तीम्थ्यान तीकुड इचीनेफनी
1 आणकेन मादगोन इन्का दम फटाद, आप्पुड अथेनै शहराला वागाडे यंका निलवाला, इदी माक बागा वाटाशा. 2 इंगा मीम मनाद तम्मू तिमथ्या, ख्रिस्ताद सुवार्तेला परमेश्वरद सेवक वान्क दानइच्चाका आमशा की, वाड मीरक स्थिर शेयाल इंका मीरद ईशवासान्द वाढी ईशयला उपदेश शेयाला; 3 आदि इळा की, इदी संकटाला यवार यरस्कूनेद लेद; आणकेन मनाम दानइच्चाकाच नेमाशीन्द उंडाम. इदी मीर स्वतः जाणाशी उंडार. 4 कारण मीम मीरदग्गारा उंडतीम आप्पुड मीम मीरक शपी फेटतीम की, मनांम्क संकटाल भोगाशेद उंडाद इंका वान प्रमाणगोन घडाशीन्द, इदी मिरक यरकाच उंडाद. 5 दानगोन नाकबी इंन्का दम फटाद, आणकेन नीन मीरद ईशवासाद संबंधागोन ईचारपुस शेशेद आमस्तीम; यवार जाणे, कदाचित परीक्षा तीस्कोनोर मीरक मोह येस्कूनीर आणकेन माद फनी व्यर्थ आईन्द उंडी.
6 इप्पुड तिमाथ्याद मीर द्यग्गारनूट मातीक वच्ची, मीरद इश्वास व प्रीती दानईशयला इंगा यळा मीम मीरक भेटायदेन्क उत्साहित उंडाम आळा मिरबी माक भेटायस्देन्क उत्साहित उंडार माद प्रेमागोण नेहमी आठवन शेस्ता दिन विषय शुभवर्तमान मातीक येतकेणवच्चीर; 7 दानगोन तम्मूनो, माक मनाद आंता अडचणला व संकटाला मीरद ईश्वासमिंदूडद मीरईशयंद समाधान शिक्क्या; 8 कारण जर मीर प्रभूला खंबीरपणागोन टीकास्तार तर इप्पुड मीम जेमूलाजेम वच्चीन्दल्यका निलस्तार. 9 आणकेन मना परमेश्वर मुदारा, मीम मिकसारोम, याय आंता आनंदागोण आनंद शेस्ताम आबद्दल मीम परमेश्वरक मीरकस्रोम यम धन्यवाद ईस्ताम? 10 मीम मब्बू माफक पुष्कळ प्रार्थना शेस्ताम की, मीम मीक मुतीमुदारा सुडाला इंगा मीरद ईशवासाला कमी उंडाद आदि पूर्ण शेयाला.
11 परमेश्वर, मानाद आब्बा वाड स्वतः व मनाद प्रभू येशु वाड, माद मिरतीक वच्चेद यमटीदबी अडचण न वस्ता आइ इयाला; 12 इंका जशी माद प्रीती मीरमिंन्दा उंडाद, इळा प्रभू मीरद प्रीती वगारमेंगारमिंदा व आंदारमिंदा वाढवाशी विपुल शेयाल; 13 दिन कसरोम की, मनाद प्रभू येशु मनाद आंदार पवित्र जनालसह वच्ची आयेळक वाड मीरद अंतकरणलु द्यावारा मनाद आब्बा वानमुदारा पवित्रतेला निर्दोष आयद इच्चाका स्थिर शेयाल.