1 Timóteo 2

ಸಬೇನಿ ಆರಾದನೆ

1 ಖ್ಹಾರೇಥಿ ಪಹಿಲೆ, ತಮಾಮ್‌ ಅದ್ಮಿನಖ್ಹಾಜೆ ಬಿಂತಿ ಅಜು಼ ಪ್ರಾರ್ಥನೆ ಕರೊ. ಅಖ್ಖಾ ಅದ್ಮಿವ್‌ನಖ್ಹಾಜೆ ದೇವ್‌ಕನ ಅವಾಗ್‌ಮಾಂಡೊ*2:1 ಖ್ಹುದ್‌ನಖ್ಹಾಜೆ ಖಲಿಕಾಹೆ ಬಿಜಾ಼ವ್ನ ಖ್ಹಾಜೆ ಪ್ರಾರ್ಥನೆ ಕರಾನು ಕರಿ ಮತ್‌ಲಬ್. ಅಜು಼ ದೇವ್ನ ಧನ್ಯವಾದ್ ಕರೊಕರಿ ತುಮೂನ ಬೋಲಿಲೆವುಸ್. 2 ರಾಜಾ಼ವ್‌ನಟೇಕೆ, ಖ್ಹಾರ ಅದಿಕಾರಿನಟೇಕೆ ಧನ್ಯವಾದ್. ಅನೇಥಿ ಅಪ್ಣೆ ಸಮಾಧಾನ್ ಶಾಂತಿನ ದೇವ್ನ ಭರ್‌ಪೂರ್‌ ಮರ್ಯಾದಿ ದೇತಹುಯಿನ್ ಅಛ್ಛಿಜೀವನ್ ಚ಼ಲಾವನಖ್ಹಾಜೆ, 3 ಆ ಹೈರುತೆ ಅಛ್ಛು಼ ಅಜು಼ ಅಪ್ಣೊ ರಕ್ಷಕ್ ಹುಯಿರೋತೆ ದೇವ್ನ ಪಸಂದ್‍ನು ಹುಯಿರುಸ್. 4 ಯೊ ತಮಾಮ್‌ ಅದ್ಮಿ ರಕ್ಷಣೆಲೀನ್ ಅಜು಼ ಖ್ಹಾಚಿನ ಪರಖ್‌ಣು ಕರಿ ಬೋಲಾನುಸ್ ಇನಿ ಆಖ್ಹ್. 5 ಶನಕತೊ ಎಕ್ಕಸ್ ದೇವ್ ಅಜು಼ ದೇವ್‌ನಬಿ ಅದ್ಮಿನ ಮಳಾವವಾಳೊ ಎಕ್ಕಸ್ ಜ಼ಣೊ, ಯೋ ಕೋಣ್‌ಕತೊ ಅದ್ಮಿ ಹುಯಿರ‍್ಹೋತೆ ಕ್ರಿಸ್ತ ಯೇಸುಸ್. 6 ಇನೆ ಹರೇಕ್ ಜ಼ಗ್‌ಜಾ಼ತ್ನ ಅದ್ಮಿನ ಬಚಾ಼ಡಾನಖ್ಹಾಜೆ ಛೋ಼ಡಾವನಟೇಕೆ ಇನ ಯೋಸ್ ಒಪ್‌ಶೈದಿದೊ. ಯೋ ಹರೇಕ್ ಅದ್ಮಿನ ಬಚಾ಼ಡನ ಹರ್ಖ್ಹಾಸ್. ಆಸ್ ಬರೋಬರ್‌ನಿ ವಖ್ಹತ್‌ಮ ಬೋಲ್ನುತೆ ಸಬೂತ್ ಹುಯಿರುಸ್. 7 ಅಜು಼ ಅನಖ್ಹಾಜೆಸ್ ಮನ ಶಿಕಾಡವಾಳೊ ಅಜು಼ ಅಪೊಸ್ತಲ ಕರೀನ್, ವಿಶ್ವಾಸ್‌ಥಿಬಿ ಖ್ಹಾಚಿಥಿಬಿ ಯೆಹೂದ್ಯರ್‌ಕಾಹೆತೆ ಅದ್ಮಿನ ಭೋದನೆಕರಾನ ಮನ ನೇಮಕ್ ಕರ‍್ಯು. ಮೇ ಝೂ಼ಟಿ ಕೊಬೋಲುಕರುನಿ ಖ್ಹಾಚಸ್ ಬೋಲುಕರುಸ್. 