1 Coríntios 14

भविष्यवाणी इंगा अन्यभाषाद आत्मिक दान

1 इंगोगोर मिंदा प्रेम शेस्केन मिद जीवन जगायना इंगा आत्मिक दानला कसोम उत्सुक उंडांडा इंगा विशेष शेशी भविषवाणी शेशेद इच्छा फेटना. 2 येव्वारकी अन्य भाषा माटलाडेद दान उंडाद वाड खरेम सुस्ते मनशीसंगा माटलाडाड तर द्यावारसंगा माटलाडताड येनटीक की वाड येम माटलाडताड इदी येव्वारकीच तेलवाद. पवित्र आत्मा तीकनुस वाड रहस्यय माटलु माटलाडताड. 3 पण यवाड भविष्यवाणी शेस्ताड वाड मंदीद आत्मिक वाढ, प्रोत्साहन इंगा शांती माटलु माटलाडताड, 4 येवान देगार अन्य भाषाला माटलाडेद दान उंडाद, वाड आध्यात्मिक रूपता स्वताद वाढ शेस्कुंटाड, पण येवानकी भाविषवानी शेशेद दान उंडाद वाड संपूर्ण मंडळीद वाढ शेस्ताड. 5 मीर आंदार अन्य भाषाला माटलाडाला, पण विशेष शेशी मीर भविष्यवाणी शेय्याला इल्ला नाद इच्छा उंडाद येनटीक की येवाड अन्य भाषाला माटलाडताड, वानकाना येवाड भविष्यवाणी शेस्ताड वाड फेद्दावोड उंडाड. दिन कसोम की, मंडळीद वाढ कावाला. 6 इप्पुड, तम्मूडलु इंगा शेल्यांलु, जर नीन मितिकुड अन्य भाषाला माटलाडेदेंक वस्तीन की मिक येम फायदा? मि फायदा आय्ये कसोम नीन मीतिकुड प्रकटीकरण, द्यावारदी ज्ञान, द्यावार तिकनुस भविष्यवानी लेका नेरपुकाम येतकेन दावा वद्दो येम? 7 जर निर्जीव संगीत वाद्यल उदा. बासरी, विणा लेका आवाज तीशेदेनलेका उंडाय जर आ वाद्यल आटला तीकनुस येल्ले वेगवेगळा आवाजाला फरक स्पष्ट कमसाक फो, तर येव्वारकी बासरी इंका वीणा मिदां याद संगीत वास्तुनार आदी यल्ला तेलची? 8 इंगा जर कर्णा अस्पष्ट आवाज तिस्ते तर लढाई कसोम यवाड तैयार आय्यी? 9 आल्ले मीर पण इंगोगोर संगा साफ-साफ माटलाडा कुंटे तर मिद येवारकी आना यल्ला तेलची? येनटीक की मीर हवाला माटलाडेतोर आय्यार. 10 निःसंशय, दुन्यामला शेंगेम प्रकारी भाषाल उंडाय इंगा यादुच बिना अर्थदी लेद. 11 दिन कसोम जर नाक भाषाद अर्थ तेलवाक फो तर वाड माटलाडेतोन कसोम नीन विदेशी ठराशान इंगा येवाड माटलाडतुनाड वाड ना कसोम विदेशी ठराशी. 12 बिलकुल इद्दे माटा मीक पण लागू आयताद जर मीर आध्यात्मिक दानला कसोम उत्सुक उंडार तर मंडळी उन्नती कसोम, मंडळीला आध्यात्मिक रुपता मजबुती वच्चे कसोम जोरदार प्रयत्न शेयंडा. 13 दिन कसोम, यवाड अन्य भाषाला माटलाडताड वाड आदी जे माटलाडीनाड दानदी अर्थ शेप्पा दावाला आंकेन प्रार्थना शेय्याबेक. 14 येनटीक की जर नीन अन्य भाषाला प्रार्थना शेस्तान तर ना आत्मा पण प्रार्थना शेस्ताद पण नाद बुद्धी निष्फळ नीलस्ताद. 15 तर येम शेय्या बेक? नीन ना आत्माता प्रार्थना शेश्यान पण आल्ले नीन ना बुद्धीगोन पण प्रार्थना शेश्यान. 16 येनटीक की जर नु नी आत्माता द्यावारदी धन्यवाद शेस्ताव तर यवाड इनेतोड सामान्य मनशी येवाड आंदू कुसनीनाड तर वाड नी उपकारस्तुती प्रार्थना मिंदा "आमेन" यल्ला आनी? येनटीक की नु यम आंटाव आदी वानकी तेलवाद. 17 येनटीक की नु उपकारसुस्ती शिंगार शेस्ताव, खरेम इदी शिंगार उंडाद तरी दानता इंगोगोनदी उन्नती काद. 18 नीन द्यावारकी धन्यवाद इस्तान, येनटीक की नीन मी आंदार काना जास्त अन्य भाषा माटलाडतान. 19 पण नीन मंडळीला अन्य भाषाला फदी सावीर शब्दल माटलाडेदपेक्षा, इंगोगोरकी पण नेरपाला आंकेन, नीन ना बुद्धीगोन आय्यीद शब्दल माटलाडेद इदी नाक शिंगार वाटास्ताद.

