అపొ 12

గొప్ప హింసను

1 బరోభ్బర్‍ యోస్‍ ధన్నువ్‍మా రాజో హూయిరోతే హేరోద్‍ సంఘంనూ అద్మీయేమా థోడజణానా ధర్లీన్‍ హాఃతావాన సురు కర్యో. 2 యెహాన్‍నో భై యాకోబ్‍నాబి తల్‍వార్‍తి ఖత్రాయినాఖ్యో. 3 ఆమ్నూ యూదుల్‍నా ఇష్టంనూ కామ్‍ కరీన్‍ మాలంకర్లీన్‍, పేతురునబి ధర్లీదు. ఖాటుకోయిన్తే రోటోను పండుగను ధన్. 4 ఇనా ధరీన్‍ ఠాణమా గలైన్‍, పస్కా పండగహువదిన్‍ ఇనబాద్‍మా జనాల్‍నా హాఃమె ఇనా ల్యావ్‍నూ కరీన్‍ ఇనా కావ్లీమారక్య చార్‍ గుంపునా చార్ సైనికుల్‍నా అప్పగించ్యో. 5 పేతురు ఠాణమ గలైజవమ సంఘంను అద్మీయే హాఃరు ఇనహాఃజే గ్హణు ఆఖ్‍ఃతి దేవ్‍నా ప్రార్దన కర్తుర్హయు.

ఠాణమతూ పేతురు ఛుఠను

6 హేరోద్‍ ఇనా కాల్‍ విచారణ్‍ కరను ఛాలా కతో, యో బోల్యొతె అగాడీను రాతేస్‍ యో ఖంకల్‍తి భందైరీన్‍ బే సైనికుల్‍నా ఇచ్మా హూఃత్యోథో. బుజు కావాలి రవాళు ఠాణాను ధర్వాజుకనా కావల్‍ కాసిర్హయు.

7 ఎగ్గీస్‍, హధేక్‍ ప్రభును దూత ఇనాకనా ఆయిభిరీజవమా, ఏజ్గా యో ఛాతే జోగో హాఃరు ఊజాళు హుయిగు; తెదె దూత పేతురునా భావఢాఫర్‍ ఠోకీన్ వుట్‍ కరి బోలిన్‍ ఇనా వుట్టాడమా జల్దీస్‍ ఖంకల్‍ ఇనాహాత్‍మతూ ఇనూయోస్‍ టుటిపడీగయు. 8 తెదె దూత ఇనేతి తూ కంభార్‍నా భాందిలిన్‍, చప్లే పేర్లా కరి బోల్యొ, యో ఇమ్‍ కరాదీన్ ఇనబాద్‍మా దూత తార లుంగఢా ఉప్పర్ నాకిలిన్ మార కేడె ఆవ్‍ కరి ఇనెతి బోల్యొ.

9 యో బాధర్‍ ఆయిన్‍ దూతనా కేడె జైన్‍, యో దూతతి జర్‍గ్యుతే హాఃరు హాఃఛి కాహే, యో హాఃరు ధర్షనమ్కరీ రైగో. 10 ఆగాళ్ళు కావ్లీ వాళనా, బెంమ్మను కావ్లీవాళానా డాటిన్‍ హాఃయార్‍మ జావను లోఢను తలుపుకనా ఆయా తెదె ఇనుయోస్‍ యూవ్నా కడైగయు. యూవ్నే ఏజ్గాతు నిక్లీన్‍ ఏక్ గల్లీ డాటైదిన్‍ ఎగ్గీస్‍ దూత ఇనా మ్హేంధిన్‍ ఛలేగో.

