1 Coríntios 5

ಸಬೆಮ ವ್ಯಬಿಚಾರ‍್ನಿ ತಕಲೀಬ್

1 ತುಮಾರಮ ವ್ಯಬಿಚಾರ್ ಛಾ಼ಕರಿ ಖಬರ್‌ನ ಮೇ ಖ್ಹಮ್‍ಜ್ಯೊ. ಏಕ್‍ಜ಼ಣೊ ಇನ ಬಾನಿ ಬಾವಣ್ಣಾಸ್ ರಾಖಿಲಿದೋಕಸ್. ಅಥ್ರಾನು ವ್ಯಬಿಚಾರಿ ಅಲಕ್‌ ಅದ್ಮಿಮಾಬಿ ಅಥ್ರಾನು ವ್ಯಬಿಚಾರ್ ಕಾಮ್ ಕೊದೆಖಾವನಿ. 2 ಕತೋಬಿ ತುಮೆ ಊಚ಼ಹುವಾನ ದೇಖುಕರಸ್. ಕಿಮ್ ರ‍್ಹಯುತೋಬಿ ತುಮೆ ದುಖ್ ಕೋ ಕರ‍್ಯಾನಿತೆ, ಆ ಕಾಮ್ ಕರವಾಳನ ತುಮಾರಮಾಥು ಭಾರ್‌ ಕಾಡಾನ ಕೊ ಹೊಯ್ನಿಕಿಶು? 3 ಮೇತೊ ಶರೀರ್‌ನಿ ಪರಕ್ಮ ತುಮಾರೇಥಿ ದೂರ್ ರ‍್ಹಯುತೋಬಿ ಆತ್ಮೀಕ್ ಪರಕ್ಮ ಖನ್ನೆ ಛೂ಼.ಮೇ ತುಮಾರಿ ಜೋ಼ಡ್ಮ ರ‍್ಹವಾನಿ ಪರಕ್ಮಾಸ್ ಆ ಅಥ್ರಾನು ಕಚಿಂಡ್ ಕಾಮ್ ಕರವಾಳನಿ ಬಾರೇಮ ತದೇಸ್‌ ಇನ ಶಾತ್‌ಕರ‍್ನುಕರಿ ತೀರ್ಮಾನ್ ಕರಿರಾಖ್ಯೊಸ್. 4 ತುಮೆ ಎಕ್ಟುಹುಯಿನ್ ಅವಾನಿತರ ಮೇಬಿ ತುಮಾರಿ ಜೋ಼ಡೆ ಮಾರ ಆತ್ಮೀಕ್ ರೂಪ್‌ಮ ಅಪ್ಣೊ ಪ್ರಭು ಯೇಸುನ ನಾಮ್‍ಥಿ ಹಮಾರ ಜೋ಼ಡೆ ರ‍್ಹವಾನಿಘೊಣಿನಿ ತಾಖತ್ತಿ ತುಮಾರಿ ಜೋ಼ಡ್ಮ ಎಕ್ಟು ಹುಯಿರ‍್ಹೊಸ್. 5 ಅಜು಼ ಯೋ ಅದ್ಮಿನು ಶರೀರ‍್ನು ಸ್ವಭಾವ್ ನಾಶ್ ಹುವಾನಖ್ಹಾಜೆ ಇನ ಶೈತಾನ್ನ ಹಾತ್ಮ ಖ್ಹಪ್‍ಡಾವೊ ಶನಕತೊ ಪ್ರಭು ಯೇಸುನ ದನ್ಮ ಇನು ಆತ್ಮ ಬಚಾ಼ವನಖ್ಹಾಜೆ ಅಮ್‍ಕರ‍್ನು. 6 ತುಮಾರು ಹಂಕಾರ್ ಕರಾನು ಅಛ್ಛು಼ಕಾಹೆ; ದರಾಖ್ಹು ಶೋಡ ಘುಂದಾಸ್ತೆ ಆಟಾನ ಫುಲಾವಸ್‌ಕರಿ ಬೋಲಾನು ತುಮೂನ ಮಾಲುಮ್ ಕೊಯ್ನಿಕಿ ಶು? 