Gênesis 19

О Дэл розмарэл о Содомо тай э Гомора

1 Каринг о вэчеро авилэ дуй янголуря андо Содомо, ай о Лото бэшэлас катар лэ форостерэ вудара. Кала вов додикхля лэн, ущиля лэндэ англал и тэлиля жы каринг э пхув.

2 — Мэрнэ хулая, — пхэндя вов, — мангав тумэн, зажан андо чер кай тумаро копэли. Тумэ халавэна э пэрнэ тай рятярэна, ай тэсараса жана пэстерэ дромэса.

— Най, — пхэндэ вонэ, — амэ рятяраса пэ форо.

3 Ай вов лэн кадя мангэлас, со вонэ жылэ пала лэстэ и зажылэ андо чер. Вов пригэтосардя важ лэндэ лашо хамос, пэкля присно марно, и вонэ халэ. 4 Данглал сар вонэ тэ пэрэн тэ совэн, саворэ мурша анда форо Содомо, тэрнэ тай пхурэ, тэрдёнас паша чер саворэ ригэндар. 5 Вонэ цыпинас лэ Лотости:

— Кай сынэ кола мануша, савэ авилэ каринг тутэ вэчеряса? Виндяр лэн каринг амэндэ, амэ камас тэ пэрэсовас лэнца.

6 О Лото вижыля лэндэ и пхандадя пала пэстэ о вудар. 7 Вов пхэндя:

— Най, мэрнэ пхрала, на терэн кацаво вырытимос. 8 Ашунэн, мандэ исы дуй щея, савэ никала на сас муршэса. Дэн мэ виндярава лэн тумэндэ, и терэн лэнца, со камэн. Кати нисо на терэн калэ манушэнди, савэ авилэ талай упралимос мэрнэ черэс.

9 Вонэ пхэндэ:

— Отжа па дром!

И пхэндэ:

— Акэ дикх, ту, найчячё, авиля кардэ, ай екхатар пхэнэс амэнди, со тэ терас! Амэ тераса туса инке майвырыто, сар лэнца.

Вонэ ашылэ тэ отчювэл тай натасавэл пэ Лотос и поджылэ, тэ випхагэн о вудар. 10 Ай э мурша, савэ сас андрал, зацырдэ лэ Лотос андо чер и пхандадэ о вудар. 11 Ай колэн, ко сас пашай о вудар лэ черэсти, лэ тэрнэн тай лэ пхурэн, вонэ корардэ кадя, со колэ нащи аракхэнас о вудар.

12 Ай кала дуй мурша пхэндэ лэ Лотости:

— Ко инке тутэ катэ исы — э тэрнэ лэ щеянди, шавэ, щея, инке варико андо форо? Виндяр лэн катар, 13 пала кода со амэ камас тэ розмарас кадыва тхан. О цыпимос каринг о РАЙ пэ кала мануша кадя баро, со Вов бишалдя амэн тэ розмарас лэс.

14 О Лото вижыля и пхэндя пэстерэ лэ тэрнэнди, савэ камэнас тэ лэн лэстерэ щеян:

— Майито, ужантар катар! О РАЙ тидэлпэ тэ спхабарэл о форо!

Ай кола гындосарэнас, со вов пхэрясуе.

15 Англай тэсара, э янголуря линэ тэ грабин лэ Лотос:

— Грабисав! Ундяр катар теря ромня и дуен щеян, а то ту хасайвэса бэзэхэнца калэс фороса.

16 Ай вов на грабияспэ, тунче кола дуйжэнэ линэ пала васта лэс, лэстеря ромня тай лэ дуен щеян, и виндярдэ лэн аври пала форо, пала кода со о РАЙ тынгосардя лэн. 17 Кала виндярдэ лэн пала форо, екх лэндар пхэндя:

— Фирисар пэско жувимос! На обдикхпэ палпалэ тай на притэрдю никай по дром! Прастэ андэ плая, а то ту хасайвэса!

