1 అంత్యంను ధన్నువేమా యెహోవామందిర్ పర్వతంనా షిఖరంనా స్థిరపరచబడ్నుకరి పహాడ్తీబి ఊచు పడాయ్ జావమా ప్రవాహం ఆవతిమ్‌ అద్మియే ఇనమా ఆవ్సె. 2 అనహాఃజె యో ధన్నెవేమా అన్యజనుల్ కెత్రూకిజను ఆయిన్ సీయోన్‌మతూ ధర్మషాస్త్రంనా, యెరూషలేమ్ మతూ యెహోవా వాత్‌ నిక్లిన్‌ గయు; యాకోబ్ దేవ్ను మందిరంనా యెహొవా పర్వతంనా అప్నె జయ్యే ఆవొ, ఇనె ఇను వాట్‌ను భన్తి అప్న బోల్చె, అప్నె ఇను వాట్మా చాలి లియ్యే కరి బొల్లిషె. 3 ఇనె బీచ్మా ర్హావలొహుయిన్ కెత్రుకి అన్యజనాభోనా న్యావ్ కర్చె. ఇవ్నె ఇవ్ను ఖడ్గంయేనా* నాగరి నక్కులితరా ఇవ్ను భాలొయేనా మచ్చుఛరియేనితరా కేచ్చిన్‌మార్చె, జనంను ఉప్పర్ జనం ఖడ్గం పాడకొయినితిమ్ ర్హాషె, లఢాయ్‌కరను షిఖిజావను అద్మియే అజు భులిజాషె. 4 కిను ఢర్‌ కొయినితిమ్ హర్యేక్ జనుబి ఇను అంగూర్‌ను జాడనుహేట్‌బి ఇను గుల్లర్‌ను జాడనుహేట్‌బి బేక్చె; సైన్యంనా అధిపతి హుయోతె యెహోవా వాత్ దీరాక్యోస్. 5 హాఃరు అద్మియే ఇను ఇను దేవ్ను నామంనా హఃయల్ కర్తా హుయిన్ చాలిలీషె, అప్నె హుయతొ అప్ను దేవ్ హుయోతె యెహోవా నామ్‌నా హమేషాబి హఃయల్‌ కర్లియే.

6 యెహోవా అంబోలుకరాస్, యో ధన్నే లంగ్డు వాలన జమ కరిష్‌, పార్లిబాజు నహాఃడి దిదతె వాలనా బాధ పడుకరతె వాలనా ఏక్ కట్టొ కరీస్. 7 లంగ్డు వాలన షేసంనితరా దూర్‌ నహాఃఢిదిదుతె వాలన కువ్వత్‌ హుయుతె జనంనితరా మే కరిష్, యెహోవా సీయోను పహాడ్ ఫర్ హంకెతోడి షాస్వతంనుధన్‌తోడి ఇవ్నా రాజనితరా ర్హాషె. 8 మందొను గోపురం, సీయోన్ ఛోరిను పర్వత్‌, అగాడీనూతరా యెరూషలేమ్ను ఛోరిఫర్ తున హఃర్కార్ ఆవ్షె. 9 తూ షాన ఛిక్రాణ్ బేందుకరస్‌ తున రాజొ నార్హావను బారెమాస్ తారు హఃయలేను కర్తల్ నాష్ హువను బారమాస్‌ జణావతె బాయికొనా ఆయుతె ధరద్ తున ఆయునా? 10 సీయోన్ను ఛోరి, ఫైదాకరతె రాండ్ను తరాస్ తూ దర్ద్‌పడీన్ ఫైదాకర్‌, తూ హఃయర్ మ్హెందిన్ బాదర్ జివ్ను కరిస్‌, బబులోన్ గామ్‌ తోడి తూ జైయిస్‌, ఎజ్గస్ తూ రక్చణ పొందిస్‌, ఎజ్గస్ యెహోవా తారు దుష్మన్‌ను హాత్‌మతూ తున ఛొడావ్షె. 11 అప్నె దేక్తా ర్హావమా సీయోన్ అపవిత్ర్‌హుయిజాషె హువదా! కరి బొల్లెతాహుయిన్‌ అన్యజనాభో కెత్రూకిజను తారఫర్ మలిన్ ఆయ్రూస్. 12 కళ్లంమా ఏక్జను హోఃతతిమ్‌ యెహోవా ఇవ్నా ఇక్కట్ కర్షె. పన్కి ఇవ్నె ఇను హూఃజ్‌నా మాలంకరుకరకొయిని, ఇనె హూఃజ్‌వాలు గ్రహించుకరకొయిని. 13 యెహోవా అమ్ బోలుకరస్‌, సీయోన్‌ను ఛోరి, ఉట్టీన్ ఖలు ఖుందల్. తుమ్నా ల్హోడను షింగ్డా పీథల్‌ను పాక్డియేతరా కరీష్. తూ కెత్రుకి జనాభోను గల్లోనా ఖుంద్లిదీష్. ఇవ్ను అన్యాయంను దవ్లత్‌నా యెహోవాహుయోతె మన ప్రతిష్టకరీష్. ఇవ్ను ధన్‌ దవ్లత్‌నా సర్వలోకంనా ప్రభుహుయోతె మన ప్రతిష్టకరీష్.