మార్కు 5

యేసు భూత్‍ ధరాక్యుతె ఇన అష్యల్ కరను

1 యేసు సిష్యుల్‍తి మలీన్ గలిలయధర్యావ్‍నా దాటీన్ గెరాసేనుల్‍ ఇలాహొఃమా ఆయూ. 2 యేసు ఢోంగమతూ ఉత్రూస్‍కరా, ఛంద్‍ ధర్రాక్యూతే అద్మి గోరాఢమతూ బాధర్ ఆయిన్ ఇనా హాఃమె ఆయొథొ. 3 యో గొరాఢవ్‍మా రవ్వాలు, లొఢాను హఃమ్‍ఖల్తి ఇనా బాంధీన్‍ ధర్రాకనా కినాహాత్ కోహుయూని. 4 కెత్రుకి చోట్ ఇనా హాత్నా గోఢనా, లోఢను హఃమ్‍ఖల్తీ బాంద్యుతోబి, యో హఃమ్‍ఖల్‍నా తోఢిన్, టుక్డా టుక్డానితరా కర్నాక్‍తు థూ. అనటేకె ఇనా బాంధన కినా హాత్‍బి కోహోతు థూని. 5 యో రాత్ను ధన్ను గోరాడ‍వ్‍మా, ఫహాడ్‍మా ఛిక్రాన్ మేల్తూహుయిన్ ఇనుయోస్ భండవ్‍తి మారిలేతు థూ.

6 యో దూర్‍తీస్ యేసునా దేఖిన్, మిలావ్తూ హుయీన్ ఆయిన్ ఇనా హఃలామ్‍కరీన్‍; 7 "యేసూ! సర్వోన్నతహుయోతే దేవ్నొ ఛియ్యో! మారేతి తున ష్యాను కామ్? మన కాయిబి నకొకర్కరి దేవ్నా నామ్‍తి బోలుకరూస్‍." 8 సానకతో యేసు ఇనేతి బోల్యొ, ఓ ఛంద్‍తీ ఆ అద్మినా బెందీన్‍ జా కరి ఇనేతి బోల్యొ.

9 తెదె యేసు ఇనా పుఛ్చాయో, "తారు నామ్ సాత్? తెదె యో మారు నామ్ సెనా కరి బోల్యొ, కతొ హమె కెత్రుకి జణా." 10 ఇవ్నేయేసునా గ్హడీ ఘడి బతిమాలీన్ ఆ దేహ్ఃతి హమ్నా నకొనహాఃడ్‍కరి బోల్యు.

11 ఎజ్గా ఏక్ పహాడ్నా బాజు ఢూకర్ను మోటుపాంబల్‍ ఛరుకర్తూ థూ. 12 ఇనటేకె యో ఢూకర్‍మాతోబి, "హమ్నా బోలీమోకల్‍కరి యో భూత్‍ యేసునా బతిమాలిదూ." 13 తెదె యేసు ఇనేతి అద్మినా మ్హేందీన్ యో ఢూకర్‍మా జవోకరీ బోలమా, ఇమ్మస్ ఇవ్నే జైన్ ఢూకరేమా పేసిగయూ. ఢూకర్‍మా పేసిజావదీన్‍ లగభగ్‍ బే హాజార్ ఎత్రు గళ్ల్లో యో పాహాడ్‍తీ నాహూఃతూ హుయిన్ ధర్యావ్‍మా పఢీన్ జాన్‍ గొఠాయిన్‍ మరీగయూ.

14 యో ఢూకర్‍నా ఛరాంతెవాల యోహాఃరు దేఖిన్ మిలైలీన్‍ జైన్ హాఃయార్‍మా, గామేవ్‍మా జైన్ హాఃర అద్మియేనా బోల్యొ. 15 జనమ్ జరుగ్యూతే ఇనా దేఖానటేకె యేసుకనా ఆయిన్ యో సేనాను భూత్‍న ధర్రాక్యుథూతె యో అద్మి అష్యల్ హుయీన్ లుంగఢా పేర్లీన్, భెటొతే ఇనా దేఖీన్ ఢరీగయూ. 16 హుయుతే హాఃరు దేక్యూతె అద్మియే, భూత్‍ ధర్యుతే అద్మి ఇన హుయూతె, బుజు ఢూకర్నా హూయుతే హాఃరు ఆయూతె గామ్‍వాలనా బోలమా.

17 ఇవ్నె యేసునా ఆ ఇలాహొఃనా మ్హేందీన్ ఛలోజాకరి బతిమాల్యు.

18 తెదె యేసు ఢోంగ చఢుకరతో భూత్‍ ధర్రాక్యుతె అద్మి ఇనకనా జైన్ "మే తారకేడె రహీస్‍కరి ఇనా బతిమాల్లిదొ."

19 పన్కి, యేసు ఇన బులాలిజావన కోవొప్పేని నొకోఆవ్ పన్ని "తూ తార ఘర్‍వాలకనా జైయిన్, తారఫర్ దెఖ్కాడేతె గోర్‍నా, బుజు ప్రభువు కర్యోతె కార్యాల్‍హాఃరు తుమారు అద్మియేనా బోల్" కరి బోల్యొ.

20 యో జైన్, యేసు ఇనా కర్యొతె హాఃరు దెకపొలి*5:2౦ దేహ్క్ నంగర్‍నూ, దెకపొలికరి బోలస్.మా ప్రచార్ సురుకరమా, అద్మిహాఃరు అష్యం హూయ్గు.