హోషే 3

హోషేయ ఇను బావన్నా పాచు బులాయిలేవను

1 యెహవా మన అమ్‌ బోల్యొ. "ఇష్రాయేల్ హుఃక్కాయి గయుతె ద్రాక్షాను పండవ్ను ముద్దనా ఆహ్ఃకరిన్ అలాదు దేవ్నా పూజకర్యొతోబి మే, యెహోవానొ, ఇవ్నా లాఢ్‌ కర్యొతిమ్మస్‌ ఇను బావ్రిను ఫ్యార్‌నా దేక్నుకరిహుయితె రహాఃవాలి కందె జైయిన్ బాయికోన ఫ్యార్తి దేక్." 2 అనటేకె మే పంద్రా తులంను ఱూపున, 330 కిలోను బార్లీను అనాజ్తి బాయికోన మోల్ లీదొ. 3 ఇనేతి అమ్‌ బోల్యొ. "జీవయెత్ర ధన్ తూ మారకేడె రహిజా. రహఃవాలితోబి, కెహూ మరద్మానోనా చెంద్యుతె ఇవ్నునితరా నొకొర్హాజొ. మేబి తార బారేమ ఇమ్మస్‌ ర్హయిస్." 4 షానకతో, ఇష్రాయేలీయుల్ను ఘనుధన్ రాజొ కొయినితిం, మోటా కొయినితిం బలినా దేవనుకొయింతె ర్హాషె. దేవతను స్తంభంనాబి, ఏఫోదునా తోబి ఘర్ను దేవ్నాబి పన్కి రాఖలేయికొయిని. 5 ఇనుబాద్మ ఇష్రాయేలీయుల్ పాచు ఫరిన్ ఆయిన్ ఇవ్ను దేవ్ హుయోతె యెహోవా కనా ఇనో రాజొ దావీదు కనా విచారణ కర్షె. ఆఖరీను ధనుమా ఇవ్నె హాఃరు ఢర్‌భక్తీతి యెహోవాను అనుగ్రహంటేకె ఇనకందె ఆవ్షె.