1 ಕೊರಿಂಥ 8

ಮೂರತ್ನ ಅರ್ಪಣ್ ಕರಾತೆ ಖಾಣಾನಿ ಬಾರೇಮ ಫೇಡ್

1 ಮೂರತ್ನಬಲಿ ಕರಿಹುಯು ಖಾವಾನಿ ರಾಛಾ಼ನಿ ಬಾರೇಮ ಅಪ್ಣುನ ಖ್ಹಾರಾನ ಅಕ್ಕಲ್ ಛಾ಼ಕರಿ ಮಾಲುಮ್‌ ಪಡಾಸ್‌, ಅಕ್ಕಲ್ ಫುಗೈನಾಖಸ್, ಕತೋಬಿ ಪ್ಯಾರ್ ಜಾ಼ಖ್ಹತ್ ಕರಸ್. 2 ಏಕ್‍ಜ಼ಣೊ ಇನುಯೋ ಶಾತ್ತೋಬಿ ಮಾಲುಮ್ ಕರಿರಾಖ್ಯೊಸ್‍ಕರಿ ಲಹಿರಾಖ್ಯೊತೊ ಯೋ ಕಿಮ್ಕಿ ಪರಕ್ಮ ಮಾಲುಮ್ ಕರ್ನುಕಿ ಯೊ ಪರಕ್ಮ ಬಿಜೂ಼ಬಿ ಮಾಲುಮ್ ಕೋ ಕರಿರಾಖ್ಯೋನಿ. 3 ಕತೋಬಿ ಕೋಣ್ ದೇವ್ನ ಲಾಡ್‍ಕರಸ್ಕಿ ದೇವ್ನೆ ಇನ ಮಾಲುಮ್ ಕರಿರಾಖ್ಯೋಸ್. 4 ಅಮ್‌ರ‍್ಹವಾಪರ್ ಮೂರತ್ನ ಅರ್ಪಣ್‍ ಕರಿಹುಯು ಖಾಣನ ರಾಛ಼ನ ಖಾವಾನು ಬಾರೇಮ ಜಗತ್‌ಮ ಮೂರತ್ ಶಾತ್ಬಿ ಕಾಹೆಕರಿ ಅಪ್ಣುನ ಮಾಲುಮ್‍ಛಾ಼. ಅಜು಼ ದೇವ್ ಎಕ್ಕಸ್‍ಜ಼ಣೊ ಪಣ್ಕಿ ಬಿಜ಼ ಖಿವೂಬಿ ದೇವ್ ಕೊಯ್ನಿಕರಿ ಮಾಲುಮ್ ಛಾ಼✝8:4 ಧರ್ಮೊ 4:39. 5 ಆಬ್‌ಪರ್‌ರ‍್ಹವೊ, ಧರ್ತಿಪರ್‌ರ‍್ಹವೊ ದೇವ್‌ಕರಿ ಬೋಲೈಲ್ಯವಾಳು ಕೈಯೆಕ್ಕಿ ರ‍್ಹಯುತೋಬಿ, ದೇವ್‌ಕರಿ ಪ್ರಭುಕರಿ, ಖ್ಹಮ್‌ಜಾ಼ಡವಾಳು ಜಾ಼ಖ್ಹತ್ ಛಾ಼. 6 ಅಪ್ಣುನತೋಬಿ ಎಕ್ಕಸ್ ದೇವ್ ಛಾ಼. ಯೋ ಬಾಕರಿ ಬೋಲೈಲ್ಯಾವಾಳೊ; ಅಖ್ಖೂಸ್ ಉಬ್‍ಜ್ಯೊತೆ ಇನೇಥಿ ಹಮೆ ಇನಖ್ಹಾಜೆ ಜಿವೇಸ್ ಅಜು಼ ಏಕ್‍ನೊ ಏಕ್ಕಸ್‍ಜ಼ಣೊ ಪ್ರಭು ಛಾ಼. ಯೋಸ್ ಯೇಸು ಕ್ರಿಸ್ತ ಇನೇಥಿಸ್ ಹರೇಕ್ ತಯಾರ್‌ಹುಯು. ಇನೇಥಿಸ್ ಹಮೇಬಿ ಇನೇಥಿಸ್ ಛಿಯ್ಯೆ಼. 