8 ಅನಖ್ಹಾಜೆ ಅಖ್ಖಿ ಝ಼ಗೋಮ ಪರ್ಖ್ಹೊ ಖ್ಹಾರು ಇರಾದೊಕೊಂತೆ, ಆಡ್‌ಫೇಡ್ ಬೋಲ್ನುನಾತೆ, ಹಾತ್ನ ಪಾಡಿನ್ ದೇವ್‍ಥಿ ಸಮರ್ಪಣ್‌ ಹುಯಿನ್ ಪ್ರಾರ್ಥನೆ ಕರ‍್ನುಕರಿಸ್ ಮಾರಿ ಆಖ್ಹ್ ಹುಯಿರ‍್ಹಿಸ್. 9 ಅಮ್ಮಸ್ ತಯೇಡಾಬಿ ಮರ್ಯಾದಿಥಿಬಿ ಅಜು಼ ಗ್ರಿಸ್ತಿಥಿರ‍್ಹೀನ್ ಇಜ಼್ಜತ್‌ನ ಮಾನಿಜಾ಼ವನು ಲುಂಗ್ಡಾನ ಫೇರ‍್ನುಕರಿ ಆಖ್ಹ್‌ ಕರುಸ್. ಇವ್ಣೆ ಘಣಿಥರಾಥಿ ಕೇಖ್ಹ್‌ನು ಶನ್‌ಗಾರ್, ಖ್ಹೊನ್ನುಖ್ಹರಪ್‌ಥಿ ಶನ್‌ಗಾರ್, ಲುಂಗ್ಡಚಿತ್ರಾಥಿಸ್ ಶನ್‌ಗಾರ್ ನಾಕರಿಲೇವ್ಣುತೆ, 10 ದೇವ್ನಿವಿಶ್ವಾಸಿ ತಯೇಡಾನ ರ‍್ಹೇವ್ಣುತೆ ಚಾ಼ಲ್‌ಚ಼ಲಣ್ಣ ಅಛ್ಛಾ಼ಕಾಮ್‌ಥಿ ಶನ್‌ಗಾರ್ ಕರಿಲೇವ್ಣು. 11 ಅಜು಼ ತಯೇಡ ಶಪೋಥಿಬಿ ಅಚಾ಼ನ್‌ಥಿಬಿ ಭೊದನೇನ ಶಿಕಾವಳಿ ಹುಯಿರ‍್ಹೇಣು. 12 ಮೇ ಪರ್ಖ್ಹಾವ್‌ನ ಬೋಲಿದ್ಯವಾನು ರ‍್ಹವೊ, ಇವ್ಣಪರ್ ಹಕ್‌ಚ಼ಲಾವನು ರ‍್ಹವೊ ತಯೇಡಾನ ಮ್ಹೇಲುಕೊಯ್ನಿ. ಇವ್ಣೆ ಖ್ಹೊಪೇಥಿ ರ‍್ಹೇಣು. 13 ಪಹಿಲೆ ಬಣ್ಯೋತೆ ಆದಾಮ್, ಇನಪಾರ್ ಹವ್ವ ಬಣೀತೆ. 14 ಅಜು಼ ಧೋಕ ಹುಯುತೆ ಆದಾಮ್ ಕಾಹೆ; ತಯೇಡ ಧೋಕ ಹುಯಿ, ಅಜು಼ ಯೋ ದೇವ್ನಿ ನಿಯಮ್ನ ತೋಡಿನ್ ಪಾಪಿ ಹುಯಿ. 15 ತೋಬಿ ತಯೇಡ ವಿಶ್ವಾಸ್‌ಮ, ಪ್ಯಾರ್‌ಮ, ಪವಿತ್ರಾಥಿ ರ‍್ಹವಾಮ ಅಜು಼ ಧೋಬೆಡಿ *2:15 ಕತೊ ಖ್ಹುದ್‌ನ ದಾಬುಕ್ಮ ರಾಖಾಮ ಬರಾಬರ್‌ ರ‍್ಹಯೀತೊ ಕರಿ ಮತ್‌ಲಬ್. ರ‍್ಹಯೀತೊ, ಲಡ್ಕಾ ಪೈದಹುವಾನಿ ವಖ್ಹತ್‌ಮ ಬಚಿಜಾಶೆ.