ख्रिस्त द वर्तन
1 क्रेत विश्वास फेटे टोर वार्की इल्ला सुचामत की सरकारी सत्यद न्याय शेशेटोळ इंगा अधिकारी इर शेई किंदा उंडाला. इरी आज्ञा पाळाला, हर वगा फनीला तैयार उंडाला. 2 यवार्दी निंदा शैयारोद, जगडाल आळेटोर बेकाल्या पण सहनशील आय्यी आंदारकी आन्नी माटलाला नम्रता सुपीयाला, इल्ला वारकी आठवण इ. 3 येनटीक की मनाम पण पहिला अविचारी, अवमान शेशेटोर इंगा बेहेकासनेर उंटीम; अलग-अलग वासनाली इंगा सुखटोर दासलु उंटीम, वाईट फनीद इंगा घमंडला आताद. मनाम अमंगळ आनेतोर इंगा एकमेकोरदी कोफाम शेशेटोर उंटीम; 4 पण मना ताराशेळ द्यावार्दी मय्या इंगा प्रेम मनुष्य मदा प्रकट आय्या, 5 आप्पुड मनाम शेशिनेय, नितीमत्व फनिलाद लेद, पण वाळ मनालनी वान मयाइचांग, कोत्ता जन्मद तीस्कुनी गात पवित्र आत्माता कोतालेका ताराश्या. 6 इंगा मना तारक ख्रीस्त तीकेल मना मिंदा आदी आत्मा जास्तता येशा.3:6 योएल 2:28. 7 म्हणजे मनाम वान कृपाता नीतिमान ठहराशी आंनीकाळदी जीवन आशा लेका वारीस काला.
8 इदी ओक्का विश्वास दी वचन उंडाद इंगा नाद इच्छा उंडाद की, नु इ माटलु ताकदता शेपता फो. म्हणजे, यवार परमेश्वर मिंदा विश्वास फेटीनार वार शिंगार फनीला उंडेळदी काळजी तीस्कोनाला. इ माटलु शिंगार उंडी आंदार मंदी कोळोन्क हितूद उंडाद. 9 पण मुर्खपणदी जगळाम, गणगोद्दी, झगडाल इंगा मोशेद नियमशास्त्र विषयला जगडाम टाळा मतुता फो येनटीक की इ माटलु बिना फनीय इंगा व्यर्थ उंडाय. 10 मी मधातला जगळाल आनचेतोर मनशिक वगा तीकुड इंगा रोंड तीकुड शिका मतीनेका मना देगारकेल दुराम फेट. 11 निक यरका उंडाद, इल्ला मणशी बेहेकासणेळ उंटाल इंगा पाप शेसका उंटे वान तिकेल वानदी स्वताद न्याय आताद.
शेवट द संदेश
12 नीन अंतर्मान इंगा तुखीकलान नीतीकुड आम्पदिचीनेका, नातीकुड निकापलीस शहरकी एल्ली वचेळदी प्रयत्न शेय येनटीक की नीन आंदू सलीकालाम तीशेळदी ठहरामतीनान. 13 जेना शास्त्री इंगा अपुल्लो इरकी एमी कमी फळाखोयी इल्ला प्रकारता पोहोचा मत. 14 इंगा मना मंदी स्वता गरजला इचांग शिंगारफनी शेयदेंग शिक्का मत्तेळदी काळजी तीस्कोनाला; म्हणजे वार फळ लेनेर का फोयार.
शुभेच्छाल
15 नाबरोबरटोर आंदार निक दंडाम शेप्तार. यवार मना मिंदा विश्वासइचांग प्रेम शेस्तार वारकी नाद दंडाम शप. मी संगा कृपा उंडाला.