3 О Аврамо тэлиля лэ Дэвлэсти лэ муеса жы каринг э пхув, и о Дэл пхэндя лэсти:

4 — Акэ тути Мэрно завето: ту авэса о дад бутэ народонэнди. 5 Ту кала времятар на авэса тэ акхарэспэ Аврамо*, теро алав авэла Авраамо*, пала кода со Мэ стердэм тут дадэса важ бут мануша. 6 Мэ стерава кадя, со тутэ авэна фартэ бут бэятонэн. Мэ стерава кадя, со тутар авэна бут народуря, тай тутар авэна тхагара. 7 Мэ дав тути завето, када кадя ж авэла завето андай екх порода авря породати пэ саворэ бэрша, сар вечно завето: Мэ авава терэ Дэвлэса тай Дэвлэса терэ бэяцэнди. 8 Ся пхув лэ Ханааности, пэ сави ту екхатар жувэс, Мэ отдава тути и терэ бэяцэнди андо вечно хулаимос, тай Мэ авава лэнди Дэвлэса.

9 О Дэл пхэндя лэ Авраамости:

— Ай ту трэбуй тэ жувэс па Мэрно завето, ту тай терэ бэяцэ, савэ авэна тутар, пэ ся время. 10 Акэ Мэрно завето туса тай терэ бэяцэнца, савэ авэна тутар, па саво ту трэбуй тэ жувэс: кажно мурш трэбуй тэ авэл опшындо. 11 Кажно тумэндар трэбуй тэ авэл опшындо, тай када авэла знако лэ заветоско машкара Мандэ и тумэндэ.