18 Ай о Лото пхэндя лэнди:

— Най, Хулай! 19 Ту кацаво лашо каринг мандэ, терэ копэлэстэ, и Ту сыкадян манди баро тынгимос, фирисардян мэрно жувимос. Андэ плая мэ на допрастава: э бида дорэсэла ман, тай мэ хасайвава. 20 Акэ кодыва форицэ найдур, инчя мэ йито допрастава, тай вов найбаро. Кордэ мэ и прастава — вов сыно цыкно, тай мэрно жувимос авэла фирисардо.

21 Вов пхэндя:

— Мишто, Мэ стерава и када: Мэ на спхабарава о форо, пала саво ту пхэнэс. 22 Майито прастэ инчя, пала кода со мэ нисо на стерава, жы кай ту на допрастэса жы лэстэ.

Акэ состар кодыва форо сас акхардо Цоаро*19.22 Пэ пхур. евр. шыб алав «Цоар» пэрэндярэлпэ сар «найбаро, цыкно». .

23 О кхам ужэ ущиля, кала о Лото допрастая каринг о Цоаро. 24 Тунче о РАЙ шордя па нэбо, сар брышынд, сера ягаса по Содомо и Гомора. Вой авиля лэ РАЕСТАР анда нэбо. 25 Вов розмардя э форуря и ся кадай риг, тай саворэн, ко котэ жувэлас, тай ся, со барёлас пэ пхув. 26 Ай э ромни лэ Лотости опдикхляпэ палпалэ и тердяпэ лонэско столбо.

27 Тэсара пэ авэр дес о Авраамо вазгляпэ и рисайля каринг кодыва тхан, кай вов тэрдёлас англа РАЙ. 28 Вов подикхля по Содомо тай по Гомора, и додикхля ся мал, и ля сама, со ла пхуятар ваздэлпэ тхув, сар о тхув анда бов.

29 Кадя, кала о Дэл спхабардя э форуря па кода тхан, кай жувэлас о Лото, Вов сэрдя пала Авраамо и фирисардя лэ Лотос ла бидатар.

О Лото тай лэсти щея

30 О Лото даралас тэ ашэлпэ андо Цоаро, пала кода вов тай лэсти дуй щея нашлетар котар тай линэ тэ жувэн андэ плая. Вов жувэлас андэ пещера пэстерэ дуе щеянца.

31 Э барэдэр щей пхэндя лэ майцыкняти:

— Амаро дад пхуро, ай пэ пхув нинай муршэс, саво жувэлас бы амэнца, сар трэбуй. 32 Матярам лэ дадэс чехыреса и совам лэса. Мэк и лэ дадэстар, но амэндэ авэна бэяцэ!

33 Андэ кодыя рят вонэ матярдэ пэстерэ дадэс чехыреса, тай э барэдэр щей зажыля и сутя лэса. Вов и на ганля, ни сар вой сутя лэса, ни сар ужыля.

34 Пэ авэр дес э барэдэр щей пхэндя ла майцыкняти:

— Кодыла рятяса мэ сутэм лэ дадэса. Матярам лэс инке чехыреса адес пэ рят, и ту зажаса тай совэса лэса. Мэк и лэ дадэстар, но амэндэ авэна бэяцэ!

35 Вонэ матярдэ лэ дадэс чехыреса тай андэ кодыя рят, и э майцыкни щей зажыля и сутя лэса. Вов и на ганля, ни сар вой сутя лэса, ни сар ужыля.

36 Кадя лэдуй щея лэ Лотости ашылэ пхарэ пэстерэ дадэстар. 37 Э барэдэр щей андя шавэс и дя лэсти алав Моаво*19.37 Пэ пхур. евр. шыб алав «Моав» ашунэлпэ сар «мэрнэ дадэстар». . Вов — дад лэ адесутнэ моавитянэнго. 38 Э майцыкни щей андя шавэс и дя лэсти алав Бэн-Амми*19.38 Пэ пхур. евр. шыб алав «Бэн-Амми» пэрэндярэлпэ сар «сын моего народа».. Вов — дад лэ адесутнэ амонеенго.