Isaías 44

ఎన్నిక హుయుతె ఇస్రాయేలు

1 హుయుతోబి మారొ సేవకుడ్ హుయోతె యాకోబూ, అజూబి మే బులాయోతె ఇస్రాయేల్ హఃమ్జో. 2 తున పైదాకరిన్ పేట్మా తున నిర్మాణ్ కరిన్ తున మద్దత్ కరవాళో యెహోవా ఆమ్‌ బోలుకరస్. మారో షేవాకుడ్ యాకోబు, మే చుణి రాక్యోతే యెషూరును, నకోడరిష్. 3 మే తరహ్ రవాళన పాణిన హుఃకాయి గయితే జమిన్ఫర్ జుకాళను పాణిన చిడ్కీస్. తారి సంతతిపర్ మారి ఆత్మన చిడ్కీస్. తున పైదాహుషేతే ఇవ్నా మే ఆసీర్వాధంకరిస్. 4 పాణినుకాలువను జగఫర్ గాడి రాక్యుతే నిరవంజిను ఝాడనిఘోణి హార్యు గాహ్ను ఫైదాహువతిం ర్హాషే 5 ఏక్ జణో మే యెహోవావాళో, బుజేక్ జాణొ యాకోబును నామ్ బోల్తూహుయిన్, అజక్జాణు యేహోవావాళోకరి ఇను హాతేహూలిక్కిన్ ఇస్రాయెల్ను అలాదునామ్ మెందిలిషే. 6 ఇస్రాయెల్నోరాజో యెహోవా, ఇవ్నో విమోచడ్ హుయోతే షేనానోధిపతి యేహోవా ఆంబోలుకరస్. మే అగాఢి వాళోబి అజూ పాసల్ వాళోహుయిరోస్. మే తప్ప కెహో దేవ్ కొయిని. 7 యో జమానతూ జమీన్ నియమం కర్యోతే తెప్తూ, మేబోల్తో ఆయోతిం మాలం కరవాళు కోన్చా? ఎజాత్ను వాళొ ర్హయోతో మన బోల్యొ. సంగతుల్నా మాలంకరావతె హుయిన్ ర్హాను. 8 తుమే దిగుల్ కయిన్ ఢరోనకొ. జమాణతూ మే తుమ్న ఆ సంగతుల్ హఃమ్జావతో మాలం కోకరాయోన్నా? తుమేస్ మన సాక్షుల్. మే తప్ప అజేక్ దేవ్ ఛానా? మే తప్ప బుజేక్ ఆష్రయందుర్గం కొయిని. ర్హావనితరా మన మాలంకొయిని.

విగ్రాహరాధనా

9 మూర్తి బొమ్మల్న బాణైలేతెవాళు మాయంను అద్మీని ఛా, ఇవ్ను ఇష్టంని ఘోణి మూర్తి బొమ్మల్ ప్రయోజనం కొయిని హామేస్ ఇన సాక్షుల్.ఇవ్నె గ్రహీంచ వాళు కాహె మాలంకర వాళు కాహే ఇనటేకె షరమ్ కాషె. 10 షానస్బి కామె ఆవకొయింతె మూర్తిను బొమ్మల్న బాణాయిలీన్ ఇనెక్ దేవ్ కరి నిరూపించా వాళు కోణ్? 11 హైదేకో ఇన పూజకరవాళు హాఃరూస్ షరమ్ హుషె. ఇనబణాయుతే షిల్పకారి అద్మీస్తోనా? ఇవ్నే హఃరు గుబ్బల్ బందాయిని ఎక్జోగో బిరషే. హఃచ్చస్ ఇవ్నే ఢరిన్ షరమ్ హుషె. 12 లోహఃర్ కుర్రాడిన ఆగ్మబాళిన్ కామ్కరస్. సుత్తేహూః మారిన్ ఇనిబలంతి హూఃదుకరస్. ఇవ్నా బుక్ లాగస్‌, బలం ర్హాషెకొయిని, పాణిను తరాహ్తి లంఢొ హుఃకావ్షె. 13 షిల్పివాళు చెక్కనఫర్ ఢోరితి సమనంన దేఖిన్ గీత కరస్. చిత్రకను పెట్టిన షపాక్కరస్. కెక్డాను గుర్తూతి ఇన బణావస్. మందిరంమ ఏక్ అద్మీను రూపంతి అచ్చురూపంతి బిరైకాడస్. 14 ఎక్జాణో దేవాదారును జాడన కతర్నుకరి దేకుకరస్. ష్మషనానుజాడనుతోబి,సరళనుజాడనుతోబి, సిందూరనుజాడనుతోబి, జాడిమనుజాడమ కేహూబిఎక్ జాడన లీలిషే. ఎక్ జాడన కోదిగాడమ వర్హత్నుపాణిమస్ మోటుహూషే. 15 ఎక్జణు పొయ్యిమలాగడిన్ బాళన కామేవ్షె. ఇనుమతి తోడలీన్ తండ్మ ఆగ్‌ షేకన కామేవ్షె. తోడలాక్డౌతి అగ్బలీన్ రోటబాణౌషే. అజూయోస్ లాక్డతి దేవ్నుబొమ్మబాణైని హఃలామ్ కర్షే. ఇనేతిస్ మూర్తిను బొమ్మల్ బాణైన్ పూజకర్షే. 16 ఆగ్మా తోడు బాళ్యు. తోడమ దాన్ బోటిన బుంజీకాద్యు. తొడన తండ్షేక్యు. అహా, కెత్రెఅసల్చాకరి బొలీలిదు. 17 ఇనుమా బచ్యుతే తోడ లాక్ఢౌన ఇనటేకే దేవ్ను బొమ్మకరైన్ ఇన హఃలమ్ కరిన్ తుస్ మారో దేవ్కరి హఃలామ్ కర్షే. అజీగాడే బాచౌబోల్షే. 18 ఇవ్నే కాయిసోచకోయిని గ్రహించకోయిని. దేకకోయినితింఇవ్నడోళముచైగయా, గ్రహించకోయినితిం ఇను దిల్ ముచైగయు. 19 కోణ్బి ఆలోచన కరకొయిని, మే ఆగ్మ థోడు బాల్యో. యోస్ ఆగ్ ఫర్ రోట బుంజ్యో, దాన్ బాణయో, బోటి బుంజీన్ కాద్యో. అజు బచ్యుగూతె ఇనేతి హేయమ్ను బొమ్మన బాణౌనా? జాడను మొద్దున జుకిన్ హఃలామ్ కరునా? కరికోణ్బి అలోచనకర కోయిని. యోచింనకినబి తేలివి, హూఃజ్‌ కొయిని. 20 యో పోయ్ను రాక్ కంకరస్. ఇను దిల్ మోషం హుయిజైన్ ఇన ఖరాబ్ వాటే బులాయిన్ జంకరస్. ఇను ఆత్మన కోబచ్చౌషేని. మారకవహఃత్మ జూటి ఛా కాయేన కరి బోలీలావన ఇన బుద్ది బరబ్బర్ కోహుషేని.