7 ತುಮೆ ಭರ್‌ಪೂರ್‌ಥಿ ಪಾಕ್‌ ಹುವಾನಖ್ಹಾಜೆ ಪಾಪ್ನು ಜೂ಼ನು ಶೋಡಾನ ಕಾಡಿನಾಕ್ಣು. ತದೆ ತುಮೆ ಖಿವೂಬಿ ಶೋಡ ನಾಖ್ಯಹುಯ ಕೊಂತೆ ನವೊ ಆಟೊ ಹುಯಿರ‍್ಹಿಶು. ಶನಕತೊ ತದೇಸ್‌ ಅಪ್ಣೊ ಪಸ್ಕ ಬಾಳಾನಿಬಲಿ ಹುಯಿರ‍್ಹೊಸ್ ಯೋ ಮೆಂಢಾನು ಚೆಲ್ಕು ಕ್ರಿಸ್ತಸ್ ಶಿಲ್‌ಬೆನಪರ್ ಬಲಿಹುಯೊ. 8 ಇನಖ್ಹಾಜೆ ಅಪ್ಣೆ ಖರಾಬ್ ಫನೈ, ಖರಾಬ್‌ಚಾ಼ಲ್‌ಕರಿ ಬೋಲಾನು ಖಾಟಾಆಟಾನ ಝಿಟ್‌ಕಾರಿದಿಯೆ, ಪರಿಶುದ್ ಅಜು಼ ಖ್ಹಾಚು಼ಕರಿ ಬೋಲಾನು ಖಾಟುಕೊಂತೆ ನವರೋಟಾನ ಖೈನ್ ಪೂಜ಼ ಕರ್‌ಯೇ. 9 ಮೇ ತುಮೂನ ಚಿಟ್ಟಿ ಲೀಖ್ಯೋತೆ ಚಿಟ್ಟೀಮ ವ್ಯಬಿಚಾರಿನೊ ಖ್ಹಂಗ್ ನಾ ಕರ್ನುಕರಿ ಲೀಖಿರಾಖ್ಯೊಸ್. 10 ಕತೋಬಿ ಆ ಜಗತ್‍ಮಾನು ವ್ಯಬಿಚಾರಿ ಆಖ್ಹ್‌ಭರ‍್ಯು ಛಿನೈಲ್ಯವಾಳು, ಮೂರತ್ನ ಪೂಜ಼ಕರವಾಳು ಹುಯಿರಾತೆ ಎಥ್ರಾನವಾಳನ ಖ್ಹಂಗ್ ಮ್ಹೇಲಿದೇವ್ಣುಕರಿ ಕಾಹೆ. ಇಮ್‌ ಮ್ಹೆಲ್‍ನುಕತೊ ತುಮೆ ಆ ಜಗತ್‍ನಾಸ್ ಮ್ಹೆಲಿಜಾ಼ವ್ಣು ಪಡ್‌ಶೆ. 11 ಕತೋಬಿ ಕ್ರಿಸ್ತಮ ವಿಶ್ವಾಸ್ಮ ಭೈ ಭೇನೆಕರಿ ಬೋಲಿಲ್ಯವಳೊ ವ್ಯಬಿಚಾರ್ ಕರಾವಾಳೊ, ಲಾಲಚ್‌, ಮೂರತ್ನ ಪೂಜ಼ಕರವಾಳೊ, ಲಡೈಕರವಾಳೊ, ಗಾಳೆ ದ್ಯವಾಳೊ, ಪೀಯ್ಯವಾಳೊ, ಛಿನೈಲ್ಯವಾಳೊ ಹುಯಿರ‍್ಹವಾನಿ ಪರಕ್ಮ ಇನ ಖ್ಹಂಗ್ ನಾಕರ‍್ನು. ಎಥ್ರಾನ ಜೋ಼ಡ್ಮ ಖಾಣುಬಿ ನಾ ಖಾವ್ಣು. 12 ಸಭೆನ ಭಾರ್‌ ರ‍್ಹವವಾಳಾನ ತೀರ್ಪ್‌ ಕರಾನ ಮನ ಶನಿ ಅಧಿಕಾರ್ ಛಾ಼. ಮಹಿವಾಳನ ತೀರ್ಪ್‌ ಕರವಾಳೋಬಿ ತುಮೇಸ್‍ನಿ? 13 ಭಾರ್‌ ರ‍್ಹವಾಳನ ತೀರ್ಪ್‌ ಕರಾವಾಳೊ ದೇವಸ್. ತುಮಾರ ಬೀಚ್ಮ ರ‍್ಹವಾಳ ಯೋ ಖರಾಬ್ ಅದ್ಮಿನ ಭಾರ್‌ ಕಾಡಿನಾಖೊ.