11 తెదె పేతురునా హాఃయాల్‍ ఆయిన్‍, ప్రభు ఇను దూతనా బోలిమొక్లిన్‍ హేరోద్‍నూ హాత్‍మతూ, యూదుల్‍నా జనాల్‍ కర్నూ కరి దేఖ్యూతే ఇనా హాఃరవ్‍మతూ మన చుఖైరాక్యొస్‍ కరి హాంకే మన హాఃఛిస్‍ కనా మాలంహుయు కరి రైగో. 12 మార్కు కరి బోలాతె బుజేక్‍ నామ్‍ను యెహాన్‍ కరి ఇని ఆయా మరియనా గర్మఆయో. ఏజ్గా కెత్రూకి జణు మలీన్‍ ప్రార్దన కర్తుర్హయు. 13 యో బాధర్‍తు భిరిన్ ధర్వాజునా ఠోఖామా యో కోన్‍కీ దేక్నుకరీ ఏక్ నాని కాంకరవాళి ఛోగిరి ఆయి. 14 యో పేతురునూ వాత్‍ ఆవాజ్ హాఃణత్‍ ధరీన్‍, ఖుషీతి ధర్వాజు కాడీకోయింతిమ్‍ నాఖ్‍ఃతి జైన్‍ హాఃరవ్‍తి పేతురు ఆయిన్‍ బాధర్‍ హిభ్యిరోస్‍ కరి బోలి. 15 ఇనటేకె యూవ్నే ఇనేతి తూ దివానిసీకి కరి బోల్యా, రైతోబి మే బోలితేస్‍ క్హాఛీ కరి ఘట్‍బోలామ యూవ్నే ఇను దూత కరి బోల్యా.

16 పేతురు బుజున్‍బి ఇమ్మస్‍ ఠోక్‍తోర్హవమా యూవ్నే ధర్వాజు కాడీన్‍ ఇనా దేఖీన్‍ కలవర్‍ పడ్యు. 17 యో యూవ్నేతి సోపోర్హవో కరి సైగ్‍ కరీన్‍ బోలిన్‍, ప్రభు ఇనా ఠాణామాతూ కిమ్‍ బులల్యాయోకి యూవ్నా బోలిన్‍, యాకోబ్‍నా భైయ్యేనా యో వాతె మాలంకరావో కరి బోలిన్‍ బుజేక్‍ జోగోమ ఛలేగో.

18 వణు హూస్‍కరా పేతురు కేజ్గా ఛలేగో? కరి సైనికుల్‍మ హుయుతే గలిబిలి అత్రే ఏత్రే కాహే. 19 హేరోద్‍ ఇనటేకె ఢూండ్యోతేదె నా దేఖావమా కావ్లీవాళానా పరీక్చించుచిన్‍, కావాళివాలనా మర్రాకిదేయో ఆజ్ఞా దిదో ఇనబాద్‍మా హేరోద్‍ యూదయమతు కైసరయమ జైన్‍ రైయో.

హేరోదును మరణ్‍

20 తూరు సీదోన్ను హఃయర్‍యుల్‍నా ఫర్‍, సీదోనీయుల్‍నాఫర్‍ హేరోద్‍నా గ్హణు ఛంఢాల్‍ హూవమా, యూవ్నే హాఃరు మలిన్‍ రాజో కనా ఆయిన్‍ రాజోన దోస్తి బ్లాస్తునా యూవ్ను బాజు కర్లీన్‍, షాంతి హోణు కరి వేడిలీదు; ష్యానకతో రాజోనూ దేఖ్‍ఃతూ యూవ్నా దేఖ్‍ఃనా ఖవాను ఆనాజ్‍ ఆవాస్‍.

21 ఆ నియమించ్యుతే ధన్‍మ హేరోద్‍ రాజవస్ర్తాల్‍ పేర్లీన్‍ సీంహాసన్‍ఫర్‍ బేసిన్‍ యూవ్నా ఖామె న్యాయ కర్యొ. 22 జనాల్‍ హాఃరు ఆ దేవ్ను ఆవాజస్‍ పన్కి అద్మీను ఆవాజ్‍ కాహే కరి ఖైకార్‍ మేంద్యు. 23 యో దేవ్‍నా మహిమ నా కరమా యత్రాస్‍మా ప్రభునూ దూత ఇనా ధాభామా కీఢా పఢీన్‍ జాన్‍ మ్హేంద్యు.

24 దేవ్‍నూ వాక్యం హాఃరవ్‍మా ఫైలావ్‍తూ రయు. అధికమయ్యరు

25 బర్నబాబి సౌల్‍ యూవ్ను పరిచర్య నేరవెరనా బాద్‍మా మార్కు కరి బుజేక్‍ నామ్‍ను యెహన్‍నా కేడె బులాలిన్‍ యెరూషలేమ్‍మతూ ఫాచు ఆయు.