20 तम्मुडलु इंगा शेल्यांलु, मीर विचारला बीळांलेका काकुंडा. दानऐवजी दुष्टता बाबतिला शिन्ना बिडालेका नीरागस पण मना विचारला परिपक्व कांडा. 21 पवित्र शास्त्र आंटाद,

"इंगोगो भाषा माटलाडे तोरदी उपयोग शेशी इंगा अन्य भाषाता

नीन इ मंदीसंगा माटलाड्यान

तरीसुद्धा वार नाद इनेतोर लेर." इल्ला प्रभुड आंटाड. ✝14:21 पवित्र शास्त्र आंटाद, "इंगोगो भाषा माटलाडे तोरदी उपयोग शेशी इंगा अन्य भाषाता नीन इ मंदीसंगा माटलाड्यान तरीसुद्धा वार नाद इनेतोर लेर." इल्ला प्रभुड आंटाड. यशया 28:11-12.

22 दिन कसोम अन्य भाषाला माटलाडेद दान इदी विश्वास फेट्टेतोर कसोम लेद अविश्वासी मंदी कसोम चिन्ह उंडाद पण भविष्यवाणी विश्वासी मंदी कसोम चिन्ह उंडाद अविश्वासी मंदी कसोम लेद. 23 दिन कसोम जर आंता मंडळी वगातळा वस्ताद इंगा प्रत्येक मनशी अन्य भाषाला माटलाडतुनी इंगा जर बैटूटोड इंगा अविश्वासी नोनीक वच्या, तर मीर पागल उंडार इल्ला वार मीमलान आनाक फोयार येम? 24 पण जर आंदार भविष्यवाणी शेयदेंक आंटीर इंगा जर अविश्वासी इंगा बैटूटोड नोनीक वच्या, तर आंदार येम माटलातुन्यार आदी इनेतोनकी वान पापदी जाणीव आय्यी वार आंदार वानदी न्याय शेस्तार; 25 वान अंतःकरणदी गुपित येरका आतादआय्यी इंगा वाड बोरकाला फडी इंगा द्यावारदी आराधना शेशी इंगा आनी "खरेमे द्यावार मी नडमा उंडाद".

उपासनाला सुव्यवस्था उंडेद आवश्यकता

26 हे तम्मूडलु इंगा शेल्यांलु येम शेयाबेक? मीर वगातळा वस्तार आप्पुड मीपैकी प्रत्येकोर येवाड भजन फाडेदेंक, येवार शिक्षण इच्चेदेंक, येवार द्यावार इच्चीनेद प्रकटीकरण शेपदेंक, येवाड अन्य भाषाला माटलाडदेंक, तर यवाड अर्थ शपदेंक तैयार उंटाड. आंताच मंडळी वाढ कसोम कावाला. 27 जर येवाराना अन्य भाषाला माटलाडेतोड उंटे तर इद्दार इंगा जास्तीत जास्त मुग्गुरे माटलाडाला, वगा वेळला वक्काडे माटलाडाला इंगा वगा वक्काडे इ माटाद अर्थ शेप्पाला. 28 जर मंडळीला अर्थ शेप्पेतोड येवाडूच लेकुंटे तर अन्य भाषा माटालाडेतोड सभाला शांत उंडाला, स्वता संगा इंगा द्यावार संगा माटलाडाला. 29 इद्दार लेकाते मुग्गुर भविष्यवाणी शेय्याला इंगा बाकीचे मंदी वार येम माटलाडतुनार दानदी परीक्षा शेय्याला. 30 कुशीनोर पैकी वगा व्यक्तीक जर येमाना द्यावार सुपिस्ते तर पहिला संदेश इच्चेतोड गप्प कुस्नाला. 31 जर आंदार भविष्यवाणी शेशी शेकास्तार, तर मीर वगान यंका वगाड भविष्यवाणी शेशी शेकास्ताड, दिन कसोम की आंदार नेरवाला, इंगा आंदार प्रोत्साहित कावाला. 32 इंगा संदेष्ट्याली आत्माल आ संदेष्ट्यान स्वाधीन उंटाय. 33 येनटीक की द्यावार गडबडी शेशेतोड द्यावार लेड, शांती येतकेन वच्चेतोड द्यावार उंडाड. यल्ला आन्नी द्यावार पवित्र मंदी मंडळीला शांती बनाशी उंटाद.

34 आंड्योर मंडळीला शांत निलवाला, येनटीक की वारकी मंडळीला माटलाडेद परवानगी लेद, पण अधीन निल्चेद आज्ञा उंडाद; येनटीक की नियमशास्त्र पण इल्ले आंटाद. 35 वारकी जर येमाना नेरशेद उंटे तर वार स्वतः मोगुन इल्काडा आडगेद येनटीक की आंडीदानदी मंडळीला माटलाडेद इदी दानकी लज्जास्पद उंडाद. 36 द्यावारदी वचन मीतीकनुस येल्लीनाद येम? का आदी फक्त मी नंताके वचीनाद येम?

37 वगाड जर स्वतःन संदेष्टा समजास्ते इंगा जर वाड स्वतान आत्मिक मनशी समजास्ते तर वाड इदी येरका बेक की, याय माटलु नीन मिक रास्तुनान आय द्यावार इच्चीनेय आज्ञाल उंडाय. 38 पण जर येवाराना नीन येम राशीनान आदी मानायाकुंटे, तर वानदी माटा पण मीर मानायाकुंडा.

39 दिन कसोम हे ना तम्मूडलु इंगा शेल्यांलु भविष्यवाणी शेशेदेंक उत्सुक उंडांडा, अन्य भाषा माटलाडदेंक मना शेय्याकुंडा. 40 पण आन्नी माटलु योग्य रितोता इंगा व्यवस्थित उंडाला.