7 ರ‍್ಹಯುತೋಬಿ ಆಕ್ಕಲ್‍ ಖ್ಹಾರಮಾಬಿ ಕೊಯ್ನಿ. ರ‍್ಹೀನ್‌ಬಿ ಥೋಡುಜ಼ಣು ಹಮ್ಕೆಲಗು ಮೂರತ್‍ಕನ ಜಾ಼ವನು ಆದತ್ ಛಾ಼. ಅಮ್‍ರ‍್ಹೀನ್ ಖಿವು ಅದ್ಮಿಖ್ಹಾರು ಖಾಣು ಖಾವನಿ ವಖ್ಹ್‌ತೆ ಯೋ ಮೂರತ್ನ ಅರ್ಪಣ್‍ ಕರಿಹುಯು ಕರಿ ಸೋಚಾ಼ಸ್‌. ಕತೋಬಿ ಇವ್ಣೆ ದಿಲ್ನಿಸಾಕ್ಷಿ ಕಮ್‍ಜೋ಼ರ್ ಹುಯಿರ‍್ಹೂತೆ ಇನಖ್ಹಾಜೆ ಯೊ ಖಾಣು ಖಾವಾನು ಮೈಲು ಹುಯಿರ‍್ಹೂಸ್ ಕರಿಲ್ಹಾವಸ್. 8 ಕತೋಬಿ ಅಪ್ಣೆ ಖಾವನು ಖಾಣು ದೇವ್ನ ಖನ್ನೆ ಮ್ಹೇಲಾಕೊಯ್ನಿ. ನಾ ಖಾವಾಥಿ ಲುಕ್ಷಾನ್‌ಬಿ ಕೊಯ್ನಿ. ಖಾದೋತೊ ಫಾಯಿದೊಬಿ ಕೊಯ್ನಿ. 9 ಕತೋಬಿ ಆ ತುಮಾರು ಛುಟ್ಕಾರ್‌ನಿ ಬಾರೇಮ ಹೊಷಾರ್‌ಥಿ ರ‍್ಹವೊ. ವಿಶ್ವಾಸ್ಮ ಕಮ್‍ಜೋ಼ರ್‌ರ‍್ಹವಾಳ ಅದ್ಮಿನ ತುಮಾರಿ ಹಕ್‌ ಪಾಪ್‌ಮ ರಡ್ಕಾನ ಕಾರಣ್ ಹೋಣುತೆ ಜ಼ತನ್‌ರ‍್ಹೇಣು. 10 ಅಕ್ಲಿ ಹುಯಿರ‍್ಹವಾಳೊ ತೂಸ್ ಮೂರತ್ನ ಮಂದಿರ್‌ಮ ಖಾಣನ ಬೇಠುರ‍್ಹವಾನು ಕಮ್‍ಜೋ಼ರ್ ದಿಲ್‌ವಾಳು ಭೈ ದೇಖ್ಯತೊ, ಯೋಬಿ ಮೂರತ್ನ ಪೂಜ಼ಕರ‍್ಯಹುಯ ಖಾಣನ ರಾಛಾ಼ನ ಖಾವನ ಭಾಲ್ ಉಷೆ ಕೊಯ್ನಿಕಿಶು? 11 ಅಮ್ ಆ ತಾರಿ ಅಕ್ಕಲ್‍ಥಿ ಯೋ ಕಮ್‍ಜೋ಼ರ್ ಭೇನೆ ಭೈಯೆ ನಾಶ್‍ಹುಯಿಜಾ಼ಸ್. ಇನಖ್ಹಾಜೇಬಿ ಕ್ರಿಸ್ತ ಇನ ಜಾನ್ನ ದಿದೋತೆ ಫಾಯಿದೊಕೊಂತೆ ಹುಯಿಜಾ಼ಶೆ. 12 ಅಮ್‍ರ‍್ಹೀನ್ ತುಮೆ ವಿಶ್ವಾಸಿ ಭೇನೆ ಭೈಯೇನಿ ವಿರೋದ್ ಪಾಪ್‍ಕರೀನ್ ಇವ್ಣ ಕಮ್‍ಶಿಲ್ ಮನ್ನಿಸಾಕ್ಷಿನ ದುಖ್ ಕರಾಯತೊ ತುಮೆ ಕ್ರಿಸ್ತನಿ ವಿರೋದ್ ಪಾಪ್‍ಕರವಾಳ ಹುಯಿರಿಶು. 13 ಇನಖ್ಹಾಜೆ ಖಾವಾನು ರಾಛು಼ ಮಾರ ಭೇನೆ ಭೈಯೇನ ಪಾಪ್ ಹುವಾನುರ‍್ಹಿಯೂತೊ ಅಜು಼ ಮೇ ಕದೇಬಿ ಬೋಟಿನ ಕೋ ಖೈಶ್‍ನಿ,ಅಮ್ ಮೇ ಇವ್ಣುನ ಪಾಪ್ ಕರಾನ ಕಾರಣ್ ನಾಹೊಣು.