ప్రభువు సృష్టికర్త అజు బఛ్చాడవాళొ

21 యాకోబూ, ఇస్రాయేల్ ఆహఃరు హఃయల్ కర్జో. తూ మారో షేవాకుడ్ మేతున బణాయో. ఇస్రాయేల్, తూమారో షేవాకుడ్ హుయిచా. మేతున బులికోజైస్నీ. 22 బరప్ కరిగి జాయితిం మే తారు అతిక్రమంన, మబ్బు మాయం హువతిమ్‌ తార పాపాల్న నుచ్చి నాఖ్యొ. మే తున హూఃజ్‌ కరి రాక్యోస్. మారకనా పాచో ఫరిన్ ఆవ్. 23 యెహోవా ఆ కార్యంన పూర్తికరి రాక్యొస్. ఆకాష్‌ అక్కూ, గీద్‌ బోలొ. జమీన్ ఇను ఆబ్‌ దర్తీ, చిక్రాణ్‌ మ్హేలొ. పహాడ్‌ పర్బాత్, జంగల్ను ఝాడి ఇనుమను ఝాడ్ అక్కుబి, సంగీత నాదం కరో. యెహోవా ఇస్రాయేల్ ఇను యో మహీమనా దెఖ్కాడి లీషె. 24 పేట్మతూ తున మే బణాయోతె తారో చొఢావవాళొ యెహోవా హుయోతె మేస్‌ అక్కూ కరవాళో. మే ఎక్కస్‌జణో ఆకాషంనా చౌడు కర్యోతె మేస్‌ జమీన్న అష్యల్‌ కర్యొ. 25 మేస్‌ ప్రగల్పుల్ను ప్రవచానల్న నాషనం కరవాళో. సోదే బోలవాలన దివావ్నుని ఘోణి, జ్ఞానుల్ను తేలివి తేటల్నా ఇను పాచు పరైన్ నిష్‌ ప్రయోజం కరవాళో మేస్. 26 మేస్‌ మారో షేవాకుడ్ను వాతెన ఘట్‌ రాకవాళో. మారి దూతల్ని హూఃజ్నా సఫల్‌ కరవాళో మేస్. యెరూషలేంమ రావాళు ఇజ్గా రషేకరి, యూదాను జాత్‌ వాళూ ఇవ్ను హఃయార్ బందీళీషేకరి మే ఆగ్నా దిదో. ఇను పుటి గయుతే జొగన అషల్‌ కరవాళో మేస్. 27 మేస్‌ తారి నద్దివ్నా హుఃకాయ్‌ నాకవాళో. హుకాయ్‌ జాకరి బొలుకరుతే మెస్. 28 కోరేషూతి-మారుమందనుకాపరి మారి ఇష్టం హఃరినా కరిదేవ వాళోకరి బోలవాళో మేస్. యెరూషలేంతి-పాచు బాందిలేవో, మందిరంను పూనాదిబి ప్రారంభంకరిలేవో.