1 తడ్కను ధన్ పండవ్నా చూణను పాషల్తి , అంగూర్ పండా ఒధుకరతె చూణను పాషల్తి కింర్హాషెకీ మారు హాలత్ ఇమ్మస్ ర్హాషె. 2 భక్తివాళు దేహ్ఃమా కొయినితిమ్ హుయ్గు, అద్మియేమ నిజాయితీవాతిహుయోతె వాళు కోన్బి కొయిని, హాఃరుబి జాన్నా ఖత్రకరనటేకె పొంచిలీన్ ఛా; హర్యేక్ జణూబి ఇను ఖందెను అద్మియేనా ఇను భైనటేకె ఝాల్నా నాక్తో ర్హాస్. 3 బే హాతేతి ఖర్రాబ్ కరనా పూనిలేస్ నెయ్యో బహుమాన్ కోరను, న్యాయాధి పతియే లంచమ్ లీలిషె , మహాన్ వాలు ఇవ్ను దోఖ ఆహ్ఃనా మాలం కరావ్సె. ఇమ్నితరా ఇవ్నె ఏక్ బాజుతి కంతు ఇనా ఖతం కర్షె. 4 ఇవ్నమా అఛ్చు వాలు కాఠను ఝాడు జోడ్ను వాలు, ఇవ్నమా యథార్థవంతుల్ కాఠను వాడ్గినతీబి కాఠా కాఠానుతరా ర్హాషు, తూ కాపరుల్ ధన్నే తూ షిక్చపొందుషుతె ధన్ ఆంకరాష్. హంకెస్ అద్మియే గబ్రాంకరాష్ 5 దోస్త్ కనా నమ్మికమ్ నొకొరాక్ , అస్లి దోస్త్‌నా నొకొ నమ్మిస్, తారు గలెమలెమా హూఃయిన్ ఛాతె ఇనా హాఃమె తూ హోటేను ధర్వాజొన జత్తన్‌తి ర్హా. 6 ఛియ్యో భానా హాఃమ్జో కొయిని, ఛోరి ఆయ ఉప్పర్ హోవ్‌యే అత్తెనా ఉప్పర్ ఉట్షెయొ, కిను ఘేర్వాలు ఇవ్నస్ దుష్మన్ హుయిజాషె. 7 హుయుతోబి యెహోవానటేకె మే దేక్తొ ర్హైష్, బఛ్చా వాలో హుయోతో మారు దేవ్నటేకె మే దేఖ్తో ర్హైష్‌, మారొ దేవ్ మారు ప్రార్థన హఃమ్చె.

8 మే వైరియే , మార ఉప్పర్ ఉచ్కి పడ్‌నొకొ, మే హేట్ పడ్యోతొబి, ఫరిన్ ఉట్టిష్; మే అంధారుమా బేక్యొతోబి యెహోవా మన ఉజాళు తరా ర్హాషె. 9 మే యెహోవా నజార్‌మా పాప్ కర్యో అనటేకె యో మారు బాజుమా లడ్ఢాయే కరీన్ మారు బాజుమా న్యాయం కరతోడి మే యో ఛాండల్నా హాఃమాలిష్‌; యో మన ఉజాళుసు మ్హైహి బులావ్షె, ఇను నీతినా మే దేఖిస్. 10 మే వైరి ఇనా దేక్చె. తారొ దేవ్ హుయోతె యెహోవా కెజ్గకరి మారేతి బోలి ఇజ్జాత్ ఖైయిష్, యో మారు ఢోళొయేనా దెఖ్కావ్షె హంకె యో గళ్లిమా ఛాతె చిక్కడ్ తరా ఖుంద్లావ్షె. 11 తారు బీతే బుజు బంధావ్ను ధన్నే ఆంకరాష్, తెదె తారు సరిహద్దునా ఖుల్లా హుసె. 12 యో ధన్నేమా, అష్షూరు దేహ్ఃమతూబి ఐగుప్తు దేహ్ఃను హఃయెరే మతూబి, ఐగుప్తు సురుకరిన్ యూఫ్రటీసు నదితోడి ఛాతె జొగొమతూ, త్యోత్యో ధర్యావ్ను ఇచ్మాను దేహ్ను, త్యోత్యో పర్వత్ను ఇచ్మాను దేహ్ః మతూబి అద్మియే తారకనా ఆవ్షె. 13 హుయుతొ దేహ్ఃమా జింకరాతె కర్యుతె కామేనా బట్టిన్ దేహ్ః ఖర్రాబ్ హుసె.

14 తారు హాత్ను లాక్డి లీలిన్ తారు అద్మియేనా కర్మెలుకనా చేర్యుతె ఝాడిమా ప్రత్యేకంతి జింకరతె తారు దవ్లత్ వాలన చరావ్. భాషామాబి గిలాదుమాబి ఇవ్నె జమానను ధన్నెమా ఢొయుతిమ్ ఢొవ్షె. 15 ఐగుప్తు దేహ్ః మతూ తూ ఆయోతెదె జర్యుగుతిమ్ మే అద్మియేనా అద్భుత్నా దెఖ్కాడి దీస్‌. 16 అన్యజనాభోనా యో దేఖిన్ ఇవ్నేనా హువతె థాకత్ హాఃరు థోడు కరి షరమ్ హుయిన్ మ్హోడు మూచిలిసె. ఇవ్నె కాన్ భైరు హుయిజాసె. 17 హాఃప్ తరా ఇవ్నె మాఠినా చాట్చె జమీన్ను ఉప్పర్ నాహఃతె కీడనుతరస్ ఇవ్నె భేడియా మతూ కాప్తుహుయిన్ నాహిఃన్‌ ఆవ్షె, అప్ను దేవ్‌హుయోతె యెహోవాయొద్దనా ఢర్తూహుయిన్ ఆవ్షె , తారబట్టి ఢర్ హుసె. 18 ఇను ధన్ దవ్లత్మా లపాఢిలీదుతె ఇవ్ను దోషాల్నా పరిహరించిన్‌, ఇవ్నె కర్యుతె అతిక్రమంయ్యే హఃబర్ హూవఇన్ ఇవ్నా మాపికరతె దేవ్ హుయోతె తారెతీ సమాన్‌హుయోతె దేవ్ ఛాన? 19 ఇనె బుజు అప్నకనా దయాకర్చె అప్ను దోషాల్నా ఖుంద్లినాకిదిషె , ఇవ్ను పాపాల్ అక్కునా ధర్యావ్ అగాధంమా తూ పాఢినాఖీష్. 20 జమాణ ధన్నెమా తూ హమారు భాను భాహుయోతె అబ్రాహాము యాకోబ్‌నా ప్రమాణ్ కర్యొతె హాఃఛినా గోర్‌నా తూ అనుగ్ర చీస్.