1 నీతిన పళ్లిన్ యెహోవాన దూండవాళో, మారి వాతే హఃమ్జో. తూమే కేహో బండామ చెక్కబడ్యాకి హూఃజ్ కరో. తుమే కేహో గుంటమతూ నిక్లాహుయాకి ఇన హూఃజ్ కరో. 2 తుమారో భా అబ్రాహాము బారేమ హూఃజ్ కరో తుంనా ఫైదాకరితే షారను బారేమ హూఃజ్ కరో యో ఎకేళి హుయిన్‌ రహితోబి, మే ఇన బులాయో ఇన ఆషీర్వవాదం కరిన్ ఘన గణు అద్మియేతరా కర్యొ. 3 యెహోవా సీయోనునా ఆదరణా కరుకరస్. ఇనజునూచతే జోగోహఃరనా ఆదరణే కరిన్ ఇను అరణ్యంను ఝాడినా ఏదేనుతరా కరుకరస్. బల్డాను జమీన్ హాఃరు యెహోవాను భాగ్ గోణికరి కరుకరాస్. ఆనందంసంతోషం, కృతజ్ఞాతా స్తూతుల్‌హఃరు, గీధ్‌హఃరు ఇనుమ హఃమ్జావ్షే. 4 మార అద్మీయేహఃర, మారి వాత్నా కాన్‌ లగాడిన్ హఃమ్జో. ఉపదేషం మారకంతు నిక్లూకరస్. జనుల్నా ఉజాళుహువానా మారి వీధినా నియమించిస్. 5 మే చూణిరాక్యోతే మారినీతీనా కన్నేచాతే మేదేంతే రక్షణన దేంకరుస్. మార హాతేహుః జనుల్నా న్యాయ్‌కరిస్. నానదేహ్‌వాళు మారమణి దేకిన్ దేక్తూరషే.ఇవ్నేహఃరు మారికోళమవ్షే. 6 అబ్‌ మణితూమర డోళపాడిన్ దేకో. హేట్‌ జమిన్నా దేఖొ. అంతరిక్షం దువ్వనిగోణి దువ్వమమళిజాషే. జమీన్ జూనలుంగడినిగోణి పాటిజాషే. ఇనుమను అద్మీహఃరు ఇమ్మస్ మరిజాషే. మారి రక్షణేమాత్రం ఇమ్మస్‌రషే. మారినీతి నుచ్చావ్షేకోయిని. 7 నీతి పళింన్‌చాలవాళా, మారి వాతేనహంజో. మారి భోదన దిల్మారాకవాళా అద్మీవో, హఃమ్జో అద్మీనాకతే నిందల్నా నొకొడరో. ఇవ్ను దూషేణని వాతేన దిగుల్‌ నొకొకవో. 8 గణ్‌ లుంగడాన కాయితిం ఇవ్నా కయినాక్షే. కీడు కేహూ నాకాయితిం ఇవ్నా కాయినాకీ దిషే. పణ్కీ మారినీతీ మాత్రం కేదకెదేబి భిరి ర్హాషె. మారి రక్షణే తరతరముల్‌ ర్హాషె. 9 యెహోవాను హాతస్, ఉట్టిన్ బలంనాపిరిలా. జమాణమాబి, గణా జమానమబి ఉయ్యోతిం ఇమ్మస్ ఉట్. రాహాబున కుంద్లి నాక్యోతేబి హారాయోతే తూస్‌ కాహేనా? ధర్యావ్ను జీవ జంతుల్నా కత్రినాకోతే తూస్‌ కాహేనా? 10 అంధారికవేరచాతే పాణిను దరౌనుహూకాయి జావకర్హూ కర్యోతే తూస్‌ కహేనా? విమోచనా లిదూహుయు దాటిన్‌ చాలీ జావహఃర్హూ వాట్నీరే కర్యో హుయో తూస్‌ కాహేనా? 11 యెహోవానే చుట్కార్‌ కర్యోహుయొ హఃరు గీద్నా బోల్తూ హుయిన్ సీయోనుమ పరిన్ అవ్షే.