̱ u̱n du̱gu̱ ko̱-u̱r Yakubu,

u̱m bu̱ru̱gse̱ u̱n du̱gu̱ me̱ Isra-ne̱.

8 <<Yahuda, o̱r-u̱t ró ne̱

do̱'e̱ no̱mu̱ bo̱ u̱t-vam.

Bo̱ do̱'e̱ u̱ shu̱p-du̱ ge̱ku̱stu̱

hu̱u̱b-u̱t yo̱-to̱ ró.

Yaag-u̱ u̱so-u ró do̱'e̱ u̱t-he̱

u̱t-jwu̱n u̱ shu̱ ró.

9 Yahuda wa'-u̱ ri,

ya-du̱ u-zur de̱ wa o̱o̱ge̱,

wu̱ tase̱ tu̱du̱ ap-mu̱ u̱r-do̱g mu̱ wa mase̱,

Wa ru̱t wa nu̱ku̱s m-kim

da-u̱ wa tase̱ re̱-du̱ no̱m u̱t-re̱.

Bo̱ o̱ sha-mu̱ ya-du̱ uzur,

waku̱n zaar wu̱ de̱ yu̱nsu̱ bo̱ da.

10 Bo̱ Yahuda, ko̱m-yu̱ u̱r-faru̱k

za u̱t-rwu̱ du̱gu̱-du̱ ró da.

Ko̱m-yu̱ u̱r-faru̱k zaar u̱t-mo̱t

u̱ ne̱t-u̱t ró ne̱ da.

Se̱ teeg u̱du̱ wu̱ kame̱ wa re̱.

U̱t-dak u̱t-be̱e̱t to̱ ya'u̱ bo̱ m-ze̱g.

11 Bo̱ gagu̱ janka-u ró

u̱ te-yu̱ inabi,

jwaak-u wu̱n u̱t-no̱m

u̱t-re̱e̱g u̱s-nag-nag su̱ cite̱ e̱,

Wa jasu̱ kus-u̱t wa

u̱ bu̱-mu̱ inabi,

no̱ u̱t-no̱m m-jaas

u̱ bu̱-mu̱ inabi mu̱ o̱

u̱ jaz-mo̱ u̱ka m-hyu̱.

12 Is-u̱ ró u̱t-no̱m u̱s-rim

m-ze̱g bu̱-mu̱ ke̱,

tu̱msu̱ ni-nu̱ wu̱n u̱t-no̱m

u̱r-myak m-ze̱g m-me̱.

13 <<Ze̱burun u̱t-shu̱'u̱t u̱ kit-yu̱ m-sa.

U̱ shu̱'u̱t be-du̱ e̱e̱s-du̱ hat-su̱ m-bu̱,

Ma-du̱ u-bo̱r wa u̱t-te bo̱-u̱ Sidon.

14 <<Issakar, janka-yu̱ u̱r-be̱b ya.

Wa o̱ m-ru̱t u̱ te̱k-u̱ kapu-tu̱

gag-du̱ u̱t-cwu̱ u̱t-yu̱r.

15 Wa u̱t-hyan u̱zu̱

be-du̱ u̱r-hure̱ wa o̱ so̱-de̱,

tu̱msu̱ wa u̱t-ho̱g

u̱ka re̱me̱r-mu̱ u-dak o̱tte̱.

Wa yasu̱ shin-u wa remu̱

kab-du̱ cwu̱-tu̱ m-no,

wa yase̱ hi-u̱r wa

u̱ no̱m-du̱ m-to̱k mu̱ u̱r-be̱b.

16 Dan, do̱'e̱ u̱t-shu̱'u̱t wa kwu̱p-du̱ u̱s-rem

u-me̱ ne̱t-u̱t wa,

u̱ka to̱ku̱n ko̱-to̱ u̱-me̱ Isra-ne̱.

17 Dan wa do̱'e̱ u̱t-shu̱'u̱t

u-fa u̱ kit-u̱ u-fu̱n,

fa-yu̱ m-rab u̱ kit u-fu̱n,

Yu̱ epe̱ du̱ku̱nte̱ du̱ jwaak,

remu̱ i o̱ m-sak e̱ he̱'e̱ u̱-dim.

18 Yawe, u̱m o̱ wadu̱ is u̱ u̱ku̱r-u ró.

19 <<Gad, hyu̱w-ne̱ kwu̱p-du̱ u̱s-fu̱n ne̱

do̱'e̱ u̱ haan u̱ bo̱,

se̱di bo̱ doru̱ dim-u̱ u̱n

wa to̱p u̱r-mag.

20 <<Ashu̱r, bo̱ no̱mu̱ no̱m u̱t-re̱

tu̱ m-re̱rem u-tát tu̱ farkina-ne̱.

Tu̱msu̱ i nome̱ no̱m-tu̱ u̱t-re̱

tu̱ m-re̱me̱r tu̱ faru̱k.

21 <<Napari, bo̱ do̱'e̱ u̱t-shu̱'u̱t u̱ka u-nu̱m,

wa do̱'e̱ mat-du̱ yaag-u̱ so̱ye̱.