కేదేకేదేను సంతోషం ఇవ్నా మాతపర్‌రషే. ఇవ్నే సంతోషానంధంతి హుషే. దుఃకం, బాదేహాఃరు నిక్లిజాషే. 12 మారు మేస్‌ తుమ్నా ఓదార్చోవాళో. మరిజావాళ అద్మియేహూః పాణిను గాహ్క్‌ను జోడ్ను అద్మియేతీ తుమే షాన ఢరోష్. 13 బాదేనకావాళన నాషనం కరనసిందం రహీతోబి ఇను చంఢాల్ను బట్టిన్ కేదేకేదేబి ఢర్తూహుయిన్, అబ్నాధర్తినా బణాయోతే యెహోవాన, సృష్టికర్తన బైకీ జావను అష్యల్నా? బాధ గాలుకరతే ఇవ్నే షాత్ హుయిగయు? 14 పడిగయొతే జల్దీ విడుదల పొందిన్ యొ కాడ్మా కోజాషేని, మరి కోజాషేని ఇన ఖాణు కొయినితిమ్‌ కోర్హాషేని. 15 మే తారో దేవ్ యెహోవా దరౌను జూకళమ ఘోషకరతిం ఇను రేపవాళో మెస్. షేననో అధపతికరి ఇను నామ్. 16 మే ఆకాష్నూ బణాయోతే జమీన్నా పునాది నాక్యోతే మేస్‌కరి మార జనంన తూస్‌ కరిసీయోనుతి బోల్నుతే తార జీబ్‌పర్ దిరాక్యోస్. మారి హఃత్‌చాళమ మూఛి రాక్యోస్.

17 యెరూషలేమ్ను జనంహఃరా ఉట్టో-ఉట్టో యెహోవాను చంఢాల్నుగిన్నె ఇను హఃత్మతు లీలిన్ ఫైదా హుయత హఃరా, తూలి పడ్యుతే గిన్నెమను పీదాతే తూమే, బిరావో. 18 ఛియ్యా హఃరౌమ ఇన వాట్‌ దెకాడ వాళు కోణస్‌ కొయిని. ఇను పాళియు ఛియ్యాన హఃరౌమ హఃత్ ధరిలే వాళు కోణ్‌ కొయిని. 19 ఆబే అపాయంనా తూన సంభవం హుయు తున ఓదార్చవాళు కోణ్‌ కొయిని? జూను, నాషనం, కరువు, లఢాయే తున మళ్యూ. మే తున కీం ఓదార్చూ? తార ఛియ్యా హఃరా మూర్జాయి గయా దుప్పిని జాల్మా పడిగయతిం గల్లినుపాసళ్ పడిరూస్. 20 యెహోవాను చంఢాల్తి తార దేవ్ను గుర్కాణిమ ఇవ్నే బారాయ్‌ రూస్. 21 ద్రాక్చను రహ్ః పీదా కోయిని తేస్ మత్తు హుయిన్ ష్రమా పడ్యాహూయ తుమే, ఆవాతే హఃమ్జో. 22 తారొ ప్రభూ యెహోవానే ఇను జనంనటేకె ఘంహఃణి కరన తారో దేవ్ అం బోలూకరస్. హైదేకో దొర్లీన్ పడుకరతే గిన్నేన మారి చంఢాల్ని గిన్నేన తార హాత్మతు కాడినాక్యొ. తూ అజూ ఇనుమను కోపీస్ని. 23 తూన బాధ కరవాళన హఃత్మా నాఖిస్. హఃమే దాటితె వాళన హేట్‌ వంగిన్ హఃలామ్‌ కరోకరి ఇవ్నే తరేహూః బోలమ, తూ ఇన పిట్నా దాటవాళన వాట్నితరేకరిన్ జమీన్‌పర్ ఇన వంగాయో. ఇనస్‌ యో గిన్నే పిడాయిస్.