22 <<Yusuhu, bo̱ matu̱ yaag u-tát,

bo̱ o̱ sha-mu̱ te-yu̱ inabi

yu̱ o̱o̱ge̱ kit-u̱ u-gi yu̱ mu̱te̱ u̱t-ya,

yu̱ fe̱k-u̱s wa rogme̱

m-pas ja-mu̱ u̱r-bo̱ngo̱.

23 Hu̱u̱b-u̱t yo̱-to̱ u̱n do̱'e̱ he̱e̱se̱ u̱n

m-dum za u̱r-o̱n,

hu̱u̱b-u̱t yo̱-to̱ u̱n do̱'e̱

tadu̱ wu̱n u̱s-ta u̱t-e̱r ne̱.

24 Se̱di ta-u wu̱n u̱t-shu̱'u̱t

u̱ go̱ri-go̱ri,

tu̱msu̱ kom-u̱t wu̱n

u̱t-shu̱'u̱t u̱r-be̱b ne̱,

U̱-remu̱ kom-u̱ wa-u̱r-be̱b

wu̱ Yakubu, tu̱msu̱ u̱

remu̱ wa-gwat-du̱ na,

ta'ar-du̱ Isra-ne̱.

25 U-Ru̱, wu̱ u̱m no̱me̱ u̱t-huuk,

wa no̱me̱ ko̱-u̱r ró u̱r-se̱ge̱.

Ru̱-u̱ ko̱-uyan wa wa'-u̱

u̱n kom-u so̱-o̱,

u̱ to̱mto̱n u̱n m-bu̱ du̱gu̱ do̱m u-ru̱,

tu̱msu̱ wa ya'u̱ u̱n bu̱-mu̱ ta u-dak,

m-ra u̱ ta u-dak-ne̱.

Wa ya'u̱ u̱n na u-tát u̱ yaag ne̱.

26 Yage̱ nu-u so̱-o̱ tu̱ u̱so-u ró,

to̱ ze̱k nu-u so̱-o̱ tu̱ ro̱r-tu̱ da-u̱

tu̱ arke̱ m-tumb ne̱,

m-te jamu̱ ro̱r-tu̱ mo̱mmo.

Yusuhu, u̱m no̱ng u̱s-ko̱n

u̱zu̱ na ya'u̱ bo̱ to̱ haan u̱du̱ ró,

bo̱ yu̱ shu̱'u̱te̱ yu̱-shu̱ o̱r-u̱t ró ne̱.

27 <<Banyamin bo̱ o̱ye̱ u-go yu̱ u̱r-do̱g

yu̱ o̱o̱ge̱ ho̱g-du̱ u̱s-me̱r,

u̱r-wu̱n bo̱ ho̱ hu̱u̱b-u̱ u̱t-yo̱-to̱ ró,

tu̱msu̱ m-rim bo̱ de̱ mo̱t-du̱ kwu̱m-tu̱

bo̱ o̱nke̱ du̱gu̱-du̱ hu̱u̱b-u̱t yo̱-to̱ ró.>>

28 Tun-to̱ to̱ o̱ye̱ ko̱-tu̱ Isra-ne̱ o̱p-u̱t yu̱r, tu̱msu̱ no̱mu̱ u̱so-u̱ u̱n zu̱ye̱ u̱n u̱ ya da-u̱ wa o̱o̱ge̱ wa'-u̱ u̱n nu-u so̱-o̱. Wa wa'-u̱ ko̱wan nu-u so̱-o̱ u̱ kame̱ wa.

29 Yakubu yu̱ u̱n tunto̱ bo̱r-to̱: <<U̱m o̱ u̱t-mo̱r m-mar ne̱ u̱m byu̱tu̱n u̱so-u̱t ri. Jwaku̱n me̱ u̱ u̱so-u̱t ri ne̱ u-pu̱ku̱s u-tak u̱ Eparo̱n ne̱t-u̱ He̱t-ne̱. 30 Pu̱ku̱s u̱ o̱o̱ge̱ tak-u̱ Mape̱ra, u̱ dapu̱s Mamre Kan'ana, u̱ Ibrahi o̱ye̱ u̱ka be-du̱ u-dok u̱du̱ Eparo̱n ne̱t-u̱ He̱t-ne̱, u̱r-same̱ u-tak ne̱. 31 Ku̱na na dokte̱ Ibrahi e̱ ne̱ta wa Saratu. Ku̱na na dokte̱ Ishaku e̱ ne̱ta wa Rebeka. Ku̱na tu̱msu̱ na dokte̱ Riya. 32 Ibrahi o̱o̱g u-tak u̱ pu̱ku̱s ne̱ du̱gu̱-du̱ ne̱t-tu̱ He̱t.>>

33 Da-u̱ Yakubu tase̱ waru̱ ya'ag-u̱ wa u̱s-rem, se̱ wa ru̱t u̱-do̱m u-yu̱n. Wa nom vu̱'e̱ su̱ m-vaste̱, wa dor u̱so-u̱t wa, wa mu̱ru̱s.